اقىل – جاننىڭ سيى، اسەمدىك – ءتاننىڭ سيى

  • كەلۋ قاينارى: ىلە كەشى گازەتى
  • 09:46:00 10/03/2017

      ( ءۇرىمجى قالالىق « ناز » سۇلۋلىق سالونىنىڭ ديرەكتورى مادەنيەت ۇسەن قىزىمەن سۇحبات )

    سۇحپاتتاسقان: ەرسىنالى سۇلتان ۇلى

 

    ءتىلشى: «سۇلۋلىق» ءتاننىڭ دە، جاننىڭ دا قاجەتى، «سۇلۋلىقتىڭ» كەرەمەتىن جاساۋ قيىننىڭ قيىنى، وسىنداي قيىن ءىستى ىستەۋ تالعامىنا قالاي كەلدىڭىزٸ؟

    مادەنيەت: «سۇلۋلىق» جونىندەگى ۇعىم ماعان سوناۋ بالا كەزىمدە – اق ەرەكشە اسەر ەتىپ، تولعاندىرعان-دى، اتا – اپالارىمىزدىڭ اۋزىنان ەستىگەن اڭىزدار مەن ەرتەگىلەردە حور قىزدارى مەن پەرى قىزدار ەرەكشە سۇلۋ بولادى دەپ ايتىلاتىن -دى. ەندى ويلاپ كورسەم، سول كەزدەگى اپالارىمىز بەن اتالارىمىز سۇلۋلىقتىڭ قاسيەتىن سول ەرتەگى ارقىلى بويىمىزعا ءسىڭىرىپ ۇلگىرىپتى. كەيىن ەسەيە كەلە سۇلۋلىققا دەگەن قۇمارلىعىمنان بولسا كەرەك، سۇلۋلىق بىلىمدەرى جونىندە ىزدەندىم. 2000- جىلدىڭ باسىندا ءبىر ورايلى ءسات مەنى ا ق ش – نىڭ «امۋاي» اجارلاندىرۋ كاسىبىمەن، قورەكتىك ازىقتىقتارىمەن تانىستىردى. وسى بارىستا كوپتەپ ءبىلىم ۇيرەندىم. تالاي – تالاي قالالارعا باردىم، كوپ نارسەنى سەزىندىم، ءبىلدىم. قوعامدىق ورتامىز جونىنەن الىپ ايتقاندا، 2000 – جىلدارى ادامداردىڭ ادەمىلىككە تالپىنۋى جوقتىڭ قاسى ەدى. ويتكەنى، سول كەزدىڭ وزىندە ادامداردىڭ تۇتىنۋ ورەسى تىم شىركىن -اي ەمەس -تى، قازىر ادامداردىڭ تۇتىنۋ ورەسىنىڭ جوعارىلاۋىنا بايلانىستى، ايەلدەر قاۋىمىنىڭ سۇلۋلىققا ىڭكارلىعى دا كۇشەيە ءتۇستى، تەك، بەت الپەتتى اسەمدەۋ عانا ەمەس، دەننىڭ ساۋ بولۋى ادامنىڭ بۇكىل دەنە كەلبەتىنىڭ اسەم بولۋىنا اسەرىن تيگىزەتىندىگىن تانىپ جەتتى. 2007- جىلى حالىقارالىق «اللەنتا» ومىراۋ راگىنان ساقتانۋ ۇيىمىنا مۇشە بولىپ، ايەلدەرگە ومىراۋ راگىتان ساقتانۋ جونىندە كەڭەس بەرۋ، اۋرۋدى تەجەۋ پروگرامماسىن جۇرگىزۋ مىندەتىن ۇستىمە الدىم، ايەلدەردىڭ سۇلۋلىق جونىندەگى تالابىن قاناعاتتاندىرۋ ءۇشىن، « ناز » سۇلۋلىق سالونىن اشىپ، جەلەكتىلەر ءۇشىن قىزمەت وتەگەنىمە 15 جىل بولدى.

    ءتىلشى: سۇلۋلىققا قىزمەت وتەۋ مەن وسى كاسىپكە قىزىعاتىنداردى تاربيەلەۋدە نەلەرگە كوڭىل ءبولۋ كەرەك؟

    مادەنيەت: وسى كاسىپتى ىستەۋ ءۇشىن، ەڭ الدىمەن ىنتا بولۋى شارت دەپ ويلايمىن. سالون اشۋ دەگەنىمىز، تەك، ەلدىڭ بەتىن ۋقالاۋ مەن تەرىنى اعارتاتىن بەت مايدى جاعۋ، اجارلاندىرۋ ونىمدەرىن ساتۋمەن شەكتەلسە، وندا، مۇنداي قىزمەت وتەۋدىڭ عۇمىرى ۇزاققا بارمايدى. سوندىقتان، بىزدە ەڭ الدىمەن اجارلاندىرۋ، اسەمدىك جونىندە مول ءبىلىم بولۋى كەرەك. قازىر كەيبىر ايەلدەردە ومىراۋ راگى سياقتى قاتەرلى اۋرۋلار بەلەڭ بەرۋدە، ولارعا وسىنداي اۋرۋلاردىڭ كەلۋ قاينارىن، نەدەن بولاتىندىعىن ۇعىندىرۋ كەرەك. ادامدا جانىنا باتقان اۋرۋى بولسا، ونىڭ تەرىسى قالايشا ادەمى بولسىن. سۇلۋلىق سالونى - «سۇلۋلىق» الەمىن ادامنىڭ جان دۇنيەسى ارقىلى تۇسىندىرەتىن ورتا. قىسقاسى، سۇلۋلىققا ىنتىققان ايەلدەردى شيپاحاناعا بارۋدان توسىپ، كوڭىل - كۇي، دەنە جاقتان اقاۋسىزداندىرىپ، ولارعا سۇلۋلىقتان شاتتىق باعىشتاپ، ءتان سۇلۋلىعى مەن جان سۋلۋلىعىنا ۇمتىلۋ ارمانىن جۇزەگە اسىراتىن ورىن دەپ تۇسىنسەك ەڭ ورىندى. بۇل سىرتقى كەلبەتتى عانا ەمەس، ىشكى رۋحاني جان دۇنيەنى دە اسەمدەۋگە قاراتىلادى. مىسالعا الىپ ايتار بولساق، ءوزىن كۇتىمدەۋگە شەبەر ايەلدەردىڭ تۇرمىسقا، ومىرگە سەنىمى ەرەكشە كۇشتى بولادى. ەندى ءبىر جاعىنان جانى دا، ءتانى دە راحاتتا جۇرەدى.

جاۋاپتى رەداكتور: جازيرا بولاتباي قىزى