− كەدەيلىكتەن ارىلتۋدان قامال الۋ رۋحى جونىندەگى شولۋ
مىڭ جىلدىق ارمان بۇگىنگى تاڭدا جۇزەگە استى.
2012 - جىلدىڭ سوڭىندا جاڭا داۋىردەگى كەدەيلىكتەن ارىلتۋدان قامال الۋدىڭ شىمىلدىعىن اشقاننان 2020 - جىلدىڭ سوڭىنا دەيىن، جۇڭگو جاڭا داۋىردەگى كەدەيلىكتەن ارىلتۋدان قامال الۋ نىسانا - مىندەتتەرىن ٴدال ۋاعىندا ورىنداپ، قازىر اتقارىلىپ وتىرعان ولشەمدەگى 98 ميلليون 990 مىڭ اۋىل - قىستاق كەدەي حالقى بۇكىلدەي كەدەيلىكتەن ارىلىپ، 832 كەدەي اۋدان تۇگەلدەي كەدەيلىك قالپاعىن الىپ تاستاپ، 128 مىڭ كەدەي قىستاق كەدەيلىك تىزىمىنەن شىعارىلىپ، تاريح بەتىنەن ورىن الاتىن دۇنيە كەرەمەتىن جاراتتى!
2021 - جىلى 2 - ايدىڭ 25 - كۇنى باس شۋجي شي جينپيڭ كەدەيلىكتەن ارىلتۋدان قامال الۋ جونىندەگى مەملەكەتتىك قورىتىندىلاۋ، ماداقتاۋ - سيلاۋ جينالىسىندا ماڭىزدى ٴسوز سويلەپ، كەدەيلىكتەن ارىلتۋدان قامال الۋ ۇلى كۇرەسى «جوعارىدان تومەنگە دەيىن ٴبىر نيەتتە بولۋ، ارىنداي شايقاسقا اتتانۋ، دالمە - ٴدال، ناقتى بولۋ، ٴورىس اشا جاڭالىق اشۋ، قامال الىپ قيىندىقتاردى جەڭۋ، حالىقتىڭ ٴۇمىتىن اقتاۋ» سىندى كەدەيلىكتەن ارىلتۋدان قامال الۋ رۋحىن سومداعاندىعىن، قالىپتاستىرعاندىعىن اتاپ كورسەتىپ، بۇكىل پارتيانى، بۇكىل ەلدى، بۇكىل قوعامدى كەدەيلىكتەن ارىلتۋدان قامال الۋ رۋحىن زور كۇشپەن اسقاقتاتىپ، ٴبىر نيەتپەن ىنتىماقتاسىپ، ەرلىكپەن كۇرەس جۇرگىزىپ، العا باسۋ جولىنداعى بارلىق قيىنشىلىقتار مەن حاۋىپ - قاتەرلەردى باتىل جەڭىپ، جۇڭگوشا سوتسياليزمگە تاباندى بولۋ مەن ونى دامىتۋدىڭ تىڭ دا اناعۇرلىم زور جەڭىسىنە ۇزدىكسىز قول جەتكىزۋگە ۇندەدى.
ٴبىر نيەتتە بولىپ، ارىنداي شايقاسقا اتتاندى
− جاپپاي دوڭگەلەك داۋلەتتى قوعام ورناتۋدا بىرەۋى دە قاعىس قالمادى
ومىرلەرى ارقىلى بورىشتى بىرگە ارقالادى − بۇل ٴبىر ٴتۇتىنسىز شايقاس مايدانى، بۇل ٴبىر اسا ماشاقاتتى قاتاڭ شايقاس، بۇل ٴبىر ٴسوزسىز جەڭۋگە ٴتيىستى كۇرەس!
2016 - جىلى 2 - ايدىڭ 26 - كۇنى گۇيجوۋ ولكەسى چيڭلۇڭ اۋدانىنىڭ كەدەيلىكتەن ارىلتۋدان قامال الۋ بويىنشا مىڭ كادردىڭ كوتەرمەگە الىپ قامتاماسىزداندىرۋ، كومەكتەسۋ - سۇيەمەلدەۋ سەرت بەرۋ جينالىسىندا، بۇكىل اۋدانداعى ٴار دارەجەلى كادرلار وڭ قولىن بيىك كوتەرىپ، ايبىندى سەرت بەردى: «كەدەيلىكتەن ارىلتۋدان قامال الامىز، مەن پارتيا مۇشەسىمىن، ماعان قاراي قاتار تۇزەڭىزدەر!».
