ٴتىلشىمىز ما چىڭلۋ حابارلايدى. ەگەر قالانى تىرشىلىك تۇلعاسى دەسەك، وندا قاتىناس قالانىڭ كوركەيىپ - گۇلدەنۋىنىڭ جان تامىرى، ايعاعى سانالادى. قۇلجا قالاسىنىڭ كونە قالا رايونىندا يىڭبيڭ جولىنىڭ ۇزارتىلعان بولەگى، حۋتان جولى، اۋەجاي باتىس جولى سياقتى «تۇيىق جولدار»، «قىسپاق جولدار» ىركەس - تىركەس اشىلىپ، اۆتوكولىكتەر ىركىلىسسىز ٴجۇرىپ، قاتىناس قالانىڭ سيىمدىلىعىن ارتتىرىپ، دارەجەسىن جوعارىلاتۋدىڭ «تەبىنىن» ايگىلەدى.

«تۇيىق جولداردىڭ اشىلۋى وتە جاقسى بولدى، مەيلى  قايدا بارساق تا، ەندىگارى اينالىپ جۇرمەيتىن، بۇقارانىڭ ٴجۇرىس - تۇرىسىنا قولايلى بولدى» دەدى 9 - ايدىڭ 9 - كۇنى قۇلجا قالاسى جەڭىس كوشەسى 7 - جان كوشەسىندە تۇراتىن چىن جيانشين.

چىن جيانشين القاپ وتىرعان بۇل جول يىڭبيڭ جولىنىڭ ۇزارتىلعان بولەگى اشىلعان سوڭ جولدىڭ ۇزىندىعى 360 مەترگە جەتتى. جاڭادان سالىنعان قوس باعىتتا 6 اۆتوكولىك جۇرەتىن جولدىڭ يىڭبيڭ جولىنىڭ ۇزارتىلعان بولەگى شىعىسقا قاراي كەڭەيىپ، قۇلجا قالاسىنداعى ٴىرى تولايىم ساتۋ بازارى حۋارۇي بازارىن، حۋتان سازدىق باقشاسىن قالانىڭ اكىمشىلىك ورتالىعىمەن تۇتاستىردى.

قۇلجا قالاسى جاڭا دامۋ ۇستانىمىن جاڭا كەزەكتى قالانى اشۋ قۇرىلىسىمەن ساباقتاستىردى، «ٴبىز قالا رايونىندا سۋ ىعىستىرۋ، كورىنىس، سەيىل - سەرۋەن، قالا مادەنيەتى سياقتىلاردى جول تورابى قۇرىلىسىمەن بىرگە پلاندايمىز، جوبالايمىز، قۇرامىز». قۇلجا قالالىق تۇرعىن ٴۇي جانە قالا قۇرىلىسى مەكەمەسى نىسان كەڭسەسىنىڭ مەڭگەرۋشىسى جاڭ شياۋشۇي بىلاي دەدى: «بيىل 2 - ايدا قۇرىلىس جوسپارى ورىندالىپ، 3 - ايدا بىرتىندەپ اتقارىلىپ، سۋمەن قامداۋ، سۋ ىعىستىرۋ قۇبىرى جانە كابەل جەر استىنا ورنالاستىرۋ، جول بەتىن بەتونداۋ جۇمىستارى وتە تەز جۇرگىزىلدى، توڭىرەكتەگى قورشاعان ورتانى كورىكتەندىرۋ، جاسىلداندىرۋ نەگىزىنەن ورىندالدى. جاڭالانعان 9 جولدىڭ تورتەۋى پايدالانۋعا بەرىلدى، سىچۋان جولى، 15 - باستاۋىش مەكتەپتىڭ جانىنداعى شاعىن جول، جۇڭيۋان جولىنىڭ شىعىسقا ۇزارتىلعان بولەگى سياقتى 5 <تۇيىق جولدا>، <يەلەپ الىنعان جولدا>، <قىسپاق جولدا> مەجەمەن 11 - ايدىڭ سوڭىندا جۇمىس تامامدالادى».

