ناۋرىزدىڭ 15 - كۇنىنەن باستاپ توردان ساتىپ الىنعان زاتتاردى 7 كۇن ىشىندە سەبەپسىز قايتارۋعا بولادى

  • كەلۋ قاينارى: ىلە كەشى حابارى
  • 09:22:21 23/03/2017

    شينحۋا اگەنتتىگى، بەيجيڭ، ناۋرىزدىڭ 15-كۇنى. ءتىلشىنىڭ مەملەكەتتىك ونەركاسىپ - ساۋدانى اكىمشىلىك جاقتان باسقارۋ باس مەكەمەسىنەن ۇعىسۋىنشا، «توردان ساتىپ الىنعان زاتتاردى 7 كۇن ىشىندە سەبەپسىز قايتارۋ جونىندەگى ۋاقىتتىق شارا» ناۋرىزدىڭ 15-كۇنى رەسمي اتقارىلىپ، بۇقارانىڭ توردان زات ساتىپ الۋداعى زاڭدى ۇقىق-مۇددەسى ءتىپتى دە قامتاماسىزداندىرىلاتىن بولعان.

    بيىل قاڭتاردىڭ 6-كۇنى مەملەكەتتىك ونەركاسىپ - ساۋدانى اكىمشىلىك جاقتان باسقارۋ باس مەكەمەسى «توردان ساتىپ الىنعان زاتتى 7 كۇن ىشىندە سەبەپسىز قايتارۋ جونىندەگى ۋاقىتتىق شارانى» جاريالاپ، «تۇتىنۋشىلاردىڭ ۇقىق-مۇددەسىن قورعاۋ زاڭىن» نەگىزگى ولشەم ەتە وتىرىپ، توردان ساتىپ الىنعان زاتتى 7 كۇن ىشىندە سەبەپسىز قايتارۋ شاراسىن اتقارىپ، تۇتىنۋشىلاردىڭ زاڭدى ۇقىق-مۇددەسىن قورعاۋدى ۇيعاردى. بۇل شارا ناۋرىزدىڭ 15-كۇنىنەن باستاپ رەسمي كۇشكە يە بولادى. بەلگىلەمەگە ساي، توردا زات ساتۋشىلار زاڭ بويىنشا ساتىپ الىنعان زاتتى 7 كۇن ىشىندە سەبەپسىز قايتارۋ بورىشىن شارتسىز اتقارۋى، تورداعى ساۋدا تەكشەسىمەن قامداۋشىلار تەكشەدەگى توردا زات ساتۋشىلاردى ساتىپ الىنعان زاتتى 7 كۇن ىشىندە سەبەپسىز قايتارۋ بورىشىن اتقارۋعا جەتەكشىلىك ەتىپ ءارى قۋزاپ، دەر كەزىندە باقىلاۋ، تەكسەرۋ جۇرگىزۋى جانە بۇل جۇمىستىڭ ءساتتى جۇرگىزىلۋىن تەحنيكالىق جاقتان قامتاماسىزدندىرۋى كەرەك.

    تىلگە تيەك ەتۋگە تاتيتىنى، «شارادا» ەرەكشە بەلگىلەمە فورماسىندا توردا زات ساتۋشىلاردىڭ زات ساتۋدا ءسوزسىز اتقارىلاتىن جۇمىس ءتارتىبىنىڭ كورنەكتى ورنىنا تۇراقتاندىرۋ بەلگىسىن قويىپ، تۇتىنۋشىلاردىڭ ءبىر رەتكى زات ساتىپ الۋدا نەگىز ەتۋىنە قولايلىلىق جاراتۋى، ەگەر تۇراقتاندىرۋ بەلگىسىن قويماعان بولسا، توردا زات ساتۋشىلاردىڭ زات الۋشىلاردىڭ زاتتى 7 كۇن ىشىندە سەبەپسىز قايتارۋ تالابىن تويتارماۋى، سونىمەن بىرگە تەحنيكالىق ءتاسىل نەمەسە باسقادا شارالار ارقىلى 7 كۇن ىشىندە سەبەپسىز زات قايتارۋ شارتىنا ۇيلەسپەيتىن زاتتارعا انىق تۇسىندىرمە جاساۋى ايقىن بەلگىلەنگەن. «شارادا» تاعى تومەندەگىدەي ءۇش ءتۇرلى زاتتى ساتىپ العاندا تۇتىنۋشىلاردىڭ مۇنداي زاتتاردىڭ 7 كۇن ىشىندە سەبەپسىز قايتارىلاتىن زات جونىندەگى ولشەمگە تولمايتىنىن انىق ءبىلۋى ايىرىقشا ەسكەرتىلگەن:ءبىرىنشى، قورابى اشىلعاننان كەيىن ادام ءومىرىنىڭ حاۋىپسىزدىگىنە نەمەسە دەنساۋلىعىنا بەلگىلى ىقپال جاسايتىن زاتتار ءارى قورابى اشىلعاننان كەيىن زات ساپاسىندا كورنەكتى وزگەرىس بولاتىن زاتتار. ەكىنشى، ىستەتكەن نەمەسە سىناق رەتىندە ىستەتكەن سوڭ قۇنى كورنەكتى دارەجەدە تومەندەيتىن زاتتار. ءۇشىنشى، ساتىلعان كەزدە ساقتالۋ مەرزىمى تولۋعا تاياعان زاتتار مەن بولماشى كەمىستىگى بار زاتتار. «شارادا» تاعى تاۋاردىڭ اقاۋسىزدىق ولشەمى، زات قايتارۋ ءتارتىبى، قاتىستى زاڭدىق جاۋاپكەرشىلىك سياقتىلار ايقىن ەسكەرتىلگەن.

جاۋاپتى رەداكتور: جازيرا بولاتباي قىزى