شۇباتتىڭ ەمدىك قاسيەتتەرى

  • كەلۋ قاينارى: ءتاڭىرتاۋ تورابى
  • 09:30:29 19/11/2015

    تۇيە ءسۇتى ەمدىك قاسيەتى جاعىنان اسا جوعارى باعالانادى. سەبەبى تۇيە ءسۇتى قۇرامىندا ماي، اقۋىز، مينەرالدىق زاتتار وتە كوپ.

    ونىڭ قۇرامىنداعى جەكە كومپونەنتتەر وزگەرمەلى بولىپ كەلەدى، ياعني تۇيەنىڭ ساۋىلۋ كەزەڭىنە، جىل مەزگىلدەرىنە، جاقسى قورەكتەندىرىلۋىنە، ءتۇر جانە تۇقىمدىق ەرەكشەلىكتەرىنە قاراي ۇنەمى وزگەرىپ وتىرادى. ماماندار شۇباتتا اقۋىزدىڭ بىرنەشە ءتۇرى (كازەين، البۋمين) جانە قۇرامىندا ازوتى بار قوسىلىستار مەن امين قىشقىلدار كەزدەسەدى دەيدى.

    داڭقتى بابامىز ءابۋ ءالي يبن سينا: «ادام اعزاسىنا پايدالى شوپتەردىڭ دەنى قۇمدا وسەدى»، - دەگەن ەكەن. ال تۇيە جانۋارى ۇنەمى قۇمدا، سورتاڭ جەردە جۇرگەندىكتەن تۇلا بويى ەمدىك قاسيەتكە تۇنىپ تۇرادى.

    سايكەسىنشە، شۇباتتا مي مەن جۇيكە جۇيەسىنە پايدالى قانت لاكتوزاسى، ديابەت، ىسىك اللەرگياسى، باۋىر قابىنۋى مەن پسوريوزعا قارسى دەنەنىڭ يممۋنيتەتىن ارتتىراتىن انتيتەلالار بار.

    تۇيە ءسۇتىنىڭ ەمدىك قاسيەتى مول بولعاندىقتان، حالىق ەمشىلەرى جانۋار سۇتىنە شومىلدىرىپ، قان-تامىر، جەل-قۇز اۋرۋلارىن ەمدەگەن. اعزانى جاسارتۋ ماقساتىندا ىشكەن. شۇباتتىڭ قۇرامىندا كالتسي، مىس، تەمىر، ماگنەزي، مىرىش سەكىلدى ميكروەلەمەنتتەر جانە فوسفور مەن كۇكىرت بار.

    قۇرامى وسىنداي ماكرو جانە ميكرو ەلەمەنتتەرگە باي شۇباتتى قازاقتىڭ حالىق ەمىندە وكپە، اسقازان اۋرۋلارى، قارقۇلاق، مەشەل اۋرۋلارىمەن قوسا سوزىلمالى ءتۇرلى دەرتتەردەن السىرەگەن اعزانى قايتا قالپىنا كەلتىرۋ ءۇشىن قولدانعان جانە اعزا ۋلانعاندا دا ەمگە پايدالانعان. اسىرەسە، شۇبات ءتۇرلى وكپە دەرتىنىڭ بارلىق تۇرىنە شيپا.

    ەل اراسىندا شۇباتتى قىمىران دەپ تە اتايدى. شۇبات - ول جاڭا ساۋىلعان ساۋمال دەۋشىلەر دە بار. ال كەيبىرى قىمىراندى اشىتىلىپ، باپتالعان ءتۇرى دەيدى. ءسىز شۇباتتىڭ مۇنداي اتاۋلارىن ەستىپ كورىپ پە ەدىڭىز؟

(قازاقپارات اگەنتتىگى)

جاۋاپتى رەداكتور: بەرىك وقاباي ۇلى