مالدى مەكەن، ءساندى مەكەن، بالدى مەكەن − نىلقى

  • كەلۋ قاينارى: ءتاڭىرتاۋ تورابى
  • 02:23:24 11/08/2014

    نىلقى اۋداندىق ورمان شارۋاشىلىعى مەكەمەسىنىڭ بۇرىنعى باستىعى اكىم باعداۋلەت ۇلى قاسيەتتى قارا ورماندى قورعاۋعا ەرتەدەن باستاپ جۇرت بولىپ جۇمىلعانىن، سونىڭ ارقاسىندا وسى ءبىر ۇلكەن وتتەگى قامباسىنىڭ ءوز تۇلعاسىنا اقاۋ تۇسىرمەي ءوسىپ كەلە جاتقانىن تىلگە تيەك ەتە بىلاي دەدى: تابيعي ورماننىڭ ەكولوگيالىق ورتانى جاقسارتۋ، سۋ - توپىراقتىڭ شايىلۋىنىڭ الدىن الۋ، ەكونوميكانىڭ دامۋىن جەبەۋ جاعىنداعى رولى زور ەكەندىگىن ەكىنىڭ ءبىرى بىلەدى، قازىرگى كۇنى بۇل ورمان نىلقىنىڭ جاسىل جاقۇتىنا اينالدى، اۋەلدەن، ورمان اۋانىڭ لاستانۋىن تەجەپ، بىزگە ءومىر ءسۇرۋدىڭ تاماشا ورتاسىن جاراتىپ بەرسە؛ ەكىنشىدەن، ىشكى ولكەلەردەن، شەتەلدەن كەلەتىن ساياحاتشىلاردى باۋراپ قازىنامىزدىڭ قورجىنىنا قارجى سالدى. اۋداندىق ۇكىمەتىمىز بۇل ارانى 1997 - جىلدان باستاپ قورعاپ كەلەدى ءارى وسى ورمانعا جيەكتەس جاتقان قاس وزەنى بويىنداعى 10 مىڭ مۋدان اساتىن تابيعي ورماندى ارنايى تەمىر تورمەن قورشاپ، تابيعاتتى قايتا قالپىنا كەلتىرۋ قىزمەتىن ويداعىداي ىستەپ جاتىر. 2004 - جىلى قازان ايىندا ۇكىمەتىمىز ورمان القابىن تۇتاستاي قورعاۋ جونىندە ۇقتىرۋ شىعارىپ، ۇلى ورمانىمىزدى مەملەكەتىمىزدىڭ «ورماندى ەكولوگيالىق وڭىرىنە» كىرگىزىپ، ءتۇيىندى قورعايتىن ورمان رەتىندە قورعاۋعا الدى. كەيىن كەلە اۋدان تابيعي ورمان قورعاۋ باس پۋنكتىن قۇرىپ، ورمان قورعاۋ قىزمەتكەرلەرىن قابىلداپ، ورماننىڭ ويداعىداي قورعالۋىنا تاماشا شارت - جاعداي ازىرلەپ، ورمان باسقارۋ قىزمەتىن كۇشەيتتى. ورمان جەتىلدىرۋ بارىسىندا بۇل اراعا مال باعۋعا، توپىراق، وتىن الۋعا تيىم سالىنىپ، ورمانعا كوز قىزارتىپ جۇرگەن تەنتەكتەرگە تۇساۋ سالدى.

    ورمان ورتاسىنداعى «سازدىق بايتەرەك كورىنىس رايونى» اۋداننىڭ ارنايى قۇرعان ساياحات رايونى بولىپ اۋدان قالاشىعىنان 5 كيلومەتر قاشىقتىقتا. سازدىق بايتەرەك كورىنىس رايونىنىڭ 1 - مەرزىمدى قۇرىلىسىنا جالپى 54 ميلليون 200 مىڭ يۋان قارجى قوسىلعان، قازىر ورمان ىشىنە 8 كيلومەتر جول توسەلىپ، ورماندى ارالاۋعا كەلگەن ساياحاتشىلار مەن جۇرگىنشىلەرگە قولايلى بولعان. سازدىق بايتەرەك كورىنىس رايونىنىڭ تابيعاتى جانعا جايلى، ماڭىنداعى قۇرىلعى قۇرىلىستارى كەمەلدى، بۇل اۋداننىڭ ەكونوميكالىق كىرىسىن ارتتىرىپ، ورمان ماڭىنداعى ەگىنشى - مالشىلاردىڭ ساياحات ارقىلى اۋقاتتانۋعا جول اشتى. نىلقى اۋداندىق ساياحات مەكەمەسى بىلتىردان باستاپ كورىنىس رايونىنىڭ جۇمىسىن قولعا العان، قازىر وسى تابيعي ورماندى قورعاۋعا 40تان استام جۇمىسشى جۇمىلدىرىلىپ وتىر. ورمان قورعاۋشى توكەن قۇرمانالى ۇلىنىڭ وسى بايتەرەك كورىنىس رايونىندا ورمان قورعاۋشى بولىپ قىزمەت اتقارعانىنا ءبىر جىل بولىپتى. ول بۇل وڭىردە ورمان قورعاۋ قىزمەتىنىڭ جاقسى ىستەلىپ وتىرعاندىعىن، باستى قىزمەتتەرى ورماندى ورتتەن ساقتاۋ ەكەندىگىن ايتتى.

جاۋاپتى رەداكتور: بەرىك وقاباي ۇلى