قىمىزدىڭ ادام دەنساۋلىعىنا ناقتى قانداي پايداسى بار

  • كەلۋ قاينارى: ءتاڭىرتاۋ تورابى
  • 02:27:39 06/03/2015

 

    استانا. قازاقپارات- بيە ءسۇتى ادام دەنساۋلىعىنا پايدالى دەپ جاتامىز. ءبىراق ادام ورگانيزمىنىڭ ناقتى قاي جەرىنە پايدالى. ول عىلىمي تۇرعىدا دالەلدەنگەن بە؟ بۇل سۇراققا قىمىز زەرتتەۋشى، مەديتسينا عىلىمىنىڭ دوكتورى، پروفەسسور اباي جانعابىلوۆ جاۋاپ بەرەدى: - مەن قىمىز توڭىرەگىندە كوپتەگەن ەڭبەكتەر جازدىم. ءتىپتى دوكتورلىق ديسسەرتاتسيام دا قىمىز بەن شۇباتقا ارنالعان. نەگىزى، ءسۇت ەكى توپقا بولىنەدى. ءبىرى - كازەيندىك ءسۇت بولسا، ەكىنشىسى، البۋميندى سۇتتەر توبى. ماسەلەن، قويدىڭ، ەشكىنىڭ، سيىردىڭ، تۇيەنىڭ سۇتتەرى كازەيندىك سۇتتەر توبىنا كىرەتىن بولسا، ءالبۋميندى توپقا انانىڭ ءسۇتى مەن بيەنىڭ ءسۇتى عانا كىرەدى. دەمەك، بيە ءسۇتى - انانىڭ سۇتىمەن پارا- پار دەگەن ءسوز. البۋميندى سۇتتەردىڭ كازەيندىك سۇتتەرگە قاراعاندا، قۇرامى ايرىقشا بولادى. مۇنىڭ اسقازانعا كۇش تۇسىرمەي، اس قورىتۋ جۇيەسىنە پايداسى وتە زور. قۇرت اۋرۋىنا بىردەن- ءبىر ەم. سونىمەن قاتار وكپە اۋرۋلارىن ەمدەۋدە، قان اينالۋ جۇيەسىندەگى قان تامىرلارىنىڭ جۇمساقتىعى مەن بەرىكتىگىن قامتاماسىز ەتەتىنى، قانداعى قىزىل قان تۇيىرشىكتەرىمەن (ەريتروتسيت) گەموگلوبين سينتەزىنە اسەر ەتەتىنى، اعزادا جۇرەتىن زات الماسۋ پروتسەستەرىن جاقسارتىپ، جالپى يممۋنيتەتتى كۇشەيتەتىنى انىقتالعان. بيە سۇتىندە كەزدەسەتىن اقۋىزدار، مايلار، كومىرسۋتەگىلەرى باسقا سۇتتەرگە قاراعاندا ەرەكشە بولىپ كەلەدى. بۇل بيە سۇتىندەگى عىلىمي دالەلدەنگەن قاسيەتتەردىڭ ءبىر پاراسى عانا. ال ونىڭ زەرتتەلمەگەن، اشىلماعان تۇستارى وتە كوپ. سوندىقتان قىمىزدى زەرتتەيتىن ارنايى عىلىمي- زەرتتەۋ ورتالىعىن اشۋىمىز كەرەك. قازىر گەرمانيا بۇل توڭىرەكتە كوپتەگەن جۇمىستار جاساپ جاتىر. ال ءبىز ءالى كۇنگە بيە ءسۇتىنىڭ ادام دەنساۋلىعى ءۇشىن پايداسى مول ەكەنىن زەردەلەپ، زەرتتەۋدى ءوز دەڭگەيىندە جۇرگىزە الماي كەلەمىز.

جاۋاپتى رەداكتور: بەرىك وقاباي ۇلى