نىسان قۇرىلىسىنىڭ قاۋىرت مەزگىلىن مىقتى يگەردى

وبلىسقا توتە قاراستى ورىنداردىڭ ٴتۇيىندى نىسان قۇرىلىستارى قاۋىرت ىلگەرىلەتىلدى

ٴتىلشىمىز لي يافىڭ حابارلايدى. 8 - ايدىڭ 9 - كۇنى ٴتىلشى وبلىسقا توتە قاراستى ورىندارداعى كوپتەگەن ٴتۇيىندى نىسان قۇرىلىسى ناق مايدانىن ارالاپ تىلشىلىك ىستەۋ بارىسىندا ٴدال قازىر نىسانداردا جۇمىس جۇرگىزۋدىڭ التىن مەزگىلى ەكەنىن، قۇرىلىس جۇرگىزۋشى ورىندار ۇدايىلاندىرىلعان ىندەتتەن ساقتانۋ - تىزگىندەۋ قىزمەتىن ويداعىداي ىستەۋ شارتى استىندا قۇرىلىس قارقىنىن مىقتى يگەرىپ، ٴتۇيىندى نىسان قۇرىلىستارىن سان مەن ساپاعا كەپىلدىك ەتە وتىرىپ، ۋاعىندا ٴساتتى بىتىرۋگە قۇلشىنىپ جاتقانىن ۇعىستى.

قورعاس ەكونوميكالىق اشۋ رايونىنىڭ ىلە كاسىپ باقشاسى رايونىنداعى يمۋشين ٴسۇت ونىمدەرىن ۋنيۆەرسالدى مانەرلەۋ ٴوندىرىس جەلىسى قۇرىلىسى نىسانىنا جالپى 193 ميلليون يۋان قارجى قوسىلىپ، بيىل 3 - ايدا قۇرىلىس باستالعان، قازىرگە دەيىن ينجەنەريانىڭ %95 اينالاسىنداعى قۇرىلىسى ٴبىتىپ، ٴوندىرىس جەلىسىنىڭ قۇرىلعىلارى ارت - ارتىنان قۇرىلىس الاڭىنا ەنگىزىلىپ ورناتىلۋدا، مەجەمەن جىل سوڭىنان بۇرىن وندىرىسكە قوسىلىپ، اينالىمعا تۇسەدى ەكەن.

«بۇل ارا الدىن الا ٴبىر جاقتى ەتۋ سەحى، وسى مەزگىلدە جۇمىسشىلار ٴبىر تەكتىلەندىرۋ اسپابىن، ميكروپسىزداندىرىپ ايىرۋ اسپابىن ورناتۋدا. نىسان ٴسۇت ونىمدەرىن ۋنيۆەرسالدى وڭدەۋ سەحىن، 500 شارشى مەترلىك ٴوندىرۋ، مانەرلەۋ تۇلعالى قۇرىلىسىن، زەرتتەۋ - اشۋ عيماراتىن، لاس سۋدى ٴبىر جاقتى ەتۋ قۇرىلعىسىن، قوسىمشا قۇرىلىستى قامتيدى. نىسان قۇرىلىسى وندىرىسكە قوسىلعاننان كەيىن كۇنىنە 500 توننا شيكى ٴسۇت، 300 توننا اشىتىلعان ٴسۇت، 100 توننا زالالسىزداندىرىلعان ٴسۇت جانە 100 توننا ميكروپسىزداندىرىلعان ٴسۇت مانەرلەپ، 300 دەن استام ادامدى جۇمىس ورنىمەن قامدايدى» دەدى ىلە يمۋشين ٴسۇت كاسىبى شەكتى سەرىكتىگىنىڭ ورىنباسار باس ديرەكتورى ياڭ بيڭ.

قۇلجا قالالىق مەملەكەت مەنشىگىندەگى مال - مۇلىكتى باقىلاۋ - باسقارۋ مەكەمەسى پارتكومىنىڭ ورىنباسار شۋجيى، مەكەمە باستىعى حوۋ شينمەي بىلاي دەدى: «بۇل نىسان ىلەدە كولەمدى ٴسۇت ونىمدەرى كاسىپورنى بولماعان بوستىقتى تولتىرىپ، شارۋالاردىڭ كىرىسىن ارتتىرىپ، قۇلجا قالاسىنىڭ مال شارۋاشىلىعى كاسىبى بايلىعىن بىرىكتىرىپ، مەملەكەت مەنشىگىندەگى كاسىپورىنداردى ساپالىلاندىرۋ، الۋەتتەندىرۋ، زورايتۋدا ىلگەرىلەتۋ جانە باستاماشىلدىق ەتۋ رولىن اتقارادى ٴارى جەم - ٴشوپ ەگىمشىلىگى، ساۋىن سيىر باعىمشىلىعى، سۋىق تىزبەكتى تاسىمالداۋ، قوراپتاۋ سياقتى كاسىپتەردىڭ اقاۋسىز دامۋىنا دا تىكەلەي تۇرتكى بولادى».