وسى ساتتە، ٴتوراعالار مىنبەسىندە تۇرىپ سەرت بەرۋگە باستاعان اۋداندىق پارتكومنىڭ شۋجيى جياڭ شىكۇن ٴومىرىنىڭ سوڭعى ساتتەرىنە تاياپ قالعان ەدى. ٴبىر جارىم ايدان كەيىن، كەزىندە «ٴبىر چيڭلۇڭدىق كەدەيلىكتەن ارىلمايدى ەكەن، اۋداندىق پارتكوم شۋجيى بولعان مەن استە دەمالمايمىن» دەپ سەرت بەرگەن وسى كوممۋنيستىك پارتيا مۇشەسى ٴومىر الاۋىن ٴسوندىرىپ، وسى ىستىق توپىراققا جاتتى.
8 جىلدان بەرى ٴار دارەجەلى پارتيا ۇيىمدارى مەن قالىڭ پارتيا مۇشەلەرى كەدەيلىكتەن ارىلتۋدان قامال الۋدىڭ شايقاس مايدانىندا − «بىردە - ٴبىر كەدەي ٴوڭىردى، بىردە - ٴبىر كەدەي بۇقارانى استە قاعىس قالدىرۋعا بولمايدى!» دەگەن ايبىندى ۋادە ٴۇشىن قايراتتانا شايقاس جاسادى.
تاريح كەدەيلىكتەن ارىلتۋدان قامال الۋ وسى ۇلى شايقاسىنىڭ ماڭىزدى ساتىنە كۋا بولدى −
2017 - جىلى 2 - ايدا جياڭشي ولكەسىنىڭ جيڭگاڭشان قالاسى بۇكىل ەل بويىنشا ەڭ الدىمەن كەدەيلىكتەن ارىلىپ، كەدەيلىك قالپاعىن الىپ تاستاعاندىعىن رەسمي جاريالاپ، ەلىمىزدە كەدەيلىك تىزىمىنەن شىعارۋ مەحانيزمى ورناتىلعاننان كەيىن الدىمەن كەدەيلىكتەن ارىلىپ، كەدەيلىك قالپاعىن الىپ تاستاعان كەدەي اۋدانعا اينالدى.
«شالعايدان كەلگەنىمدە اڭساپ ىزدەپ، وزگەرگەن شىت جاڭا بوپ كونە تۇراق» − كەزىندەگى جيڭگاڭشانداعى ەڭ قيىر كەدەي قىستاقتىڭ ٴبىرى بولعان شىنشان قىستاعى بۇل كۇندەرى ينتەرنەتتە تانىمالى بولىپ، ادامدار ٴسوزسىز باراتىن اۋىل - قىستاق ساياحات تۇيىنىنە اينالدى. بۇكىل قىستاقتا 16 شارۋالار شاتتىعى ساياجايى اشىلدى، %80 قىستاق تۇرعىنى اۋىل - قىستاق ساياحاتىنا ات سالىستى، جان باسىندىق ورتاشا جىلدىق كىرىسى 4 جىلدىڭ الدىنداعى 3000 يۋانعا جەتپەۋدەن 20 مىڭ يۋاننان استامعا جەتىپ، قىستاق كوللەكتيۆىنىڭ ەكونوميكالىق كىرىسى دەرلىك ٴنول بولۋدان 500 مىڭ يۋاننان استامعا ارتتى.
جيڭگاڭشاننىڭ شىنشان قىستاعى جاڭا داۋىردە كەدەيلىكتەن ارىلتۋدان قامال الۋدىڭ وراسان زور تابىسىنىڭ جاندى كورىنىسى.
2018 - جىلى 3 - ايدا «تۇبەگەيلى جەڭىسكە جەتپەي استە بەل شەشپەۋ» سەرتىمەن، گۋاڭشي جۋاڭزۋ اۆتونوميالى رايونى بايسى قالالىق پارتكوم ۇگىت ٴبولىمىنىڭ جاس كادرى حۋاڭ ۋىنشيۋ لىيە اۋدانى شينحۋا قالاشىعىنىڭ بايني قىستاعىنا كەلىپ، قىستاقتا تۇراتىن ٴبىرىنشى شۋجي مىندەتىن ۇستىنە الدى.
