تاباق تارتۋدى ۇيرەنىپ الىڭىز

  • كەلۋ قاينارى: ىلە كەشى گازەتى
  • 05:04:50 18/06/2015

      نۇرجاپار ايتمولدا ۇلى

    ۇلتىمىز مال شارۋاشىلىعىن كاسىپ ەتكەن كوشپەندى ەل. سول كوشپەندى تۇرمىس سەبەبىنەن اۋىل اراسى ات شاپتىرىم وتىراتىندىقتان، توي-تومالاق،ءنازىر-قۇزىردا ءۇي جەتىسپەي، كوگالعا، اعاشتىڭ ساياسىنا تەكەمەت جايىپ كىسى كۇتكەن. سول زاماندا ۇلكەن، كىشىگە قاراي وتىرىپ تارتىلعان تاباقتى كادەگە ايىرىپ، سۇيەك - سۇيەگى بويىنشا ءبولىپ، قوناققا تارتقان، سونىمەن قازاقتا ەت ەمەس سۇيەك جەيتىن ادەت بىرتىندەپ قالىپتاسىپ، سالت-داستۇرگە اينالعان. ۇلتىمىزدىڭ زاماننان كەلە جاتقان ۇلكەن توي، دابىرالى اس،ءنازىر-قۇزىر، قوناق شاقىرۋ، ارناۋلى ات جىبەرىپ الدىرۋ، قۇدالىق سويلەسە بارۋ، قىدىرۋ، ۇرىن بارۋ، قايىنداۋ، توركىندەۋ، تۇسەل ءتۇسۋ، اۋدارىلىپ تۇسە قالۋ سياقتىلاردىڭ جاي-جاپسارىنا بىردەن توقتالىپ جاتپاي، تاباق تارتۋدىڭ جولدارىن تانىستىرا كەتەيىن: ۇلتىمىز سالتىندا تارتقان تاباققا قاراپ، كىسىلىكتى باعامدايدى. ەگەر تاباق قوناقتاردىڭ سالاۋاتىنا، جولىنا قاراي ۇيلەسىمدى تارتىلماي اعاتتىق تۋىلسا، رەنىش بولىپ، سول ەلدىڭ ءتىپتى، ءبىر رۋدىڭ نامىسىنا دەيىن بارىپ ساياتىن جاعداي تۋىلادى. سوندىقتان ۇلتتىق سالت-ساناعا نەمقۇرايدى قاراۋعا استە بولمايدى، ەندەشە تاباق تارتۋدىڭ تۇرلەرىنە كەلسەك: تورە تاباق، باس تاباق، ورتا تاباق، اياق تاباق، سي تاباق، قوس تاباق، كۇيەۋ تاباق، كەلىن تاباق جانە سىباعا دەپ بولىنەدى.

    تورە تاباق. حاننىڭ دا قارانىڭ دا ءوزى قۇرمەتتەيتىن كىسىسى بولادى. ءبىر ۇيگە بىرنەشە جەردەن تاباق تارتۋعا تۋرا كەلگەندە، ءوزىڭىز تورە دەپ تانىعان كىسىڭىزگە قويدىڭ باسىنىڭ ماڭدايىن «قوسۋ» بەلگىسى فورماسىندا ءتىلىپ قاسقالاپ، قاسىنا جامباس، ورتان جىلىك، كارى جىلىك، بەلدەمە، ارقا، سۇبە قوسىپ سيراقتان بىرەۋىن، قارىننان ءبىر كەسىپ سالىپ تاقيا قارىن، توق ىشەك، جۇرەكتەن ءبىر كەسىپ جانە بۇيرەكتەن بىرەۋى قوسىلادى. ءسويتىپ مالدىڭ ءارقايسى مۇشەلەرىنەن تەگىس قوسىپ جاسالادى.

جاۋاپتى رەداكتور: بەرىك وقاباي ۇلى