قوزعالىس بار ورتادا تىرشىلىك، كوركەمدىك بولادى

  • كەلۋ قاينارى: ىلە كەشى گازەتى
  • 10:15:51 05/05/2017

    ەركىن تەسەباي ۇلى

 

    ءومىر قوزعالىس ىشىندە بولادى. قوزعالىس-ادام ءومىرىنىڭ بارلىق بۋىندارىن قامتىپ جاتادى. ۇلكەن مي، دەنەمىزدەگى ءاربىر كلەتكا، قان اينالىسى جۇيەمىز توقتاۋسىز ءارى ۇنەمى قوزعالىستا بولادى. ادام ۇيىقتاعان كەزدە دە كوز قاراشىعى قوزعالىستا بولادى ەكەن. بۇلار ءومىردىڭ ءمانى قوزعالىستا ەكەندىگىن تۇسىندىرەدى. سول قوزعالىستاردىڭ جۇيەلى بولۋ-بولماۋى دەنساۋلىعىمىزدىڭ قالىپتى بولۋ-بولماۋىمەن تىعىز بايلانىسىپ جاتادى. قوزعالىستىڭ ماڭىزدى بۋىنى جالپى حالىقتىق دەنە شىنىقتىرۋ قيمىلى بولماق، دەنە شىنىقتىرۋ قيمىلى ادام ءومىرى ءۇشىن تەڭدەسسىز اقاۋسىزدىق باعىشتايتىندىعىن ءومىر امالياتى دالەلدەپ وتىر. وتە-موتە، جۇيەلى دەنە تاربيەلىك قيمىلدار جاس ءوسپىرىم بالالار جونىنەن الىپ ايتقاندا، ولاردىڭ اقاۋسىز ەسەيىپ-ەرجەتۋىنىڭ ماڭىزدى كەپىلى سانالماق.

    ۇلتىمىز تاريحتان بەرى سپورت قيمىلدارىنا توتەنشە ءمان بەرەتىن حالىقتاردىڭ ءبىرى. ات بايگەسى، بالۋان، كوكپار تارتۋ، تەڭگە ءىلۋ، قىز قۋار قاتارلى دەنە تاربيەلىك قيمىلدارىمىز كۇنى بۇگىنگە دەيىن ءمانىن جويماي جالعاسىپ كەلەدى، قازىرگى تاڭدا سپورت قيمىلدارىمەن جۇيەلى شۇعىلدانۋ ءارقانداي ءبىر ۇلت پەن مەملەكەتتىڭ وركەنيەتتىلىگىنىڭ ماڭىزدى بەلگىسىنە اينالىپ وتىر.

    قاتىستى ماتەريالدارعا جۇگىنسەك، دەنە تاربيە قيمىلدارىمەن كۇن سايىن تاباندىلىقپەن شۇعىلدانۋ ادامدى ۋايىمنان ارىلتىپ، رۋحتى سەرپىلتەدى، اۋرۋعا قارسىلىق قۋاتتى ارتتىرىپ، قىزمەت پەن وتباسىنىڭ قىسىمىنا توتەپ بەرۋ قابىلەتىمىزدى جوعارىلاتادى، سەمىزدىكتەن ارىلتىپ، دەنەڭىزدى سىمباتتاندىرادى، دەنەدەگى ينسۋليندى تەڭشەپ، قانتتى نەسەپ ناۋقاسىنىڭ الدىن الادى، جۇرەك قىزمەتىن اقاۋسىزداندىرىپ، قان اينالىسىن جاقسارتادى ەكەن.

    ادەتتە قاراپايىم ادامدار شۇعىلداناتىن جالپى حالىقتىڭ دەنە شىنىقتىرۋ قيمىلدارى: باياۋ جۇگىرۋ، جاياۋ ءجۇرۋ، كەرىلۋ، بيلەۋ، ۇستەل دوپ، تور دوپ ويناۋ، قالا سىرتىندا سەيىلدەۋ، مۇزدا، قاردا سىرعاناۋ، مالتاۋ، ۋاليبول، پۋتبول، باسكەتبول ويناۋ قاتارلىلاردى قامتيدى. حانزۋ تىلىندەگى ءمالىم ءۇنحات تەكشەسىندە ءبىر ماقالادان ادامنىڭ دەنە سىنباتىنا قاراپ ونىڭ قانداي دەڭگەيدە تاربيە كورگەندىگىن ءبىلىپ الۋعا بولادى دەگەن مازمۇندى كورگەنىم بار. ادەتتە، اقىلدى دا زەرەك، ادەپتى دە يبالى ايەل زاتىنىڭ اراسىنان سەمىرىپ كەتكەندەردى كەزىكتىرۋ وتە سيرەك ۇشىرايتىن قۇبىلىس، مادەنيەت ساۋياسى جوعارى، يدەياسى تۇراقتى پاراساتتى ايەل زاتتارىنىڭ دەنە ءبىتىمى سىمباتتى، ءجۇرىس-تۇرىسى ادەپتى، ادىمى جەڭىل، يناباتتى بولادى ەكەن. ال ەر ادامدار جونىنەن الىپ ايتقاندا، ءومىردى قىزۋ سۇيەتىن، قىزمەتىن تاباندىلىقپەن ىستەيتىن، مىنەزى ورنىقتى، دۇرىس تۇرمىس داعدىسىن قالىپتاستىرعان ازاماتتاردىڭ دەنە ءبىتىمى شىمىر، دەنە مۇشەلەرىءوزارا سايكەسكەن، قۇرساق بۇلشىق ەتى جاراسىمدى كەلەتىن كورىنەدى. كەزىندە پۋتين، وباما سىندى ساياسي تۇلعالار وزدەرىنىڭ سپورتشىعا لايىق دەنە بىتىمدەرى ارقىلى حالىق بۇقاراسىن وزدەرىنە باۋراپ، سايلاۋ باسەكەسىندە بەلەت ساندارىن ارتتىرىپ، قارسىلاستارىنان وزعان ەكەن.

 

جاۋاپتى رەداكتور: جازيرا بولاتباي قىزى