قىستاقتا تۇرعانىنا 2 اي بولعاندا، ول بۇكىل قىستاقتاعى بارلىق كەدەي وتباسىلارىن ارالاپ شىعىپ، كەدەيلەردى سۇيەمەلدەۋ ەستەلىگىنە ەگجەي - تەگجەيلى «حالىققا سۇيىسپەنشىلىك» قاريتاسىن سالدى. قىستاقتا تۇرعانىنا ٴبىر جىل بولعاندا، ونىڭ كولىكپەن جۇرگەن جولى شامامەن 25 مىڭ كيلومەتر بولدى؛ قىسقا عانا ٴبىر جىلدان استام ۋاقىتتا، بايني قىستاعىنداعى 88 وتباسىنداعى جيىنى 418 ادامدى كەدەيلىكتەن ارىلتتى. 2019 - جىلى 6 - ايدا سەلگە كەتىپ، قىزمەت ۇستىندە قۇربان بولعان 30 جاستاعى حۋاڭ ۋىنشيۋ ەڭ كورىكتى جاستىق ورالى ارقىلى «كوڭىلىندەگى ۇزاق جورىقتىڭ» ايبىندى ٴداۋىر تاراۋىن جازدى.
2020 - جىلى 12 - ايدىڭ 1 - كۇنى، كەدەيلىكتەن ارىلتۋدان قامال الۋ شايقاسى جەڭىسكە قول جەتكىزۋ قارساڭىندا، گۇيجوۋ ولكەسى زۇن - ي قالاسىنىڭ حۇيچۋان رايونىنداعى قىستاقتا تۇراتىن كادر يۇي يۇڭليۋ كەدەيلىكتەن ارىلتۋدان قامال الۋدىڭ شايقاس مايدانىندا جىعىلدى. «قىزمەت ورنىم ەلەۋسىز بولسادا، مەملەكەت ىستەرىن ۋايىمداۋدى استە ۇمىتقان ەمەسپىن...» كوزى تىرىسىندە قىزىنا جازعان حاتى ٴجۇز ميلليونداعان سايتتاستاردىڭ كوزىنە جاس الدىردى.
قۇربان بەرۋ بولعانى ٴۇشىن ٴوستى جىگەر ۇلعايىپ، اي - كۇنگە ٴامىر شاشا الامىز جاڭارتۋعا كوك ٴجۇزىن. وسى رەتكى كەدەيلىكتەن ارىلتۋدان قامال الۋ شايقاسىندا 1800 دەن استام جولداس قىمباتتى ومىرلەرىن ارنادى.
بۇكىل ەلدىڭ جەر - جەرىنە تارالعان 3 ميلليوننان استام ٴبىرىنشى شۋجي، قىستاقتا تۇراتىن كادر جانە قالىڭ اۋىل - قىستاق كادرى كەدەي وڭىرلەردىڭ كەلبەتىن وزگەرتىپ قالماستان، ونان دا ماڭىزدىسى، ٴوز كۇشىنە سۇيەنىپ ٴومىر ٴسۇرۋ، قاجىرلىلىقپەن كۇرەس جاساۋ تۇقىمىن سەپتى.
حىبەيداعى فۋپيڭنىڭ لوتوۋان قىستاعىندا كەدەيلىكتەن ارىلتۋدان قامال الۋ باستالعاننان كەيىن، سول جەردەگى كەدەي بۇقارا «الاقان جايىپ كۇتۋدەن» «ەكى قولىن ارتىنا ۇستاپ» قاراپ تۇرۋعا دەيىن، ەڭ سوڭىندا «قولىن سىلكىپ تاستاپ» ىستەۋگە وزگەردى. وسى وزگەرىستىڭ ارت جاعىندا كەدەيلەردى سۇيەمەلدەۋ كادرلارىنىڭ اشتى تەرلەرىنىڭ بوداۋىندا كەلگەن بۇقارانىڭ سەنىمى مەن پارتياعا ىلەسۋ بەكىمى جاتىر.
