وپاسىز بالا، سوتتاسقان انا

  • كەلۋ قاينارى: ىلە كەشى گازەتى
  • 10:11:06 19/04/2017

    بالاسى ۋ چياڭ ءوزىن جاقسى قاراماعاندىعى سەبەپتى، ليۋ اجەي بالاسىنا بەرگەن ءۇيىن قايتارىپ الۋ بەكىمىنە كەلىپ، سوتقا ارىز كىرگىزدى، بىلتىر ماۋسىمدا، ءۇرىمجى قالالىق جاڭا قالا رايوندىق حالىق سوتىندا ءبىرىنشى سوت اشىلىپ، ليۋ اجەيدىڭ بالاسىنا بەرگەن ءۇيدىڭ ۇقىعىن قايتارىپ الۋتالابى قۇپتالدى، بۇعان ۋ چياڭ مويىنسال بولماي، جوعارىعا ارىزدانىپ، بيىل مامىردا ەكىنشى سوت اشىلىپ، اۋەلگى ۇكىم كۇشىنە يە دەپ ۇكىم شىعارىلدى.

    جاڭا قالا رايونى يىن چۋان سولتۇستىك جولى ءمالىم تۇرعىندار رايونىندا تۇراتىن ليۋ اجەي بيىل 68 جاستا، 3 ۇل، ءبىر قىزى بار، ادەتتە كەنجە ۇلى ۋ چياڭعا بۇيرەگى بۇرىلىپ تۇراتىن ەدى. 2013-جىلى قاراشادا، ءوز اتىنداعى قورا-جايىن 2 ميلليون 600 مىڭ يۋانعا باسقالارعا ساتىپ بەرەدى، ۇل-قىزدارىنىڭ پىكىرى بويىنشا، ءبىر ميلليون 280 مىڭ يۋاندى ءوزىنىڭ كۇتىمدەلۋ قاراجاتىنا ساقتاپ، قالعان اقشانى بالالارىنا ءبولىپ بەرەدى.

    ليۋ اجەي بالالارىمەن بىرگە تۇرۋدىڭ قولايسىزدىعىن ويلاپ، ءوزىنىڭ كۇتىمدەلۋ قاراجاتىنان اقشا شىعارىپ، جاڭا قالا رايوندىق سۋجوۋ شىعىس جولى ياڭگۋاڭ جيايۋان تۇرعىندار اۋماعىنان ءبىر ءۇي ساتىپ الىپ، كەنجە ۇلى ۋ چياڭمەن بىرگە تۇرادى.

    2014-جىلى ساۋىردە، ليۋ اجەي بالالارىن شاقىرىپ، وتباسى جيىنىن اشىپ: «مەنىڭ دەنساۋلىعىم بۇرىنعىعا جەتپەي قالدى، قازىر مەنىڭ ەڭ الاڭدايتىنىم-كەنجە ۇلىم، ەگەر ول مەنى قارتايعاندا كۇتىپ، ولگەنشە قاراۋىنا السا، مەن ءوز اتىمداعى قورا-جايىمدى وعان تارتۋ ەتەم» دەيدى. بالالارى دا انالارىنىڭ بۇل ويىن قۇپتايتىندىعىن بىلدىرەدى ءارى سيعا بەرۋ توقتامىنا قولدارىن قويادى.

    سول جىلى قازاندا، ليۋ اجەي سىرتتا سەيىلدەپ جۇرگەندە قارسى الدىنان كەلگەن ماشينادان جالتارۋعا ۇلگىرمەي سوعىلادى. ءبىر ءتاۋىرى، دەر كەزىندە شيپاحاناعا جەتكىزىلگەندىكتەن ولىمنەن امان قالادى، ءبىراق شيپاحانادان شىققاننان كەيىن، دەنساۋلىعى بۇرىنعىعا جەتپەي، بالالارى كەزەكپەن قاراۋدى مىندەتىنە الادى، كوپ وتپەي ۋ چياڭ قاراۋدان جالىعىپ كىشكەنە ىستەرگە بولا ليۋ اجەيمەن كەركىلدەسىپ، ءتىپتى اۋىر ءسوز ايتۋعا دەيىن بارادى.

    بۇنداي وپاسىز ۇلىنىڭ قىلىعىنا شىداماعان ليۋ اجەي بىلتىر مامىردا جاڭا قالا رايونى حالىق سوتىنا ۋ چياڭنىڭ ۇستىنەن ارىز بەرىپ، ءۇيدى سيعا بەرۋ توقتامىن كۇشىنەن قالدىرۋدى وتىنەدى. سوت مەكەمەسى بىلاي دەپ قارايدى: «جۇڭحۋا حالىق رەسپۋبليكاسىنىڭ توقتام زاڭىنىڭ» 190-تارماعىنا نەگىزدەلگەندە، سيعا الۋشى بەلگىلەنگەن كەلىسىم بويىنشا بورىشىن ادا ەتۋى كەرەك. بۇل دەلودا ۋ چياڭ مەن ليۋ اجەيدىڭ سيعا بەرۋ توقتامىندا ايقىن كەلىسىم مازمۇنى بار، سي الماقشى بولعان ۋ چياڭ ليۋ اجەيدىڭ سيعا بەرگەن ۇيىندە تۇرۋى ءارى سيعا بەرۋشى ادامدى باعىپ-قاعۋ جاۋاپكەرشىلىگىن ادا ەتۋى كەرەك ەكەنى، ويتپەگەندە زاڭدىق جاۋاپكەرشىلىگى قۋزالاتىندىعى انىق جازىلعان.

    «جۇڭحۋا حالىق رەسپۋبليكاسى توقتام زاڭىنىڭ» 192-تارماعىنداعى بەلگىلەمەدە: سيعا الۋشى جاق تومەندەگى ءبىر قانشا بەلگىلەمەگە قايشىلىق ىستەسە، سيعا بەرۋشى جاقتىڭ سيعا بەرۋدى كۇشىنەن قالدىرۋىنا بولادى: ءبىرىنشى، سيعا بەرۋشىگە نەمەسە سيعا بەرۋشىنىڭ جاقىن تۋىستارىنا اۋىر رۋحاني زيان جەتكىزسە؛ ەكىنشى، باعىپ-قاعۋ كەلىسىمى تولىق اتقارىلماسا؛ ءۇشىنشى، سيعا بەرۋ توقتامىنداعى كەلىسىمدەردى ورىنداماسا.

    بۇل دەلودا ۋ چياڭ ءۇيدى سيعا العاننان كەيىن شەشەسىن باعىپ-قاعۋ مىندەتىن اتقارماعان، ليۋ اجەي «جۇڭحۋا حالىق رەسپۋبليكاسىنىڭ توقتام زاڭىنا» نەگىزدەلىپ، بۇل توقتامدى كۇشىنەن قالدىرۋعا ءارى بالاسىنىڭ اتىنا قوندىرعان قورا-جايىن قايتارىپ الۋعا حاقىلى. سوڭىندا سوت ورگانى وسى بويىنشا ۇكىم شىعاردى.

جاۋاپتى رەداكتور: جازيرا بولاتباي قىزى