وسى زامانعى جىلقى شارۋاشىلىعىنىڭ كوركەيىپ – دامۋىن جەبەدى

    اۆتونوميالى وبلىس سىرتقا شىعىپ تەكسەرۋ جۇرگىزۋ، ۇيرەنۋ، ۇلگى الۋ ارقىلى كاسىپتەردىڭ توعىسپالى دامۋ ۇلى جوباسى جونىندە بىرگە ىزدەنىس جاسادى

    ءتىلشىمىز لي يافىڭ حابارلايدى. جۋىقتا اۆتونوميالى وبلىس جىبەرگەن وبلىستىڭ ورىنباسار باستىعى ەلشات تۇرسىنباي ۇلى باستاعان تەكسەرۋ گرۋپپاسىنداعى 7 ادام بەيجيڭ، ىشكى موڭعۇل، چيڭداۋ، نانتۇڭ، سانيا سياقتى جەرلەرگە بارىپ، جىلقى شارۋاشىلىعى كاسىپورىندارىنىڭ دامۋى مەن ءوندىرىس اينالىمى جاعدايىنا ناق مايداندا تەكسەرۋ جۇرگىزىپ، قىزمەتتەردى ۇشتاستىرىپ، ساپالى جىلقى تۇقىمىن جەتىلدىرۋ، بازا قۇرىلىسى سياقتى ىستەردى كەڭەسىپ، جىلقى شارۋاشىلىعىن توعىسپالى دامىتۋ ۇلى جوباسىن بىرگە اقىلداسىپ، ىلە وبلىسىنىڭ جىلقى شارۋاشىلىعىنىڭ وسى زامانعى جىلقى شارۋاشىلىعىنا قاراي دامۋىن جەبەدى.

    چيڭداۋ دىرۇيجۇنفا بيو عىلىم – تەحنيكا جارنا شەكتى سەرىكتىگىندە تەكسەرۋ جۇرگىزگەندە ەكى جاق جىلقى شارۋاشىلىعىن دامىتۋ ستراتەگيالىق سەلبەستىك كەلىسىمىنە قول قويىسىپ، وسى زامانعى جىلقى شارۋاشىلىعىندا تۇتاس كاسىپ تىزبەگى بويىنشا سەلبەستىكتى تەرەڭدەتۋ، جىلقى تۇقىمىن جەتىلدىرۋ، مادەنيەت سەيىل - سەرۋەنى، ات بايگەسى سياقتى ءتۇرلى كاسىپتىڭ قاتار دامۋىن جەبەۋ، بيو عىلىم – تەحنيكاسى، كاپيتال، فينانىس، ءىرى ساندى مالىمەت سياقتىلار مەن وسى زامانعى جىلقى شارۋاشىلىعىن ىشكەرىلەي توعىستىرۋدى جەدەلدەتۋ، عىلىم – تەحنيكا قۋاتىنان پايدالانۋ، مادەنيەت – ساياحاتتى دامىتۋ، دەنەتاربيە مەن جارىستى بايلانىستىرۋ ارقىلى كوپ ارنالى، جان - جاقتى، ءار قىرىنان بولۋ تۇرعىسىنان ىلە وبلىسىنىڭ 1 -، 2 -، 3 – كاسىپتەرىنىڭ توعىسپالى دامۋىن كۇشەيتۋ جونىندە ىزدەنىس جاسادى؛جۇڭگو جىلقى قوعامى جىلقى شارۋاشىلىعى جونىندەگى ارناۋلى اڭگىمە ءماجىلىسىن وتكىزگەندە، ەكى جاق ىلە وبلىسىنىڭ جىلقى شارۋاشىلىعىن دامىتۋىن جەبەۋ، ات بايگەسى جەلىلەس جارىسى سەلبەستىگىن كۇشەيتۋ سياقتى قاتىستى ىستەردى اقىلداستى ءارى ىلە وبلىسىنداعى ۇزدىك توپتار مەن جەكەلەرگە «2020 – جىلعى جۇڭگو جىلقى مادەنيەتىن جالپىلاستىرۋ سيلىعى»، «2020 – جىلعى جۇڭگو تاڭداۋلى اتبەگى»، «2020 – جىلعى جۇڭگو جىلقى شارۋاشىلىعىنىڭ دامۋىن جەبەۋ سيلىعى» سياقتى سيلىقتاردى تاراتتى؛ ىشكى موڭعۇل جۇڭيۇن جىلقى شارۋاشىلىعى توبى مەن جۇڭيۇن جىلقى شارۋاشىلىعى بەيجيڭ باس مەكەمەسىندە تەكسەرۋ جۇرگىزگەندە، ەكى جاق ىلە وبلىسىنىڭ وسى زامانعى جىلقى شارۋاشىلىعىن باياندى دامىتۋ، ونىمدەردى زەرتتەۋ، بازار اشۋ، كاسىپ باقشاسى قۇرىلىسى سياقتىلاردى توڭىرەكتەي وتىرىپ، ىشكەرىلەي زەرتتەۋ جۇرگىزىپ، تالقى وتكىزىپ، عىلىم – تەحنيكا ناتيجەلەرىن كادەگە جاراتۋدى جەبەپ، جىلقى شارۋاشىلىعىن ىلە وبلىسىنداعى جەرگىلىكتى ەرەكشەلىككە يە حالىقتى اۋقاتتاندىراتىن كاسىپكە اينالدىرۋعا كۇش سالدى؛ جياڭسۋ نانتۇڭ ليانيا ءدارى – دارمەك شەكتى سەرىكتىگىندە تەكسەرۋ جۇرگىزۋ، ۇشتاستىرۋ بارىسىندا بۇل سەرىكتىك موڭعۇلكۇرە اۋدانىندا سەرىكتىك قۇرۋدى تىزىمگە الدىرىپ، ءىشتى بيە نەسەبىن انالىق گورموندى مانەرلەۋمەن ۇشتاستىرۋ زاۆودىن قۇرىپ، شيكىزات ءدارى – دارمەك قاجەتىن اناعۇرلىم كەڭەيتىپ، جىلقى ونىمدەرىنىڭ قوسىمشا قۇنىن جوعارىلاتۋدى جوسپارلادى.