جىل باسىنان بەرى وبلىستىق پارتكوم مەن ۇكىمەت نىسان قۇرىلىسىن ەكونوميكانىڭ دامۋىنداعى ماڭىزدى ٴىرى ٴىس، «1 -ٴنومىرلى ينجەنەريا» رەتىندە قاراپ، باسشىلار كوتەرمەگە الىپ بايلانىس جاساۋ، مەرزىم بويىنشا رەتتەۋ، اشىق - اشكەرە باقىلاۋ، نىسان رەسمياتىن بىرلەسىپ باقىلاپ، بىرلەسىپ بەكىتۋ، «مىڭ ادام مىڭ كاسىپورىنعا (نىسان) كومەكتەسۋ قىزمەت وتەۋىمەن دامۋدى جەبەۋ» سياقتى  جەلىلەس شارالاردى ۇزدىكسىز اتقارىپ، ٴبىر تۇتاس ورنالاستىرۋدى كۇشەيتىپ، ٴتۇيىندى نىسان قۇرىلىسىنىڭ ٴتارتىپتى ىلگەرىلەۋىن شىنايى قامتاماسىزداندىردى.

قۇلجا اۋدانى تۋراسۋ كورىنىس رايونى − مەملەكەتتىك 4A دارەجەلى كورىنىس رايونى، اۋدان قالاشىعىنان تەك 40 كيلومەتر  ارالىقتا عانا بولعاندىقتان، جىل سايىن كوپتەگەن ساياحاتشىنى باۋرايدى. كەزەكتە قۇرىلىسى قاۋىرت ٴجۇرىپ جاتقان قۇلجا اۋدانى - تۋراسۋ كورىنىس رايونى تاس جول قۇرىلىسى نىسانى (1 - مەرزىمدىك) قۇلجا اۋدانى قالاشىعىنان تۋراسۋ كورىنىس رايونىنا دەيىن جالعاسادى، بۇل - قۇلجا اۋدانى مەن تۋراسۋ كورىنىس رايونىن تۇتاستىراتىن ەڭ قولايلى جول ەسەپتەلەدى. ۇعىسۋعا قاراعاندا، بۇل نىسان قۇرىلىسىنا شامامەن 270 ميلليون يۋان قارجى قوسىلعان، جولدىڭ جالپى ۇزىندىعى 45.06 كيلومەتر، تۇتاس تۇلعالى قوس باعىتتا ەكى اۆتوموبيل قاتار جۇرە الاتىن 3 - دارەجەلى تاس جول ولشەمى بويىنشا جوبالانعان، ساعاتتىق جىلدامدىعى 30 كيلومەتر.

«كەزەكتە جولدىڭ 15 كيلومەتر بولەگىنە اسفاليت توسەپ بولدىق. كەلەر قادامدا جول بەتىن وڭدەۋ، جوندەۋ، تولقىن ٴپىشىندى قورشاۋ شارباعىن ورناتۋ، جول جاعاسىن جاسىلداندىرۋ سياقتى جۇمىستاردى جۇرگىزىپ، مەجەمەن 9 - ايدىڭ 30 - كۇنى تۇتاس لەنيا بويىنشا اۆتوكولىك قاتىناتۋدى جوسپارلاپ وتىرمىز» دەدى قۇلجا اۋدانى تۋراسۋ كورىنىس رايونى جولىنىڭ جالپى تۇلعالىق دارەجەسىن جوعارىلاتۋ قۇرىلىسى نىسانى 1 - بولەك نىسانىنىڭ باس ينجەنەرى ۋاڭ يۇڭچيان.

وبلىستىق نىسان قىزمەتى قولباسشىلىق شتابى نىساندى ىلگەرىلەتۋ جالپىلىق گرۋپپاسىنىڭ ورىنباسار باستىعى ياۋ چيڭحۋا بىلاي دەدى: «بيىل اۆتونوميالى وبلىس ٴىرى نىسانداردا فاكتورمەن قامتاماسىز ەتۋدى الدىمەن ويلاستىرىپ، قىزمەت وتەۋ كۇش - قۋاتىن الدىمەن سەپتەپ، ماسەلەنى شەشۋدى الدىمەن سايكەستىردى. قازىرگە دەيىن وبلىسقا توتە قاراستى ورىنداردا جالپى 5 ميلليون يۋاننان استام قارجى قوسىلعان ٴبىر مىڭ 35 نىساندا جۇمىس باستالىپ، ناقتى جوبالىق ينجەنەرياعا 67 ميلليارد 739 ميلليون يۋان قارجى قوسىلدى. كەلەسى قادامدا نىساندار قۇرىلىسىن جۇرگىزۋدىڭ قازىرگى ٴتيىمدى ورايىن مىقتى يگەرىپ، ۇدايىلانعان ىندەتتەن ساقتانۋ - تىزگىندەۋ قىزمەتىن ويداعىداي ىستەۋ العى شارتىندا قۇرىلىس جۇرگىزۋشى ورىننىڭ نىسان قۇرىلىسىنا ادام، ماشينا جانە قارجى جاعىنداعى قوسىلىم تەبىنىن ارتتىرۋىن قۋزاپ، ٴتۇيىندى ينجەنەريا قۇرىلىسىنىڭ اياق الىسىن كۇش سالا جەبەيمىز».