قوناق بولۋ قۇرمەتىن بىلەسىز بە؟

  • كەلۋ قاينارى: ىلە كەشى گازەتى
  • 09:14:19 07/04/2017

    ەرلان شاڭقاي

 

   قازاقتىڭ قوناعىن قۇدايداي سيلايتىن قوناعۋار ۇلت ەكەنىن الەم حالقى مويىندايدى دەپ ايتساق ارتىق ايتقان بولمايمىز. ەجەلدەن كەلەجاتقان اسىل ءداستۇرىمىز، باي مادەنيەتىمىز، تۇنىق سالت – سانامىز قازاق ۇلتىنىڭ بەرەكە مەن ىنتىماققا ۇيىعان كەڭ مول داستارقانى، اقىلگوي اتالار، شەشەن بابالار مەن دارا دانالارىمىزدىڭ باعزى زاماننان بەرى جالعاسىپ كەلە جاتقان اق باتاسى مەن اق جارما تىلەكتەرىنەن ەش قاشاندا ءبولىنىپ قالماعان، قوسىنا قوناق كەلسە «قىزىر كەلدى، ىرىسىمىز تاسيتىن بولدى» دەپ قۋانا قارسى الاتىن قوناعۋارلىعىمىز بۇگىنگى كۇندە دە اڭعارىمدى اتادان ونەگەلى ۇرپاققا جالعاسىپ، ءوز ورنى ەرەكشەلەنىپ، وزگە ۇلت ەمىرەنە قارايتىن قوناق قۇرمەتى مەن داستارقان دانالىعىمىزدىڭ دارا قاسيەتىن ايگىلەپ تۇرعانى ءبارىمىزدى نەگە قۋانتپاسقا.

    قازاق حالقى قوناعىن ەرەكشە ارداقتاپ، قۇدايى قوناق، سيلى قوناق، ارنايى شاقىرىلعان قوناق… دەپ، الىستان التى جاسار بالا كەلسە دە، تورىنەن ورىن بەرىپ، جىلى –جۇمساعىن توسەپ، جالعىز تىشقاق توقتىسى بولسا ونى سول قوناعىنىڭ ىرىزعىسى دەپ ارنايتىنى اتا-بابامىزدىڭ «كەڭ بولساڭ كەم بولمايسىڭ»، «قوناق رازى بولسا وتباسىڭا قۇت كىرەدى» دەگەن ۇرپاق قۇلاعىنا قۇيماداي قۇيعان اقىلياسى حالقىمىزداعى قوناعۋار قۇندىلىقتىڭ سيمۆولى دەپ بىلەمىز.

    ءينشاللا، بۇگىنگى تاڭدا پارتيا -ۇكىمەتتىڭ ءابزال ساياساتىنىڭ ارقاسىندا باسىمىزعا وتاۋ تىگىپ، باۋىرىمىزعا قازان اسىپ، «داستارقانىمىزدان اس، ۇيىمىزدەن دوس كەتپەگەن» باياشات زامان ورناپ،كۇننەن كۇنگە ءومىرىمىز دە، كوڭىلىمىز دە شاتتانىپ، قوناق شاقىرۋ مادەنيەتىمىز ودان ارى مايەكتەنىپ، توسىن كەلگەن قوناققا دا «ءبىر شاۋگىم شاي بولىنبەگەن ەنشمىز» دەپ، الدىنا ءبىر تاباق اس تارتىپ،سي – سياپاتىمىزدى كورسەتىپ، استى-ۇستىنە ءتۇسىپ كۇتىپ الاتىن جاعدايمىز جاسالعان زامان بولدى. ەرتەدەن بەرى وتباسىمىزعا كەلگەن قوناققا كادەلى سىباعاسىن بەرىپ، سوسىن سالت –ءداستۇرىمىز بويىنشا باتا سۇراپ، اعىنان اقتارىلعان اڭگىمەسىن تىڭداپ، ونەرلى قوناقتىڭ ءان–كۇي تاماشاسىنان سۋسىنداپ، سوزدەن ورنەك توقىعان قوناقتىڭ جۇيەلى ءسوز، سىندارلى وي –پىكىرىن كوكەيىمىزگە قوندىرىپ، اۋزى دۋالى اقساقالدار مەن اتقا مىنگەن اعالاردان ۇرپاقتارىمىزعا ىقىلاستى باتاسىن الىپ، ءازىل–قالجىڭىنا ارقا –جارقا بولىپ، وتباسى مۇشەلەرى ءماز –مايرام قوناق قۇرمەتىن جاساپ، جولعا سالاردا اق جول بولسىن ايتىپ اتتاندىرىپ قوياتىن قوناعۋارلىق تاماشا مادەنيەتىمىز بۇگىنگى تاڭدا دا تاڭداي قاقتىراتىن وزىق مادەنيەت.

    ءيا، زامان دامۋىنىڭ زىمىران كوشىنە ىلەسە، كۇندەلىكتى تۇرمىستىڭ كۇيبەڭى وسىنداي قوناعۋرالىق مادەنيەتىمىزدى كولەڭكەلەپ،ابىز مادەنيەتىمىزدى السىرەتىپ، سالت –ءداستۇرىمىزدى سالقىنداتىپ، اتتەگەن–اي ايتقىزىپ، ادامدار ارا قاتىناستى، سۇيىسپەنشىلىكتى، قۇرمەتشىلدىكتى سيرەتىپ بارا جاتقانى شىمبايىڭا باتار شىندىققا اينالعانى تاعى بار.

جاۋاپتى رەداكتور: جازيرا بولاتباي قىزى