دالمە - ٴدال، ناقتى بولىپ، ٴورىس اشا جاڭالىق اشتى
− نازاردى «ٴتورت ۇلكەن ماسەلەگە» شوعىرلاندىرىپ، شەشۋشى شايقاستىڭ جەڭىسىنە جەتتى
كەدەيلىكتەن قامال الۋدىڭ كىلتى دالمە - دالدىكتە.
يۇننان، گۇيجوۋ، سىچۋاننىڭ شەكارالاسقان جەرىندە «اتەشتىڭ داۋىسىن ٴۇش ولكەدەگىلەر ەستيتىن قىستاق» بار. قىستاقتاعى وتباسىلارىنا تۇتاساتىن جولدىڭ كىرە بەرىسىندە «كوممۋنيستىك پارتياعا العىس ايتامىز» دەگەن ٴبىر تاس ەسكەرتكىش تۇر. مۇنى قىستاق تۇرعىنى شىن جاۋشى تۇرعىزعان.
4 جىلدىڭ الدىندا ۇكىمەت وسى قىستاقتىڭ تۇرعىن ۇيلەردى جاڭارتۋىنا كومەكتەستى، وتباسىلارىنا تۇتاستىرىلعان جول 2 جىلدىڭ الدىندا تاعى ەسىك الدىلارىنا جەتكىزىلدى. وسىدان باستاپ شىن جاۋشىنىڭ مۇگەدەك ايەلى دوڭگەلەكتى اربامەن كىرىپ - شىعا الاتىن، ال ونىڭ ٴوزى سىرتقا شىعىپ جۇمىس ىستەي الاتىن بولىپ، ۇيىنەن شىعا الماي ايەلىنە قارايتىن، كەدەيلىك تاۋقىمەتىن تارتاتىن كۇندەردى اياقتاتتى.
وتباسىلارىنا تۇتاستىرىلعان قىسقا عانا جول ٴبىر ەڭبەككۇشتى قوعامعا قايتا ورالتىپ، ٴبىر سەميانى دا قۇتقارىپ قالدى.
كەدەيلەردى دالمە - ٴدال سۇيەمەلدەۋدە قايتكەندە بىردە - ٴبىر ادامدى قاتاردان قالدىرماۋعا بولادى؟
بۇل تاريحتا بولماعان ادامعا دەيىن دالمە - ٴدال بولۋ بولدى، «كىمگە كومەكتەسۋ - سۇيەمەلدەۋدى» ايقىندادى − 8 جىل ۋاقىتتا، 20 ميلليون ادام - رەت قىستاققا بارىپ، وتباسىلارىن ارالاپ، كەدەي حالىقتى يكەمدى باسقارۋ جانە ينفورماتسيا جيناۋ قىزمەتىن ورىستەتتى.
بۇل دۇنيە جۇزىندە سيرەك كەزدەسەتىن دالمە - ٴدال ۇيىمداستىرۋ بولدى، «كىم كومەكتەسۋدى» ايقىندادى − 250 مىڭنان استام قىستاقتا تۇراتىن قىزمەت اترەتى، 3 ميلليوننان استام اۋدان دارەجەلىدەن جوعارى ورىندار جىبەرگەن قىستاقتا تۇراتىن كادر وتباسى سايىن جاۋاپتى ادام، قىستاق سايىن كومەكتەسۋ - سۇيەمەلدەۋ اترەتى بولۋدى ورىندادى.
بۇل شىندىقتى ٴىس جۇزىنەن ىزدەگەن دالمە - ٴدال شارا اتقارۋ بولدى، «قالاي كومەكتەسۋدى» ايقىندادى − تۇرلىشە كەدەيلەسۋ سەبەبىنە قاراي «التى دالمە - ٴدالدى»، «بەس ٴبىر توپتى» اتقارىپ، جەرگىلىكتى جاعدايعا قاراي ٴىس ىستەپ، ادامعا قاراي ساياسات اتقاردى.
