ناۋرىزعا قاتىستى قيىقتار

  • كەلۋ قاينارى: ىلە كەشى گازەتى
  • 10:56:04 28/03/2017

      ناۋرىز تويى

 

    ناۋرىز تويى - قىستىڭ قاھارى قايتىپ، قار-مۇز ەرىپ، كۇن جىلىنعان، ءتورت تۇلىك مال تولدەپ، اق مول بولعان مەزگىلدە تويلاناتىن قازاقتىڭ ۇلتتىق مەرەكەلەرىنىڭ ءبىرى. ناۋرىز تويى ەجەلگى تۇركي تايپالارىنىڭ مۇشەل ەسەبى بويىنشا، جىل باسى سانالاتىن ناۋرىز ايىنىڭ ءبىرىنشى كۇنى وتكىزىلەدى .ناۋرىز تويىندا، مولشىلىققا جورالعى رەتىندە ناۋرىز كوجە جاسالىپ، كارى-جاس، بالا-شاعا تۇگەل كەلىپ، كوڭىلدى ويىن-ساۋىق ،جاڭىلتپاش ايتۋ، جۇمباق شەشۋ، ءتۇس جورۋ، ناۋرىز جىرىن ايتۋ قيمىلدارى ۇيىمداستىرىلادى.

 

    ناۋرىز كوجە

 

    ناۋرىز كوجە قازاق حالقىنىڭ تۇرمىس تىرشىلىگى مەن ادەت-سالتىندا ەلەۋلى ورىن العان .ول-جاڭا تىرلىكتى، بەرەكە-بىرلىكتى ۇيتقى ەتىپ، تىلەۋ تىلەپ، بۇرىنعى قازاق كالەندارى بويىنشا جىل باسى ناۋرىز ايىندا بەرىلەتىن تاعام .ناۋرىز كوجەنى ناۋرىزدىڭ-11 كۇنىنەن باستاپ ،ەكى اپتا بويى، تاق كۇندەرى ءار ءبىر سەميا كەزەكپەن بەرەدى.

    ناۋرىز كوجە- كەمىندە جەتى ءتۇرلى دامنەن، ياعني ءسۇت ونىمدەرى قۇرت، قاتىق ،ەت ونىمدەرى قازى، قارتا، شۇجىق، جامباس ،استىق ونىمدەرى ءبيداي، تارى ،سۋ، تۇز قاتارلىلاردان پىسىرىلەدى .سوعىمنان ارنايى ساقتالعان مۇشەلەر قوسىلادى .ناۋرىز كوجەگە بۇكىل اۋىل بالا-شاعاسىمەن تۇگەل شاقىرىلادى.

    ناۋرىز جىرى

 

    ناۋرىز جىرى - قازاقتىڭ تۇرمىس- سالت جىرلارىنىڭ ءبىر ءتۇرى .قازاق حالقى ناۋرىز كۇنىن ۇلىستىڭ ۇلى كۇنى ،جاڭا جىل باسى دەپ ءبىلىپ، وسى كۇنى كارى-جاس قۇشاقتاسىپ كورىسىپ، ءبىر-بىرىنە اق نيەتىن، ارمان تىلەگىن جىر-تاقپاقپەن ايتاتىن بولعان. بەرەكەنىڭ داستارقانىنا جينالعان جۇرت «امانسىز با، ۇلىس وڭ بولسىن! اق مول بولسىن! ۇلىس بەرەكە بەرسىن، پالە-قالا جەرگە ەنسىن!» دەپ اعىنان اقتارىلا امانداسىپ، جاقسى تىلەكتەر تىلەگەن .شەشەندەر ناۋرىزدىڭ شەجىرەسىن تىلمەن شەرتىپ، اقىندار جىرمەن بەينەلەگەن.

 

                   دايىنداعان

                           ق. نۇراحىمان ۇلى

جاۋاپتى رەداكتور: جازيرا بولاتباي قىزى