    ەلشات تۇرسىنباي ۇلى مىنانى ءبىلدىردى: «جاقىنعى جىلداردان بەرى ىلەنىڭ ساياحات بايلىعىنىڭ ۇزدىكسىز اشىلۋىنا ىلەسە كورىنىس رايوندارىنىڭ ماڭىندا اتقا ءمىنۋ، ات ءۇستى ونەرى، حالىقتىق جىلقى مادەنيەتى سياقتى قيمىلدار ۇيىمداستىرىلىپ، ادامداردى باۋراپ، ىلە جىلقىسىنىڭ بازارى دا بىرتە - بىرتە اشىلدى. بيىل جىل باسىندا وبلىستىق پارتكوم وسى زامانعى جىلقى شارۋاشىلىعى سياقتى 3 كاسىپتى توعىستىرۋ قىزمەت دوكلادىن تىڭداپ، وسى زامانعى جىلقى شارۋاشىلىعىنىڭ جوعارى ساپالى دامۋىن بەلسەنە ىلگەرىلەتىپ، تۇتاس وبلىستىڭ وسى زامانعى جىلقى شارۋاشىلىعىنىڭ دامۋىنا تاماشا شارت - جاعداي ازىرلەدى».

    ەلشات تۇرسىنباي ۇلى: «ىلە وبلىسىندا جىلقى باعىمشىلىعىمەن شۇعىلداناتىن كاسىپورىنداردىڭ سانى 50 دەن اسقانىمەن، ءبىراق كولەمدەنۋ ونىمدىلىگىنىڭ كورنەكتى بولماۋى، ساپالى تۇقىم جەتىلدىرۋ جۇيەسىنىڭ ومىرشەڭدىك قۋاتىنىڭ كەمشىل بولۋى، ءوندىرىس ءتاسىلىنىڭ مەشەۋ بولۋى، جىلقى ونىمدەرى ماركاسىنىڭ از بولۋى سياقتى جاعدايلار وسى زامانعى جىلقى شارۋاشىلىعىنىڭ تيبىن جاڭالاپ، دارەجەسىن جوعارىلاتۋ بارىسىندا ءدوپ كەلگەن كورنەكتى ماسەلە ەسەپتەلەدى. كەلەر ساتىدا جىلقى شارۋاشىلىعىمەن شۇعىلداناتىن كاسىپورىندارعا ويداعىداي قىزمەت وتەۋ جانە ولاردى قامتاماسىزداندىرۋ؛ ات ءۇستى ونەرىنەن ويىن كورسەتۋ، بايگە سياقتى دەنەتاربيە قيمىلدارىن ورىستەتۋدى جىلقى شارۋاشىلىعىن دامىتۋداعى ماڭىزدى تىرەك ەتىپ، ىلە وبلىستىق جىلقى شارۋاشىلىعى قوعامىنىڭ رولىن تولىق ساۋلەلەندىرىپ، ات بايگەسى سياقتى جارىس تۇرلەرىن ۇدايى، جۇيەلى ورىستەتىپ، ىلە تۇلپارىن قۇيعىتىپ، ىلەنىڭ ات ونەرىنىڭ داڭقىن اسپانداتۋ؛ ولشەمدى تەحنيكانى جۇيەلىلەندىرۋ جانە جالپىلاستىرۋدى جەدەلدەتۋ؛ ولشەمدەنگەن باعىمشىلىق الاڭى نەگىزدىك قۇرىلعىسىن كەمەلدەندىرۋ؛ ولشەمدەنگەن، كولەمدەنگەن 50 جىلقى باعىمشىلىعى كاسىپتىك سەلبەستىك كووپەراتيۆىن قۇرىپ، جىلقى شارۋاشىلىعىن دامىتۋ مەن اۋىل - قىستاقتى گۇلدەندىرۋدى ءونىمدى ۇشتاستىرۋ؛ سىرتقا ۇگىتتەۋ تەبىنىن ارتتىرىپ، جىلقى مادەنيەتىنىڭ ىشكى ءمانىن بەلسەنە اشىپ، جىلقى مادەنيەتى ونىمدەرىن بەلسەنە جاراتىپ، ىلە تۇلپارىنىڭ حيكاياسىن ويداعىداي بايانداپ، تۇتاس قوعام بەلسەنە ات سالىسقان وسى زامانعى جىلقى شارۋاشىلىعىنىڭ تاماشا اۋانىن قالىپتاستىرۋ كەرەك» دەدى.