□ انار بۇلت \ شينجياڭ گازەتىنىڭ ءتىلشىسى رىن جياڭ
2 - ايدىڭ 5 - كۇنى كەشتە قۇمىل قالاسى يجوۋ رايونىندا ءتۇستى جارقىلداق ويىنى وتكىزىلدى، قالا تۇرعىندارى جابال دالاعا شىعىپ، ءتۇستى جارقىلداق تاماشالاپ، يۋانشياۋ مەرەكەسىن قۇتتىقتادى.
□ سۋرەتتى ساۋ شينجيا تۇسىرگەن
ايداعار ءبيىن، ارىستان ءبيىن بيلەپ، ياڭگى بيىنە باسىپ، اشەكەيلى شام تاماشالاپ، شام جۇمباعىن شەشتى... 2 - ايدىڭ 5 - كۇنى يۋانشياۋ مەرەكەسى، تيانشان الابىندا يۋانشياۋ مەرەكەسىن تويلاپ، باس قوسقان ادامدار باي مازمۇندى قيمىلدارمەن جاڭا جىلعا دەگەن تاماشا ءۇمىتىن ءبىلدىرىپ، تاسقىنداعان جىگەرمەن جانە نىق سەنىممەن جاڭا تۇرمىس باستادى.
اسقاقتاعان بارابان ءۇنى، ايبىندى ايداعار ءبيى، ارىستان ءبيى، سالتاناتتى ياڭگى ءبيى ... سول كۇنى كورلا قالاسىندا كۇن شۇلەن شۇعىلاسىن شاشىپ، حالىق الاڭى قايشالىسقان ادامدارعا لىق تولدى. ”المۇرتتى قالادا مەرەكە ساۋىعىن وتكىزىپ، يۋانشياۋ مەرەكەسىن تويلاۋ“ مەرەكە ساۋىعى كونسەرتى مەرەكەنىڭ رايىن تىڭ ورلەۋگە كوتەردى. 14 مالىدەن كەلگەن 39 ويىن قويۋ شارشى توبى ويناقى بارابان ۇنىنە ىلەسە شاتتانا بيگە باسىپ، وسى قالاعا كوڭىلدى، دابىرالى سالت - سانا سالتاناتىن الا كەلدى.
مەرەكە ساۋىعىن وتكىزدى، مۇز شام تاماشالادى، تاڭيۋاننان اۋىز ءتيدى... سول كۇنى ءۇرىمجى قالاسىندا 60تان استام باي مازمۇندى يۋانشياۋ مەرەكەلىك مادەنيەت - ساياحات قيمىلى وتكىزىلدى؛ سانجى حۇيزۋ اۆتونوميالى وبلىسىنىڭ ءارقايسى اۋدان، قالالارىندا مەرەكە ساۋىعى باسەكەسى، ءتۇستى جارقىلداق كەشى، اشەكەيلى شام كورمەسى، ءتۇستى جارقىلداق ويىنى سياقتىلار وتكىزىلىپ، ۇلكەندى - كىشىلى كوشەلەر شات - شادىمان مەرەيگە شومدى. قار جامىلىپ، مۇز قۇرسانعان ”جۇڭگو قار قالاسى“ التاي شاتتىققا بولەنىپ، ”قار قالاسىندا باس قوسىپ، يۋانشياۋ مەرەكەسىن تويلاۋ“ اتتى 13 - كەزەكتى يۋانشياۋ اشەكەيلى شام كورمەسى ۋبايلي· سالت - سانا كوشەسىندە دابىرالى وتكىزىلدى، دۋماندى قيمىل كوپتەگەن ساياحاتشىلاردى وزىنە باۋرادى؛ ياڭگى ءبيى، مەرەكە ساۋىعى، اشەكەيلى شام كورمەسى، باقشادا سەرۋەندەۋ، ءتۇستى جارقىلداق ويىنى... شاۋەشەك قالاسى ”قۇت قويان ساۋىتى“ اتتى ياڭگى ءبيى، مەرەكە ساۋىعى قيمىلى جۇرتتى وزىنە ايرىقشا باۋرادى؛ اقسۋ قالاسىنىڭ نەگىزگى كوشەلەرىندە تارتىمدى مەرەكە كونسەرتى قويىلىپ، 800دەن استام ادام قاتىناسقان 17 ۋاكىلدار توبى ”شاممەن نۇرلانعان جۇڭحۋا، باقىتقا بولەنگەن اقسۋ“ اتتى 2023 - جىلعى كوكتەم مەرەكەسىندىك شام كورمەسىنىڭ دۋمانىن شىرقاۋ شەگىنە جەتكىزدى.
