لي كىچياڭ اۆستراليانىڭ زۇڭليى تۋرىنبۋلمەن كەڭەس وتكىزدى

  • كەلۋ قاينارى: ىلە گازەتى
  • 06:25:54 25/03/2017

    مەملەكەتتىك كەڭەستىڭ زۇڭليى لي كىچياڭ جەرگىلىكتى ۋاقىت ناۋرىزدىڭ 23 – كۇنى تۇستەن بۇرىن كانبەراداعى پارلامەنت سارايىندا اۆستراليانىڭ زۇڭليى تۋرىنبۋلمەن كەڭەس وتكىزدى.

    لي كىچياڭ مىنانى ءبىلدىردى: ديپلوماتيالىق قاتىناس ورناتقان 45 جىلدان بەرى، جۇڭگو مەن اۆستراليانىڭ دوستىعى كۇننەن كۇنگە تەرەڭدەپ، ءارقايسى سالاداعى ىنتىماقتاستىق ۇزدىكسىز العا قاراي دامىدى. جۇڭگو اۆستراليامەن ءوزارا تەپە – تەڭ مامىلە جاساۋ پرينسيبى نەگىزىندە ءبىر – ءبىرىنىڭ وزەكتى مۇددەلەرى مەن نازار اۋدارىپ وتىرعان ماڭىزدى تۇيىندەرىنە قۇرمەت ەتىپ، ساياسي ءوزارا سەنىمدىلىكتى بەكەمدەپ، ستراتەگيالىق اۋىس – كۇيىستى كۇشەيتىپ، ناقتى سەلبەستىكتىڭ ساپاسىن ارتتىرىپ، دارەجەسىن جوعارىلاتىپ، جۇڭگو – اۆستراليا قاتىناسىنىڭ باياندى، اقاۋسىز، ورنىقتى دامۋىنا شىنايى كەپىلدىك ەتۋگە پەيىل.

    لي كىچياڭ بىلاي دەپ اتاپ كورسەتتى: كەزەكتەگى حالىقارالىق جاعداي كۇردەلى دە قۇبىلمالى، قورعانىمپازدىق سىڭايى باس كوتەرىپ، جەر شارىندىق سيپاتتى سايىستار كوبەيە تۇسۋدە. جۇڭگو اۆستراليا سياقتى ەلدەرمەن ءبىر جولدا بولىپ، ازيا – تىنىق مۇحيت رايونىنىڭ، ءتىپتى دۇنيە ءجۇزىنىڭ بەيبىتشىلىگى مەن ورنىقتىلىعىن قول ۇستاسا قورعاۋعا پەيىل. جۇڭگو سىرتقا ەسىك اشۋ اياسىن ۇزدىكسىز ارتتىرادى ءارى اۆستراليامەن بىرلىكتە قۇلشىنىپ، ەكى جاقتى ەكونوميكا – ساۋدا قاتىناسىن بارىنشا دامىتۋدى جەبەيدى، ءىس جۇزىندىك ارەكەتى ارقىلى ساۋدا ىستەرىنە قارجى قوسۋدى ەركىندەستىرۋدى، قولايلىلاندىرۋدى جەبەپ، قازىرگى جەر شارىندىق ساۋدا جۇيەسىن قورعاۋ بەلسەندى سيگنالىن تاراتىپ، الەم ەكونوميكاسىنىڭ دامۋىنا باياندى قوزعاۋشى كۇش باعىشتاپ، ورنىقتى دامۋعا سەرپىن بەرەدى.

    تۋرىنبۋل مىنانى ءبىلدىردى: اۆستراليا – جۇڭگونىڭ قارىم – قاتىناسى، ىنتىماقتاستىعى ۇزدىكسىز تەرەڭدەپ، جوعارى جىكتەگىلەردىڭ بارىس – كەلىسى مەن اۋىس – كۇيىسى جيىلەي ءتۇستى. بۇگىنگى دۇنيە اۋقىمى وزگەرىسكە تولى، سونداي – اق تەحنيكا توڭكەرىسى بۇرىن بولىپ كورىلمەگەن دارەجەدە جۇرگىزىلۋدە. اۆستراليا ەكى ەلدىڭ ءوزارا سەنىمدىلىگىن تەرەڭدەتىپ، اۆستراليا – جۇڭگو قارىم – قاتىناسى مەن ىنتىماقتاستىعىنىڭ ورنىقتىلىعى مەن ۇلاسپالىلىعىن ساقتاۋعا پەيىل. كەزەكتەگى قورعانىمپازدىق باس كوتەرگەن ارتقى كورىنىس جاعدايىندا، جەر شارىندىق ەركىن ساۋدانى جەبەۋ ءارقايسى ەلدىڭ كاسىپتەندىرۋ مەن ەكونوميكانى ارتتىرۋدى جۇزەگە اسىرۋىنا ءتيىمدى. اۆستراليا جۇڭگومەن بىرگە قۇلشىنىس جاساپ، ەركىن ساۋدا مەن بازاردى اشىق ۇستاۋ ىستەرىن قورعاپ، ەكى ەل حالقىنا ۇزدىكسىز باقىت جاراتۋعا پەيىل.

    كەڭەستەن بۇرىن تۋرىنبۋل پارلامەنت سارايى الاڭىندا لي كىچياڭ زۇڭليعا ارناپ سالتاناتتى قارسى الۋ سالتىن وتكىزدى. ناق مايداندا 19 رەت ساليۋت اتىلىپ، قۇرمەت قاراۋىلى ساپ تۇزەپ، اسكەري وركەستر جۇڭگو مەن اۆستراليانىڭ مەملەكەت گيمىنىن اسقاقتاتا ورىندادى. لي كىچياڭ قۇرمەت قاراۋىلىن كوزدەن كەشىردى. ەكى ەلدىڭ مەملەكەت تۋى الاڭ كەڭىستىگىنە جەلبىرەپ تۇردى.

    لي كىچياڭ زۇڭليدىڭ حانىمى چىڭ حۇڭ مەن تۋرىنبۋل زۇڭليدىڭ حانىمى لۋسي تۋرىنبۋل قارسى الۋ سالتىنا قاتىناستى.

    مەملەكەتتىك كەڭەستىڭ زۇڭليى لي كىچياڭ جەرگىلىكتى ۋاقىت ناۋرىزدىڭ 23 – كۇنى تۇستەن كەيىن كانبەرادا اۆستراليانىڭ باس گۋبەرناتورى كوسگروۆپەن، كەڭەس پالاتاسىنىڭ باستىعى پاگريمەن، قاۋىم پالاتاسىنىڭ باستىعى شىميسپەن، جۇمىسشىلار پارتياسىنىڭ كوسەمى شەلدونمەن جەكە – جەكە كەزدەستى.

جاۋاپتى رەداكتور: جازيرا بولاتباي قىزى