بۇل بايسالدى دا عىلمي دالمە - ٴدال باعالاۋ بولدى، «قالاي شەگىندىرۋدى» ايقىندادى − «ۋاقىت كەستەسىن» ايقىنداپ، ٴۇشىنشى جاقتى ەنگىزىپ، نازاردى ىشكى ومىرشەڭدىك كۇش پەن دامۋ كۇشىنە شوعىرلاندىرىپ، ەڭ قاتاڭ باعالاۋ، ساراپتاۋ جۇيەسىن جاسامپازدىقپەن ورناتىپ، كەدەيلىكتەن ارىلتۋدىڭ جەتىستىكتەرىنىڭ تاريحتىڭ سىنىنان سۇرىنبەي وتۋىنە شىنايى كەپىلدىك ەتتى.
وسىلايشا، نازاردى كەدەيلىكتەن ارىلتۋدان قامال الۋداعى «4 ۇلكەن ماسەلەگە» − «كىمگە كومەكتەسىپ - سۇيەمەلدەۋگە»، «كىم كومەكتەسۋگە»، «قالاي كومەكتەسۋگە»، «قالاي شەگىندىرۋگە» شوعىرلاندىرىپ، مەملەكەتتىڭ كەدەيلەردى سۇيەمەلدەۋ بايلىعىن ٴار وتباسىنا دالمە - ٴدال جەتكىزدى.
كەدەيلىكتەن ارىلتۋدان قامال الۋ قىزمەتى اسا جاپالى، اياقتالار جىلدا تاعى ىندەتتىڭ ىقپالىنا ۇشىرادى. ەڭ سوڭعى «قالتارىستاعى شوعىردىڭ» بۇكىل ەل حالقىمەن بىرگە دوڭگەلەك داۋلەتكە قادام تاستاۋىنا مۇمكىندىك جاساۋ ٴۇشىن، كەدەيلەردى سۇيەمەلدەۋ جالپى كادرلارى دۇنيە جۇزىندە سيرەك كەزدەسەتىن ىندەتتىڭ سوققىسىنىڭ وراسان زور قىسىمىنا قاراماي ارىنداي شايقاسقا اتتانىپ، ماڭداي تەرلەرىن وي − قىرعا توكتى... كەدەيلىكپەن كۇرەسۋدىڭ ٴبىر قىدىرۋ جاڭا شارالارى زامانعا قاراي تۋىلدى:
ىندەت تۋىلعاننان كەيىن بۇكىل ەلدەگى كوپتەگەن ەلەكتروندى ساۋدا تۇعىرلارى ارناۋلى اۋماق اشىپ حۋبەي ٴوڭىرىنىڭ اۋىل شارۋاشىلىق قوسىمشا ونىمدەرىنىڭ ٴوندىرۋ مەن ساتۋدى ۇشتاستىرۋىن جەبەدى، بۇكىل ەل حالقىنىڭ حۋبەيگە كومەكتەسۋ - سۇيەمەلدەۋ ىنتاسى تاسقىندادى؛
اكىم تىكە تاراتۋ ارقىلى «زات ساتتى»، شارۋالار «ينتەرنەتتەگى تانىمالدارعا» اينالدى، ەلەكتروندى ساۋدا تۇعىرلارى ساندى مالىمەت قامداۋ تىزبەگىن ۇلاستىردى... كەدەي وڭىرلەردىڭ اۋىل شارۋاشىلىق ونىمدەرىنىڭ ساتىلۋ مولشەرى ۇزدىكسىز جوعارىلاپ، كەدەيلەردى سۇيەمەلدەۋ كاسىپ سالالارى جۇمىستى قاۋىرت قالپىنا كەلتىردى؛
بۇكىل ەلدىڭ جەر - جەرىنە اتتانعان «جۇمىسشى جالداما ۇشاقتارى»، «جۇمىسشى ارنايى پويەزدارى»، «جۇمىسشى جالداما اۆتوكولىكتەرى» كەدەي بۇقارانىڭ جۇرەگىن مەيىرگە بولەدى؛
...
قامال الىپ قيىندىقتاردى جەڭىپ، حالىقتىڭ ٴۇمىتىن اقتادى
− جاڭا ساپاردا جاڭا شۇعىلانى جالعاستى جازدى
كەدەيلىكتەن ارىلتۋدان قامال الۋدىڭ ۇلى امالياتى كەدەيلىكتەن ارىلتۋدان قامال الۋدىڭ ۇلى رۋحىن تاسقىنداتتى، اسقاقتاتتى.
