سۋجۇقپاستىڭ سىرى

  • كەلۋ قاينارى: ىلە گازەتى
  • 09:17:00 31/08/2016

  (سىقاق اڭگىمە)

    نۇرسەرىك ءبيقاسىم ۇلى

 

    سۋجۇقپاس قالالىق وقۋ–اعارتۋ مەكەمەسىنىڭ باستىعى بولىپتى دەگەندى ەستىپ تاڭىرقاعانىمنان جاعامدى ۇستادىم، سۋجۇقپاس وسىدان جيىرما جىل بۇرىن مەنىڭ ورتا مەكتەپتەگى مۇعالىمىم، باستاۋىش دەڭگەيىندە ءبىلىمى بار قاراپايىم وقىتۋشى بولاتىن. ون جىلداي وقىتۋشى بولىپ ىستەپ، كەيىنگى مەزگىلى ول وقۋشىلارعا ساباق بەرۋگە جاراماي، مەكتەپتىڭ پار قازان جۇمىسشىسى بولىپ ىستەپ جاتىر دەگەندى سەنىمدى ءبىر دوسىمنان ەستىپ ەدىم.

    _ سۋجۇقپاسقا سونشا شۇقشيعانىڭ قالاي؟ ونىمەن قالاي دا باس ارازدىعىڭ بار پالەسىڭ–اۋ تەگى،–دەپ اڭتارىلاتىندارىڭىز بەلگىلى. شىنىن ايتار بولسام، ەكەۋ ارا ەشقانداي جەكەلىك ارازدىق بولىپ كورگەن جوق. اڭگىمە سۋ جۇقپاستىڭ قولىندا شەنى بارلاردى جاعالاپ، سولاردىڭ مايلىق–سۋلىعى بولىپ، جاتپاي–تۇرماي، سولار ءۇشىن قان جىلىك بولىپ، بۇگىنگى كۇنگە جەتكەندە ءمانساپ بيىگىنەن كورىنگەن جىلپوستىعى بولدى. ءسوزىمدى كوپ سوزباي ءوزىم بىلەتىن سۋ جۇقپاستىڭ ءبىر اڭگىمەسىن ايتايىن. بۇعان دا بيىل جيىرما جىلدىڭ ءجۇزى بولىپتى.

    سول جىلى اۋىلدان وبلىس ورتالىعىنداعى ماڭدايعا باسار ءبىلىم وردالارىنىڭ بىرىنە وقۋشى بولىپ قابىلدانعانىما قاتتى قۋانعان اتا–انام جارلى بولعانىمىزعا قاراماستان ءبىر مالىن ايتىپ سويىپ، اۋىلداعى اقساقالداردان باتا الىپ، وقۋعا اتتاندىرىپ سالعان. وسىلايشا قۇمىرىسقانىڭ يلەۋىندەي قۇجىناعان قالا تۇرعىندارىنىڭ ءبىرى بولىپ شىعا كەلدىم دە، از كۇندە–اق جاڭا تۇرمىسىما ۇيرەنىپ ۇلگىردىم. قالا مادەنيەت پەن ونەردىڭ ورتالىعى ەمەس پە؟ مۇنداعى ناعىز ءبىلىمدى ونەر يەلەرىنىڭ ءتالىمىن الۋ قانداي باقىت، دەسە دە مەنى تاڭعالدىرعانى وسىنداي ۇلكەن وقۋ ورداسىنان دا تاياز ءبىلىمدى وقىتۋشىلاردى كەزدەستىرگەنىم بولدى. بىزگە ادەبيەتتەن ساباق بەرەتىن سۋ جۇقپاس انە سولاردىڭ ءبىرى ەكەن، اۋەلدە تاعدىر بەس ساۋساقتى تەڭ جاراتپاعان عوي، ءبىزدىڭ اۋىلدا شاڭ قاۋىپ جۇرگەن ءادىل مۇعالىمدى بۇنىڭ قاسىندا دارداي ءبىلىمى بار اكادەميك دەپ قالعاندايسىڭ.

    سۋجۇقپاس سول حالىنە قاراماي، اسقان شامكوس جانە كىنامشىل جان بولىپ كەزدەستى. ول تەك ادەبيەتتەن عانا ەمەس ادەبيەتپەن بىتە قايناسقان گەوگرافيا، تاريح سىندى پاندەردەن دە ساۋاتى دا شامالى ەكەن، دۇنيەگە تانىمال جازۋشىلاردىڭ شىعارمارلارىن وقىماق تۇگىلى، قايسى مەملەكەت، قاي داۋىردە جاساعانىن دا بىلە بەرمەيدى.

    كلاسىمىزدا قايسار دەيتىن سوتقار بالا بولۋشى ەدى، كوزى ءالسىز كورەتىندىكتەن الدىڭعى پارتادا وتىراتىن، سۋجۇقپاستىڭ ساباق وتكەندە كونىسبەكتەن ايىرىلا المايتىنىن بىلەتىن ول ءبىر جولى مۇعالىمنىڭ دوسكاعا ساباق تاقىرىبىن جازىپ ابىگەر بولىپ جاتقان ورايدا الگى قىمباتتى كونىسبەگىن تىعىپ الىپتى. ونىڭ ۇستىنە سول جولى مەكتەپتىڭ باسشىلارى اشىق ساباق تىڭداۋعا كلاسىمىزعا كەلگەن تۇسى ەدى.

    سول كۇنگى ساباق شەكسپيردىڭ «ۆەنەتسيا ساۋداگەرى» دەيتىن دراماسى بولاتىن. جاڭا ساباق وتەمىن دەپ ايتىپ العاسىن قالايدا ءوتۋ كەرەك قوي. سۋجۇقپاستىڭ سول جولعى قينالىپ وتكەن ساباعىنان نە ۇققانىمىزدى ايتا المايمىن. ونىڭ شەكسپيردىڭ تاۋەلدى مەملەكەتىن اتاي الماي ەۆروپالىق جازۋشى دەپ اتاپ، ونى دوسكاعا جازعاندا «روپا» دەپ جازعانىن، ونى بىردە 16–عاسىردا دەسە، بىردە 18–عاسىردا جاساعان مىقتى جازۋشى دەپ، بىردە رومانتيزمدىك باعىتتى ۇستانعان جازۋشى دەسە، بىردە شىنشىل رەاليستىك جازۋشى دەپ شاتاسقانىن ايتسام جەتەرلىك.

جاۋاپتى رەداكتور: جازيرا بولاتباي قىزى