ٴتىلشىمىز حان شاشا، ەرىكتى ٴتىلشى ۋاڭ حۇڭ - ۋ

  سۋرەتتە: شارلاۋشىلار شارلاۋ قىزمەتىندە.    حان شاشا فوتوسى

  1 ـ ايدىڭ 18 ـ كۇنى تاڭەرتەڭ قۇلجا اۋدانى اۋليە اۋىلىندا فورما كيىنىپ قوي ايداعان ەكى اتتى ازامات تەمىر جول استىنداعى سۋ اعاردان ٴوتتى، تاعى بىرنەشە قورعاۋشى جۇمىسكەر تەمىر جولدىڭ بۇزىلعان تورلارىن جوندەستىرۋدە.

    «قاراشى، ولار - اتتى شارلاۋشىلار اترەتى. بۇل اتتى شارلاۋشىلار اترەتى قاراستى رايونداعى تەمىر جول اماندىعى ٴۇشىن تەمىر جول بويىندا كۇن وتكىزىپ، ات ۇستىندە قاراستى رايونداعى تەمىر جول جەلىسىن باقىلاپ، ٴار قىستاقتى ارالايدى».

 قۇلجا ۆوگزالى تەمىر جول حاۋىپسىزدىگى ساقشى بولىمشەسىنىڭ ساقشىسى ما لۇڭ تىلشىگە: «بۇل ساقشى بولىمشەسى جىڭ ـ قۇلجا ـ قورعاس تەمىر جولى جەلىسىنىڭ 144.25 كيلومەترلىك بولىگىنىڭ حاۋىپسىزدىگىنە جاۋاپتى، سۋ اعارلارى بيىك، جولى بۇراڭ، وتەتىن شارۋالار كوپ بولۋ، بىتىراندى باعىمشىلىقپەن شۇعىلدانۋ بۇل تەمىر جول بولەگىنىڭ ەرەكشەلىگى، ساقشىلاردىڭ جاياۋ نەمەسە اۆتوكولىكپەن شارلاۋى وڭاي ەمەس» دەدى. تەمىر جول بويىنداعى شارۋالاردىڭ باس اماندىعى مەن مال ـ مۇلىك حاۋىپسىزدىگىنە كەپىلدىك ەتۋ ٴۇشىن، قۇلجا ۆوگزالى تەمىر جول اماندىعى ساقشى بولىمشەسى ىلە وبلىسىنىڭ ساياسي ـ زاڭ تاراۋىمەن بەلسەنە سەلبەسىپ، بۇقارالىق ساقتانۋ، بۇقارالىق تىزگىندەۋ جانە اۋىل، قىستاق، كوشە ٴۇش دارەجەلى بىرلەسىپ ساقتانۋ اترەتىنىڭ رولىن ساۋلەلەندىرىپ، 30 ادامنان قۇرالعان اتتى شارلاۋشىلار اترەتىن قۇرىپ، تاۋلىك بويى تەمىر جول جەلىسىنە شارلاۋ جۇرگىزگەن.

    شارلاۋ اترەتىنىڭ مۇشەسى جاۋدات شوكىرات: «ٴار كۇنگى قىزمەتىمىز اتقا ٴمىنىپ، تەمىر جول قورعانىس تورلارىنىڭ اماندىعىن تەكسەرۋ، قورعانىس تورى بۇلىنسە، دەر كەزىندە جوندەۋ نەمەسە ٴبىر جاقتى ەتۋ. ويتپەگەندە قوي، سيىر سياقتى مال تۇلىكتەرى نەمەسە بالالار رەليسكە كىرىپ كەتەدى دە، ويلاماعان ىستەر تۋىلادى. سوندىقتان تەمىر جول جەلىسىنىڭ ساقتىق قىزمەتىن ۇزدىكسىز كۇشەيتۋىمىز، مىندەتتى ٴسوزسىز ورىنداۋىمىز، سالعىرتتىققا سالىنباۋىمىز كەرەك» دەدى.

    اتتى شارلاۋشىلار اترەتىنىڭ مۇشەلەرى نەگىزىنەن تەمىر جول ساقشىلارى جانە جول قورعايتىن حالىق جاساقتارىنان قۇرالعان، ولاردىڭ بارلىعى ات ٴمىنۋدىڭ شەبەرى. ٴار كۇنى اترەت مۇشەلەرى پويەز جەتۋدەن بۇرىن قىزمەتكە شىعادى.

    شارلاۋشىلار اترەتىنىڭ مۇشەسى ۇسەنجان يمام ۋگۇڭ اۋىلى موللاتوقتىجۇزى قىستاعىنداعى ارحيۆتەستىرىلىپ، كارتوچكالاندىرىلعان كەدەي وتباسى مۇشەسى، ول اتتى شارلاۋشىلار اترەتىنە كىرگەننەن كەيىن ايىنا ٴبىر مىڭ 600 يۋان ەڭبەكاقى الىپ، وتباسى تۇرمىسى بۇرىنعىعا قاراعاندا جاقسارعان.

    ٴبىر جىلدىڭ ٴتورت ماۋسىمىندا دا شارلاۋ تولاستامايدى، ەڭ جاپالىسى قىس مەزگىلى، قاسات قاردا شارلاۋ جارىم كۇنگە ۇلاسادى. شارلاۋدا قايتا ـ قايتا اتتان ٴتۇسىپ، تۇرلىشە جايتكە جولىعاسىڭ. ۇزاق ۋاقىت اتقا ءمىنۋ دە وڭاي ەمەس، بەلدى تىك ۇستاۋ كەرەك، كەيدە دەنە قىزعاندا شاپاندى شەشىپ تاستايسىڭ، ٴبىراق ەتىگىڭ قارعا تولىپ، اياقتى مۇزداتادى. قاتقان نان مەن سۋىق مينەرال سۋ - شارلاۋشىلار اترەتىندەگىلەردىڭ تۇسكى اسى. ولار جاپا تارتسا دا، قىستاق تۇرعىندارىنىڭ مال ـ مۇلىكىن قورعاپ، پويەزدىڭ حاۋىپسىز قاتىناۋىنا كەپىلدىك ەتۋدە.

    اتتى شارلاۋشىلار پويەزدىڭ حاۋىپسىز اينالىمىن قورعاپ قانا قويماي جول بويىنداعى قىستاق تۇرعىندارىنا حاۋىپسىزدىك بىلىمدەرىن ۇگىتتەۋ مىندەتىن ارقالادى. قىستاق تۇرعىنى ما جيانجۇن: «اتتى شارلاۋشىلار اترەتىنىڭ ۇزاق ۋاقىت ۇگىتتەۋى ارقىلى تەمىر جولعا قاتىستى كوپتەگەن ٴبىلىم يگەردىك. مىسالى، بالالاردىڭ تەمىر جول ماڭىندا ويناۋىنىڭ قاتەرى سياقتىلار...».

    قۇلجا ۆوگزالى تەمىر جولى اماندىعى ساقشى بولىمشەسىنىڭ ورىنباسار باستىعى گۇڭ جيحۇڭ تىلشىگە: «شارلاۋشىلار ٴار كۇنى تەمىر جولدى شارلاپ قانا قويماي، قاراستى رايونداعى تەمىر جول بولەگىنە دە ىشكەرىلەي بارىپ، سۋ اعارلارىن، تاسقىن قاتەرىن نەمەسە باسقا دا تەمىر جولدى بۇلدىرەتىن كومەسكى قاتەرلەردى تەكسەرەدى. قاراستى رايونداعى تەمىر جولدىڭ ىركىلىسسىزدىگىنە كەپىلدىك ەتەدى» دەدى.