«سالەمەتسىزبە، مەيتۋاننان تاپسىرىس بەرگەن تاماعىڭىزدى الىپ الىڭىز»، «سالەمەتسىزبە، تەز جولداماڭىز كەلدى ...» قالا تۇرعىندارى ۇيدە وتىرىپ، تەلەفوندا تاپسىرىس بەرسە بولعانى، تەز جولداما، تاپسىرىسپەن تاماق الدىرۋ، توراپتا كىرە اۆتوكولىگىن شاقىرۋ سياقتىلاردىڭ بارلىعى دا توڭىرەكتىڭ ٴتورت بۇرىشىنا تۇتاسىپ جاتقان جول تورابىمەن ورىندالادى... بۇگىنگى ىلەنىڭ قارىشتاپ دامىعان بەينەسى. مىنە وسىنداي كورنەكتىلەندى، قالانىڭ دارەجەسىن جوعارىلاتىپ جاڭالاۋ قىزمەتىنە ساي قالانىڭ نەگىزدىك قۇرىلعىلار قۇرىلىسى بار كۇشپەن ىلگەرىلەتىلىپ، قالا كەلبەتى جاقسارىپ، ەكولوگيالىق ورتاسى قالپىنا كەلتىرىلدى.

«تۇيىق جولداردى» اشۋ قۇرىلىسى قالانىڭ جول تورابىن ىركىلىسسىزدەندىرىپ قانا قالماستان، بۇقارانىڭ ٴجۇرىس - تۇرىسىنا قولايلى بولدى ٴارى قالا ورتاسىنداعى قىستاق ۇيلەرىن شاعۋ، كوشىرىپ ورنالاستىرۋ ارقىلى دا تۇرعىنداردىڭ قونىستانۋ شارت - جاعدايى جاقسارتىلدى. قالانى اشۋ قۇرىلىسى بارىسىندا وبلىسقا توتە قاراستى ورىندار حالىقتى وزەك ەتۋ دامۋ ۇستانىمىندا تاباندى بولىپ، تۇرعىنداردى الدىمەن جوتكەپ قونىستاندىرۋ، سوڭىنان شاعۋدى دارىپتەپ، ٴۇيى شاعىلاتىن بۇقارانى ۋايىمنان ارىلتىپ، قالا ورتاسىنداعى قىستاق تۇرعىندارىنىڭ قونىستانۋ شارت - جاعدايىن ۇزدىكسىز جاقسارتتى.

9 - ايدىڭ 8 - كۇنى قالالىق 15 - باستاۋىش مەكتەپتىڭ جانىنداعى شاعىن «قىسپاق جول» نىسان قۇرىلىس ورنىندا جەر قازۋ ماشيناسى توقتاۋسىز جۇمىس جۇرگىزىپ جاتتى. ۇعىسۋىمىزشا، بۇل جولدىڭ جالپى ۇزىندىعى 390 مەتر، قوس باعىتتا 4 اۆتوكولىك جۇرەتىن ەتىپ جوسپارلانىپتى، نىسان ىسكە قوسىلعاننان كەيىن كونە قالا رايونىندا شىعىس - باتىس باعىتتاعى نەگىزگى جولدان تاعى بىرەۋى قوسىلماق.

ويلى - شۇڭقىرلى، تار شاعىن كوشەلەردەگى توپىراق جولدار تەپ - تەگىس، كەڭ اسفالت جولعا اينالدى، كونە قالا رايونىنداعى جولداردىڭ بوگەتتەرى ىركىلىسسىزدەندىرىلىپ، كورۋ اۋماعى كەڭەيدى، الەۋمەتتىك اۋماق تۇرعىندارىنىڭ قوقىر - قوقسىق، لاس سۋ ىعىستىرۋ قۇرىلعىلارى دا ىركىلىسسىزدەندىرىلدى، حالىق بۇقاراسىنىڭ تابىس سەزىمى مەن باقىت سەزىمى ۇزدىكسىز جوعارىلادى.

«قازىر جولدار نەداۋىر كەڭەيدى، اۆتوكولىك جۇرگىزگەندە قينالمايتىن بولدىق». تۇسكى ساعات 1 دە جەڭىس جولىنداعى قىزىل كوپىر قارما ٴمانتى اسحاناسىندا تاماقتانىپ وتىرعان قاريدارلار كونە قالا رايونى جول تورابىنىڭ كەمەلدەندىرىلگەنىن تىلگە تيەك ەتىستى. وسى اسحانانىڭ قوجايىنى تۇرسۇنمامەت  قيۇم اسا كوڭىلدى تۇردە بىلاي دەدى: «جول اشىلىپ، قاريدار كوبەيدى، ساۋدام ٴتىپتى دە جاندانا ٴتۇستى، تۇرمىسىمىز ٴتىپتى دە باقىتتى بولماق».