مىڭ شيا (ٴوز ٴتىلشىمىز)

1 - ايدىڭ 23 - كۇنى، ياعني كوكتەم مەرەكەسىنىڭ 2 ـ كۇنى تاڭەرتەڭ ەرتە قۇلجا قالاسى تاسكوپىر اۋىلى باعبان قىستاعى پارتيا ياچەيكاسىنىڭ شۋجيى ما جۇن قىستاق كوميتەتىنە كەلىپ، كەزەكشىلىك ىستەپ جاتقان قىزمەتتەستەرىمەن بىرگە كەڭسەنى تازالاپ، جاڭا ٴبىر كۇندىك قىزمەتكە ساقاداي سايلاندى.

«كوكتەم مەرەكەسى كەزىندە اۋىلىنا قايتقاندار كوبەيدى، كەيبىر قىستاق تۇرعىندارى دا وسى دەمالىستان پايدالانىپ قىستاق تۇرعىندار كوميتەتىنە بارىپ نوپوسقا قوندىرۋ، بالالارىنىڭ مەكتەپ اۋىستىرۋى، جەردى كوتەرمەگە الۋ سياقتى جۇمىستارىن بىتىرەدى، سوندىقتان كوكتەم مەرەكەسى كەزىندە كەزەكشى كادرلار بوس وتىرا المايدى» دەدى ما جۇن.  ول تاعى بىلاي دەدى : قالىپتى قىزمەت ىستەۋدەن سىرت، قىستاق كادرلارى وتباسىلارىن ارالاپ احۋال ۇعىسادى.

ما جۇن ٴبىر جاعىنان جاعدايدى ٴتۇسىندىرىپ، ٴبىر جاعىنان مامىق شاپانىن كيىپ، قالام مەن ەستەلىك داپتەرىن الىپ وتباسىلارىن ارالاي باستادى، ول قىستاق تۇرعىندارىنىڭ مەرەكەلەرىن قۇتتىقتاۋمەن بىرگە، وتتان، ەلەكتردەن حاۋىپسىز پايدالانۋ، تورسىلداق اتۋ سياقتى جاقتاردا كوڭىل بولۋگە ٴتيىستى ىستەردى ۇگىتتەدى.

جۋىقتا عانا قىستاق پارتيا ياچەيكاسىنىڭ شۋجيى مىندەتىن ۇستىنە العان ما جۇن جونىنەن العاندا، بۇل ونىڭ تۇڭعىش رەت قىستاقتا قالىپ، قىستاق تۇرعىندارىمەن بىرگە كوكتەم مەرەكەسىن وتكىزۋى ەدى. وتباسىلارىن ارالاپ جاعداي ۇعىسۋ بايلانىسىمەن، ول قىستاق پارتيا ياچەيكاسىنىڭ بۇرىنعى شۋجيى ابىليكىم ابدوللانىڭ ۇيىنە ارنايى بارىپ، قارت ياچەيكا شۋجيىنان ٴتالىم الدى.

بىلتىر ىندەت كەزىندە، ما جۇن اۋىل جاعىنان باعبان قىستاعىنا جىبەرىلگەن كادر بولاتىن، ىندەتتەن ساقتانۋ - تىزگىندەۋ قىزمەتىنىڭ قىسىمى اۋىر، مىندەتى شۇعىل شەشۋشى ساتتە، ابىليكىم قىستاق كادرلارىنا كومەكتەسىپ بۇقارالىق قىزمەت ىستەپ، تالاي - تالاي قيىن ماسەلەلەردى شەشكەن - دى.

ما جۇن ساقا ياچەيكا شۋجيىنا قىستاق تۇرعىندار كوميتەتىنىڭ تاياۋ مەزگىلدەگى ٴتۇيىندى قىزمەتتەرىن، سونداي - اق بۇدان بىلايعى قىزمەت وي جەلىسىن مۇقيات باياندادى، ساقا ياچەيكا شۋجيى دا ٴوز ۇسىنىسىن بەردى.

ما جۇن قىستاق تۇرعىندار كوميتەتىنە قايتىپ كەلگەندە ٴتۇس بولدى، جۇمىس بىتىرگەلى كەلگەن قىستاق تۇرعىندارى كوبەيگەن، ەمدەۋ قامسىزداندىرۋى، قوعامدىق قامسىزداندىرۋ جۇمىستارىن بىتىرگەلى كەلگەندەر دە، جۇمىسقا ورنالاسۋ ينفورماتسياسىن تىركەۋگە الدىرۋعا كەلگەندەر دە بار.

قىستاق تۇرعىنى شاحزات نيجات كوكتەم مەرەكەسىنەن كەيىن لايىقتى قىزمەت تابۋدى ويلايدى. ما جۇن ونىڭ وقۋ تاريحىن، وتباسىنىڭ قازىرگى جاعدايىن، قىزمەت ىزدەۋ تىلەگىن بىلگەننەن كەيىن، ونىڭ جاعدايىن كومپيۋتەرگە ەگجەي - تەگجەيلى ەنگىزەدى ٴارى دەر كەزىندە ٴۇنحات قىزمەت توبىنا جىبەرىپ، قىزمەتتەستەرىنە لايىقتى قىزمەت ورنىن قاراستىرۋعا كومەكتەسۋلەرىن ايتتى.

تۇسكە دەيىنگى قاربالاس جۇمىستان كەيىن ما جۇن كومپيۋتەر ۇستەلىنىڭ الدىندا وتىرىپ اشەكەيلەۋ جوبا سۋرەتتەرىن كوردى. ول تىلشىگە كوكتەم مەرەكەسىنەن كەيىن كەڭسە ورنىن قايتا ورنالاستىراتىندىقتارىن ايتتى. بىرنەشە كۇننەن بەرى ول قولى بوساي قالسا بولعانى، اشەكەيلەۋ جوبا سۋرەتتەرىن كورىپ،  قايتا - قايتا سالىستىرىپ، كەڭسە ورنىنىڭ يقۋاتىن بارىنشا ارتتىرىپ، قىستاق تۇرعىندارىنا ٴتىپتى دە ساپالى، ٴتىپتى دە ريزا بولارلىقتاي قىزمەت وتەۋدى جۇزەگە اسىرماقشى.

ما جۇن بىلاي دەدى: «مەرەكەدە قىستاقتا قالۋ ورايىنان پايدالانىپ، وسى بىرنەشە ايداعى قىزمەتتەردى قورىتىندىلايمىن، سونداي - اق 2023 - جىلعى قىزمەتتەرگە وي جۇگىرتىپ، جوبا جاسايمىن. بيىل باعبان قىستاعىنىڭ اناعۇرلىم جاقسى باستاما اشىپ، قىزمەتتە تىڭ ساتىعا كوتەرىلۋىن ٴۇمىت ەتەمىن.