مالدى مەكەن، ءساندى مەكەن، بالدى مەكەن − نىلقى

  • كەلۋ قاينارى: ءتاڭىرتاۋ تورابى
  • 02:23:24 11/08/2014

    نىلقى اۋدانى رايونىمىزعا اتى تانىس بال مەكەنى، بۇل ءوڭىردى شينجياڭ قوڭىر اراسى مەكەن ەتكەن، سوناۋ 20 - عاسىردىڭ باسىندا روسسيادان ەلىمىزگە كىرگەن قوڭىر ارا ۇزاق ۋاقىتتىق تابيعي جانە جاساندى جولمەن سۇرىپتاۋ ارقىلى ىلە، التاي، تارباعاتاي وڭىرلەرىنە مولىنان تارالدى. شينجياڭ قوڭىر اراسى سۋىققا ءتوزىمدى، اۋرۋعا قارسىلىق قۋاتى كۇشتى بولاتىندىقتان ۇرپاقتى كوپ قالدىرادى. ماسەلەن، انالىق قوڭىر ارا سوتكەسىنە، كەم دەگەندە، 3000نان استام بالا ارانى ومىرگە اكەلەدى، ارانىڭ وسى ءبىر اسىل تۇقىمى بۇل كۇندە نىلقى اۋدانىنىڭ اتىن الىسقا جەتەلەپ وتىر. اسىرەسە، نىلقى اۋدانىنداعى بال فەرماسى شينجياڭ قوڭىر اراسىنىڭ وتانى ىسپەتتى. نىلقى بال فەرماسى تيانشان تاۋىنىڭ قالىڭ قاتپارلى تەرەڭ قويناۋىنا ورنالاسقان، ول شينجياڭداعى ەڭ ۇلكەن قوڭىر ارا جەتىلدىرۋ، قورعاۋ بازاسى بولىپ، «تابيعي بال قويماسى» دەيتىن ادەمى اتى بار. تاڭبالى جايلاۋىنىڭ ءبىر پۇشپاعىنا ىرگە تەپكەن بال فەرماسى 1957 - جىلى تامىزدا قۇرىلىپ، 1960 - جىلى باسقارما دارەجەلى ورىن رەتىندە ىلە قازاق اۆتونوميالى وبلىسىنا قاراسا، 1965 - جىلى نىلقى اۋدانىنا قاراستى ەتىپ بەلگىلەنگەن. قاتىستى مالىمەتتەرگە يەك سۇيەسەك تاڭبالى جايلاۋىنداعى بال قاينارلى وسىمدىكتەردىڭ سانى 260 تۇردەن اسادى ەكەن، وسىنىڭ ىشىندە سانى كوپ، تارالۋى ءبىرشاما كەڭ، پايدالانۋ قۇنى ءبىرشاما جوعارى بولعان ءدارى شوپتەردىڭ سانى 80 تۇرگە جەتە جىعىلادى. بۇل جەردە ءار جىلى ناۋرىزدىڭ ورتا شەنىنەن تارتىپ تامىزدىڭ اياعىنا دەيىن گۇلدىڭ الۋان ءتۇرى قۇلپىرا اشىلىپ، قوڭىر ارانىڭ ازىعى مول قارا قازانى عىج - عىج قاينايدى.

    قوڭىر ارا شارۋاشىلىعى بال فەرماسىنىڭ تىرەكتى كاسىپ سالاسى، سونداي - اق وزىندىك باسىمدىلىق پەن ەرەكشەلىككە يە كاسىپ سالاسى ەسەپتەلەدى. جۋىق جىلداردان بەرى نىلقى اۋداندىق پارتكوم مەن حالىق ۇكىمەتى دە قوڭىر ارا شارۋاشىلىعىنا وسكەلەڭ ءمان بەرىپ، زور كۇشپەن قولداۋ كورسەتتى. بال شارۋاشىلىعىن جان - جاقتى دامىتۋ جونىندە سىندارلى جوبا - جوسپارلار جاساپ، قوڭىر ارا شارۋاشىلىعىن نىلقى اۋدانىنىڭ وزىندىك ەرەكشەلىككە يە ابزال كاسىپ سالاسىنا اينالدىرۋعا بارىنشا كۇش سالدى.

جاۋاپتى رەداكتور: بەرىك وقاباي ۇلى