باعراش اۋدانىندا يۋانشياۋ مەرەكەسى ءان - ءبي ساۋىق كەشى جانە مەرەكە ساۋىعى جارىسىندا بەيزاتتىق مادەني مۇرا نىساندارى ايداعار ءبيى، سىچۋان تەاترىنىڭ بەت قۇبىلتۋ ونەرى سياقتىلاردان تىس، مەرەكەگە حان، تاڭ داۋىرىندەگى كيىم - كەشەك جانە ۇلتتىق كيىم - كەشەك جارىسى ەنگىزىلىپ، ساۋۇردىڭ كونسەرتى سياقتىلارمەن توعىستى، ارتيستەر 60 − 70 جاستاعى قارتتارمەن قوسا ون نەشە جاسار ورەندەر بولدى.
تاكلاماكان قۇمدى ءشولىنىڭ وڭتۇستىك جيەگىنە ورنالاسقان حوتان ايماعىندا 30دان استام مادەنيەت - ساياحات قيمىلى وتكىزىلدى. حوتان اۋدانىندا وتكىزىلگەن مەرەكە ساۋىعى قيمىلىندا ايداعار ءبيى، ارىستان ءبيى، ياڭگى ءبيى، جەلپۋىش ءبيى، بەل بارابانى سياقتى ءداستۇرلى سالت - سانا كونسەرتى قامتىلدى. ”مەرەكە ساۋىعى كونسەرتىنە قاتىناسقانىما قاتتى قۋاندىم، مەن جەلپۋىش ءبيىن بيلەدىم، اپەكە - سىڭلىلەرىممەن بىرگە ءبىر اپتادان ارتىق جاتتىعۋ جاسادىق“! - دەدى وسى اۋداننىڭ بۇزاق اۋىلىندا تۇراتىن مەرەكە ساۋىعى توبىنىڭ مۇشەسى مۇحابات قادىر سويلەي ءجۇرىپ، قولىنداعى ءتۇستى جەلپۋىشىن سەرمەپ، -”قازىر ءار ۇلت بۇقاراسىنىڭ تۇرمىسى بارعان سايىن جاقساردى، ءبىز ءداستۇرلى مادەنيەتىمىزدى جالعاستىرا ءتۇسىپ، وسىنداي ءتاسىل ارقىلى بولاشاق تۇرمىسقا دەگەن تاماشا ارمانىمىزدى بىلدىرەمىز“.
اقسۋ قالالىق قوعام حاۋىپسىزدىگى مەكەمەسى وسى قالاداعى شينچىڭ مالىسىمەن بىرگە ”يۋانشياۋ كوڭىلدى كەشى“ قيمىلىن ورىستەتىپ، حالىق ساقشىلارى مەن تۇرعىندار بىرگە اشەكەيلى شام جاساپ، دوڭگەلەك جەلپۋىش سۋرەتىن سالىپ، يۋانشياۋ تاعامىنان ءدام تاتىپ، كوڭىلدى دە شات - شادىمان بەينەگە شومدى؛ التاي شەكارا باسقارۋ تارماق اترەتى التاي شەكارا باسقارۋ ۇلكەن اترەتى التاي تاۋى مەملەكەت مەنشىگىندەگى ورماندى باسقارۋ مەكەمەسى التاي بولىمشە مەكەمەسى سياقتى ورىندارمەن بىرلەسىپ، لاستى اۋىلى نوعايتى قىستاعىنداعى قىستاق تۇرعىندارىمەن بىرگە يۋانشياۋ مەرەكەسىن تويلادى.
نۇرلانعان اشەكەيلى شام - شىراق اراسىندا، قويۋ مەرەكەلىك لەپ ىشىندە ءار ۇلت بۇقاراسىنىڭ جۇرەكتەرى ونان ارى توعىسا ءتۇستى.