يۇنناننىڭ حۋاپيڭ اۋدانى جينشاجياڭ وزەنى بويىنىڭ ٴبىر بۇرىشىنداعى شاعىن قالا. حۋاپيڭ قىزدار جوعارى دارەجەلى ورتا مەكتەبىنە كەلگەن ادامداردىڭ مىنا ٴبىر سەرت سوزىنەن اسەرلەنبەيتىنى بولمايدى −
«مەن بۇل ومىرگە وزەنشە ەمەس، بيىك تاۋ بولىپ كەلگەمىن، بيىك شىڭدا تۇرىپ جاي - جاداعاي جىلعالاردى مەنسىنبەي قاراسام دەيمىن. مەن ومىرگە ەلەۋسىز جان ەمەس، ادامنىڭ قاسقاسى بولىپ كەلگەمىن، ۇلىلاردىڭ يىعىندا تۇرىپ قوراش مىسكىندەرگە قومسىنا قاراسام دەيمىن!».
بۇل سەرت ٴسوزىن جازعان حۋاپيڭ قىزدار جوعارى دارەجەلى ورتا مەكتەبىنىڭ باستىعى جاڭ گۇيمەي قاتاڭ ماندەگى «كەدەيلەردى سۇيەمەلدەۋ كادرى» ەسەپتەلمەيدى. 64 جاستاعى بۇل مەكتەپ باستىعى شەكارا وڭىردەگى وقۋ - اعارتۋدىڭ ٴبىرىنشى شەبىنە 40 نەشە جىل تامىر تارتىپ، پارتيا مەن ۇكىمەتتىڭ، سونداي - اق قوعامداعى ٴار سالانىڭ كومەكتەسۋىندە كەدەي قىزداردى وقۋعا تەگىن قابىلدايتىن ورتا مەكتەپ قۇرىپ، قازىرگە دەيىن 1800 دەن استام قىز بالانىڭ داشۋەگە ٴوتىپ، تاۋدان شىعۋىنا كومەكتەسىپ، ولاردىڭ ٴومىرى مەن وتباسىنىڭ تاعدىرىن وزگەرتتى.
كەدەيلىكتەن ارىلتۋدان قامال الۋدىڭ ٴتۇتىنسىز شايقاس مايدانىندا بارلىق جەردەن «كروراندى المايىنشا استە شەپتەن قايتپايمىز» دەيتىن اسقاق جىگەر تاسقىندادى.
«كەدەيلىكتەن ارىلتۋدان قامال الۋدىڭ مەملەكەتتىك ونەگەسى»، چۇڭچيڭ قالاسى ۋشان اۋدانى جۋشيان اۋىلى شياجۋاڭ قىستاعى پارتيا ياچەيكاسىنىڭ شۋجيى ماۋ شياڭلين ۇرپاقتار بويى جالعاسقان توماعا - تۇيىق تاۋ ىشىندەگى ومىرگە بۇرىلىس جاساۋ ٴۇشىن، اۋىلداستارىن باستاپ 7 جىل ۋاقىت جۇمساپ، جالاما قۇزدان جول سالدى؛ كەدەيلىكتىڭ تامىرىنا بالتا شابۋ ٴۇشىن، ول 15 جىلدىق ٴومىرىن سارقىپ، قىستاق تۇرعىندارىن باستاپ جەمىس - جيدەك ٴوسىرىپ، ەرەكشە كاسىپ سالاسىن دامىتتى.
«تاۋدى ٴبىر چى قاشاساق، ٴبىر چى كەڭەيەدى، جولدى ٴبىر جاڭ سالساق، ٴبىر جاڭ ۇزارادى، ٴبىز وسى ۇرپاق ادامدار 10 جىل كەدەيلىك تارتىپ، 10 جىل جاپا شەكسەك تە، ٴسوز جوق، كەلەسى ۇرپاققا جاقسى تۇرمىس جاراتۋىمىز كەرەك». كەزىندەگى ۋادە قازىر ورىندالدى: شياجۋاڭ قىستاعىنىڭ جان باسىندىق ورتاشا جىلدىق كىرىسى 1997 - جىلعى 300 يۋاننان 2020 - جىلى 13 مىڭ يۋاننان استى.
