فەلياتوندار

  • كەلۋ قاينارى: ىلە كەشى گازەتى
  • 10:55:46 10/03/2017

    بىركەن جانۇزاق ۇلى

 

      قابات ءۇيدىڭ قىزىعى

 

    قۇرداسباي ەكەۋىمىز ءبىر اۋماقتا بىرگە وسكەن قۇرداسپىز دەسەك تە، «تاتقانىمىز ءبىر، تاعدىرىمىز بولەك»بولىپ، ەسەيە كەلە ەكى كاسىپتىڭ يەسى بولدىق. ول ءبىر ءومىر جەردىڭ سونىسىن، سۋدىڭ تۇنىعىن قۋالاپ، تازا اۋا، جاسىل ورتادا مالشىلىقپەن شۇعىلداندى دا، مەن باسىندا مەكەمەنىڭ اتىن قاراپ، ارباسىن ايدايتىن جۇمىسشى، كەيىن قاقپا قارايتىن كۇزەتشى بولىپ، قالاشقتان اتتاپ الىسقا بارا المادىم. دەمەك، مەنىڭ ولشەمدى ەڭبەكاقىم «ولشەپ جەپ، ۇنەمدەپ تاماپ ءىشىپ» دەگەندەي قوڭىرقالتا تۇرمىستان ارى اسا المادى. قۇرداسباي قۇرداسىم بولسا اۋزىن اشسا كومەكەيى كورىنەتىن اق كوڭىل، قولىنداعىسىن ايامايتىن جومارت بولاتىن ءارى كۇندىز – ءتۇنى ءبىر تىنبايتىن بەينەتقور ادام ەدى دە، قورالى قويدان، تابىندى سيىردان، ءۇيىرلى جىلقىدان قول ۇزبەي، جەگەنى الدىندا، جەمەگەنى ارتىندا بولدى. ءوزى مالشى بولعانمەن قىمبات باعالى كيىم كيىپ، گالستۋگىن تاعىپ، رەتتى جۇرەتىن مىرزا كۇيىندە ءومىر وتكىزدى. تۇرمىستىڭ تاپشىلىعىن تارتقان پەندە ەمەس. ەكى ۇل، ءبىر قىزى دا ەرەكشە زەرەك بولعاندىقتان، جوعارى مەكتەپتەردى ۇزدىك ءبىتىرىپ، ۇلكەن قالالاردا قالىپ قويعان جايى بار. قۇرداسباي قوناقۋار جان ەدى. تۋىس – تۋعان، قۇدا – جۇرات، ناعاشى – جيەن توپتاسىپ، جايلاۋدا شاعىن ساناتوريا ورىندارىن قۇرىپ تۇرۋشى ەدىك تە، قىس قىستاۋدا سوعىمنىڭ الۋان تۇرىنەن اۋىز دا ءتيۋشى ەدىك، ەپتەپ ىشەرلىك الدامالى سۋسىن بىزدەن بولسا دا، باسقا ءىشىپ-جەيتىن ەت، قاتىق، ىرىمشىك، قۇرت، بال، باۋىرساق، ايران-قىمىز تۇگەل قۇرداسبايدان بولۋشى ەدى، شىركىن! الايدا، اللا پەندەسىن ۇزدىكسىز جارىلقاپ تۇرمايتىن بولسا كەرەك، وسىنداي ەركىن ءومىردى جاساپ جاتقان قۇرداسبايدىڭ 30 نەشە جىل بىرگە جاساپ، بەرەكەسىن كىرگىزىپ وتىرعان جان جارى اياق استىنان جۇرەك اۋرۋى سالدارىنان ءبىر اۋىز جاۋاپقا دا كەلمەي دۇنيە سالىپ، قۇرداسبايدى اياق استىنان اۋىر قايعىعا باتىردى. امال نەشىك، شۋلاسىپ-شۇرقىراسىپ ءجۇرىپ جەرلەپ، ارت – ارتىنان جىل ۋاعىنا دەيىن جۇرتتىڭ كومەگىندە سوڭعى جۇمىستارىن جونەلتكەن كۇندە دە، ەندى وتباسى قۇرداسبايدىڭ جالعىز وزىنە قالماسىنا شارا جوق بولدى. ونىڭ ۇستىنە وتىرىقتانۋ ۇرانى تاعى كوتەرىلدى، سونىمەن، قۇرداسباي بار مالدى ساتىپ، قالعانىن باسقالارعا قوسىپ قالتالى بايعا اينالىپ قالاعا تارتتى. ءوزى اقشالى مىرزاعا كىم قىزىقپايدى، ءار جاقتان وزدىگىنەن ءسوز سالعاندار كوبەيە باستادى. ارينە، جالعىز تۇرمىس وتكىزۋدىڭ قيىندىعى باتا باستاعاندىقتان، جابىلا ءجۇرىپ، تۇرعىندار كوميتەتىندە ىستەيتىن، كۇيەۋى قايتىس بولعان ءبىر جاس كەلىنشەكتىڭ ءساتىن كەلتىردىك. كەلىنشەكتىڭ تالابى ءبىر جەڭىل ماشينا جانە قابات ءۇي بولدى. بۇل سالىق قۇرداسباي ءۇشىن تۇككە تۇرعان جوق، ۇيتكەنى ونىڭ دا وسى ەكەۋىن الدىمەن الۋ ويى بار بولاتىن.

جاۋاپتى رەداكتور: جازيرا بولاتباي قىزى