ءتىلشى ەلگەزەك تە شوگەل، ۇقىپتى بولۋى كەرەك

  • كەلۋ قاينارى: ىلە گازەتى
  • 06:55:53 25/03/2017

      دۇيسەقان بەيسەكە قىزى

 

    تىلشىلىك _ قامتيتىن كولەمى كەڭ، جاۋاپكەرشىلىگى اسا كۇشتى، جاپاسى مول، ابىرويلى دا داڭقتى مىندەت. ءار سالا، ءار كاسىپتە باسەكە ۇدەي تۇسكەن وسى تۇستا تىلشىلەرگە قويىلاتىن تالاپ ءتىپتى دە اۋىرلاپ، جاۋاپكەرشىلىكتى بارىنشا ارتتىرا ءتۇسۋىنىڭ قاجەت بولىپ وتىرعانى بەلگىلى. سوندىقتان داۋىرمەن تىنىستاس بولىپ، ءدوپ كەلگەن سىناقتان سۇرىنبەي وتۋگە قۇلشىنۋ تىلشىلەردىڭ باس تارتۋعا بولمايتىن بورىشى سانالادى.

    اقپاراتتىق حابارلاردا فاكتتىڭ ءدال، شىن، يلانىمدى بولۋى ەجەلدەن دارىپتەلىپ كەلە جاتقان قاعيدا. سوندىقتان تىلشىلەر ەڭ اۋەلى وسى قاعيداعا قاتاڭ بويسۇنىپ، قازىرگى باسەكەگە تولى داۋىرگە قالاي سايكەسۋ جونىندە كوبىرەك ىزدەنۋى كەرەك. مۇندا حابارلاۋدا تىڭ، جاڭا، ينفورماتسيالىق قۇنى جوعارى تۇيىندەرگە باسا نازار اۋدارۋ ءتىلشىنىڭ كورەگەندىگى سانالادى. وسىلاي ىستەگەن ءتىلشى كاسىپتەستەرىنەن مويىنى وزىپ، الدا جۇرەدى.

    ءتىلشى سەرگەك تە ەلگەزەك بولماسا ءداۋىر كوشىنە ىلەسە المايدى. حابار، ماقالانىڭ سانىن عانا كوزدەپ، ساپاسىنا ءمان بەرمەگەن ءتىلشى جارامدى ءتىلشى سانالمايدى. تاقىرىبى تىڭ دا جاڭا، مازمۇنى اقاۋسىز اقپاراتتىق تۋىندى جاراتۋ ءۇشىن ءتىلشى ەڭبەكشىل، ىزدەنگىش، قالام قۋاتى قارىمدى بولۋى كەرەك. ماقالانىڭ ەمىلە، لوگيكاسى دۇرىس، مازمۇنى ۇعىنىقتى، تىلگە جەڭىل بولۋى ءتىلشىنىڭ قۇنتتىلىعىن اڭعارتادى. ءتىلشىنىڭ قۇنىتتىلىعى ونىڭ اڭعارلىلىعىن مەڭزەيدى. مۇنداي ءتىلشى جاڭالىقتى ءارى ونىڭ حابارلاۋ قۇنىنىڭ بار-جوقتىعىن بايقاۋعا شەبەر كەلەدى. ءتىلشىنىڭ اڭعارلىلىعىنا ەلگەزەكتىگى ساي كەلسە، ساپالى اقپاراتتىق تۋىندىلاردى كوپتەپ جازۋىنا شارت ازىرلەيدى. ءتىلشى كاسىپتىك قابىلەتى جوعارى بولعانىمەن، جالقاۋ، سىلبىر بولسا ودان تارتىمدى، تاقىرىبى تىڭ تۋىندى شىقپايدى. سول ءۇشىن ءتىلشى وزىنە قاتاڭ تالاپ قويىپ، تاماشا تۋىندىلاردى جازۋعا كوبىرەك تولعانعانى ءجون. دايىن ماتەريالعا عانا يەك سۇيەگەن ءتىلشىنى جارامدى ءتىلشى دەۋگە بولمايدى. قازىرگى كەزدە كەيبىر تىلشىلەردىڭ كەڭسەدەن ۇزاپ شىقپايتىن، تەلەفون ارقىلى ءىستىڭ ءمان–جايىن ۇعىساتىن، ءتىپتى، مەكەمە–ورگاندارعا بارىپ، سول ورىنداردىڭ قورىتىندى جانە مالىمەتتىك ماتەريالدارىنان پايدالانىپ، حابار–ماقالا جازاتىن ءجايتىن كوبىرەك كەزىكتىرۋگە بولادى. ال وسىنداي جاعدايدا جازىلعان حابار–ماقالادان كوبىندە شالاعايلىق پەن قالايدا ءبىر كەمىستىك بايقالىپ تۇرادى. حابار–ماقالا جازۋ بارىسىندا قاجەتتىلىك ءۇشىن مەكەمە ورىندارىنىڭ دايىن جازبا ماتەريالىن الۋعا تۋرا كەلگەنىمەن، ءبىراق، ول حابار–ماقالاعا تيەك بولاتىن ءىستىڭ قاشان، قاي جەردە، نە سەبەپتى بولعانى، بارىسى، ناتيجەسى، تاعى باسقالارىن تولىقتاپ كەتە المايدى. سوندىقتان ءتىلشى، ءسوزسىز، ناق مايدانعا بارۋى، ءىستى، ۋاقيعانى ءوز كوزىمەن كورۋى، ەرىنبەي، جىنتىكتەي جاعداي ۇعىسىپ، جان–جاقتى ماتەريال توپتاۋى شارت. دەمەك ءتىلشى وسى باسقىشتى باسىپ وتكەن سوڭ عانا جازۋعا كىرىسۋى كەرەك. ال قالاي جازۋ، قاي ورەدە، قايسى فورمادا (تاسىلدە) جازۋ ءىسى ءتىلشىنىڭ قالام قۋاتىنا بايلانىستى. حابار–ماقالادا ءتىلشى ەڭ باستىسى ويدان قۇراستىرۋدان، فاكتتەن الشاقتاۋدان ساقتانىپ، اقپاراتتىڭ جانى بولعان شىندىقتى بارىنشا كورنەكتىلەندىرگەنى ءجون. بولماعان ءىستى بولدى دەپ، جوق نارسەنى (ءىستى) بار ەتىپ كورسەتۋ، سونداي–اق تىلشىلىك سالاۋاتىنان، قىزمەت قولايلىلىعىنان پايدالانىپ قارا باسىنىڭ قامىن كۇيىتتەۋ، تۋىس–تۋعاندارىنا، دوس–جاراندارىنا پايدا جەتكىزۋ تىلشىگە ابىروي اكەلمەيدى. سوندىقتان ءتىلشى ءوز كاسىبىن قىزۋ ءسۇيىپ، كاسىپتىك ءمورالعا قۇرمەت ەتۋدى ەشقاشان دا ەسىنەن شىعارماعانى ءجون.

جاۋاپتى رەداكتور: جازيرا بولاتباي قىزى