كەدەيلىكتەن ارىلتۋدان قامال الۋ شايقاسىنىڭ جالپى بەتتىك جەڭىسى پارتيامىزدىڭ حالىقتى ىنتىماقتاستىرىپ، باستاپ، تاماشا تۇرمىس جاراتۋ، بىرگە بايۋدى جۇزەگە اسىرۋ جولىندا بەرىك ٴبىر زور قادام باسقاندىعىن بىلدىرەدى. كەدەيلىكتەن ارىلىپ، كەدەيلىك قالپاعىن الىپ تاستاۋ سوڭعى كومبە ەمەس، قايتا جاڭا تۇرمىستىڭ، جاڭا كۇرەستىڭ باستاماسى. اۋىل - قىستاقتى گۇلدەندىرۋ − جۇڭحۋا ۇلتىنىڭ ۇلى گۇلدەنۋىن جۇزەگە اسىرۋداعى كەلەلى مىندەت، اۋىل - قىستاقتى گۇلدەندىرۋ ستراتەگياسىن جالپى بەتتىك اتقارۋ قامال الىپ، قيىندىقتاردى جەڭۋدىڭ «ەرىك - جىگەرىن» ٴتىپتى دە قاجەت ەتەدى.
«ٴبىز نەگىزگى ساتى پارتيا ۇيىمىنىڭ باستاماشىلدىق رولىن قۇلشىنا ساۋلەلەندىرىپ، بۇقارانىڭ شۇعىل، قيىن، ۋايىمداعان، ٴزارۋ ماسەلەلەرىن ويداعىداي شەشۋىمىز كەرەك». گانسۋ ولكەسى حۋاچى اۋدانى چياۋچۋان اۋىلى تيەجياۋچىڭ قىستاعىنىڭ ٴبىرىنشى شۋجيى، قىستاقتا تۇراتىن قىزمەت اترەتىنىڭ باستىعى جاڭ جيانحۇڭنىڭ اۋىل - قىستاقتى گۇلدەندىرۋدى ىلگەرىلەتۋگە دەگەن سەنىمى مىعىم.
بيىل 6 - ايدا ٴبىر كەزەك قىستاقتا تۇرىپ كەدەيلەردى سۇيەمەلدەۋ قىزمەتىن ورىنداپ بولعان شي - نان مەديتسينا داشۋەسىنىڭ دوتسەنتى شيا جي - ي دالياڭشانداعى جاۋجۋە اۋدانىنا تاعى كەلدى. وتكەن 3 جىلدا ول قىستاق تۇرعىندارىن باستاپ تەڭىز دەڭگەيىنەن بيىك جەردە توماعا ٴشوپ ەگۋ بازاسىن سالىپ شىعىپ، 600 گە جۋىق كەدەيدىڭ كەدەيلىكتەن ارىلۋىن تىكەلەي جەبەدى.
«كەلەشەكتە، ٴبىز اۋىل - قىستاقتى گۇلدەندىرۋ شايقاس مايدانىندا ٴوزىمىزدىڭ ماماندىق بىلىمدەرىمىزبەن اۋىل - قىستاقتا ۇزدىكسىز قىزمەت وتەيمىز» دەدى شيا جي - ي.
ۇلى ٴىس ۇلى رۋحتى تۋىنداتادى، ۇلى رۋح ۇلى ىسكە جەتەكشىلىك ەتەدى. ساپار الىس، رۋح ماڭگىلىك، اۋەلگى ماقسات ماڭگى شۇعىلا شاشادى. كەدەيلىكتەن ارىلتۋدان قامال الۋ ۇلى رۋحى اسا قىمباتتى رۋحاني بايلىق، ول جۇڭگو حالقىن جاپا - ماشاقات، قيىنشىلىق، حاۋىپ - قاتەر، كەدەرگى اتاۋلىنى جەڭىپ، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋ جولىندا ۇزدىكسىز كۇرەس جۇرگىزۋگە ماڭگى شابىتتاندىرا بەرمەك.
شينحۋا اگەنتتىگىنىڭ 10 - ايدىڭ 13 - كۇنى بەيجيڭنەن بەرگەن حابارى (تىلشىلەر حوۋ شۋەجيڭ، جوۋ يۋان، ياڭ جيڭ)