اقىت ءۇلىمجى ۇلىنىڭ اعارتۋ ءتالىماتتارى

  • كەلۋ قاينارى: ىلە كەشى گازەتى
  • 11:37:38 05/05/2017

     سەرىك قاۋىمباي ۇلى

 

    اعارتۋ - الەمدىك ۇعىم، ادام پەندەسىنىڭ اقىل -ەسىنە، سانا -سەزىمىنە، وي -ءورىسى مەن بىلىمىنە، احلاعى مەن ءمورالىنا، ادامدىق سيپاتى مەن ادامگەرشىلىگىنە بارىپ ساياتىن ۇلكەن دۇنيە. ول ادام پەندەسىنىڭ وتتان پايدالانىپ، استى پىسىرىپ جەۋىمەن، اسىرەسە ادام پەندەسىنىڭ ەتپەن قورەكتەنە باستاعانىنان باستاپ پايدا بولا باستاعان اسا ەسكى عىلىم...

    جازۋدىڭ پايدا بولۋىنا ساي جەر شارىنا ءبىلىم، عىلىمنىڭ العاشقى شۋاعى سەبىلدى. وسىدان باستاپ ادامزات اقىل - ويىندا توسۋ بەرمەس جاڭالىقتار تۋىندادى. جەر شارىن جارقىراتىپ تۇرعان قاسيەتتى كۇن نۇرىنان وزگەشە ادام پەندەسىنىڭ كۇللى كوكەيىن، جۇرەك اياسىن جارقىراتقان عاجايىپ ءبىر كۇن تۋدى. وسى كۇننىڭ نۇرى كىمنىڭ جۇرەگىنە تۇسسە سول ادامدىققا قاراي بەت الدى. ادامزاتتىڭ ناعىز ادامشا ورتاسىن جاسادى. مىنە، وسىنى تەرەڭنەن سەزگەن اقىت ءۇلىمجى ۇلى:

    «عىلىم ساۋلە، نۇر، جارىق،

    وقىماي بولماس قۇر جارىق...» دەيدى. بۇل اقىتتىڭ ءوز تۋعان ورتاسىندا وقۋ - اعارتۋدى جولعا قويۋدىڭ، وركەندەتىپ دامىتۋدىڭ نەگىزگى ەرەجە، ماقسات، مازمۇنداماسى. سونان ارى اقىت ەندى وزىنە سالماق ءتۇسىرىپ:

    «عىلىمى تەرەڭ دانالار

    تۇندە جاققان شىراقتاي.

    تەرەڭ ويلى بىلگىشتەر

    جارتاستان شىققان بۇلاقتاي...» دەپ ءوزىنىڭ مىندەتىن اداقتاي باستايدى. نە ىستەۋ كەرەكتىگىن بولجامدايدى. كوردىڭىز بە، بەت الدىنان كەزىككەن نارسەنى بارلىق كوزى انىق كورەتىن ادامداردىڭ ۇپ - ۇقساس كورەتىنى سياقتى بۇل الەمنىڭ دانىشپاندارى مەن سول دانىشپاندىقتىڭ باستاۋ كوزى بولعان ءىلىم مەن كيەلى كىتاپتاردىڭ بارلىعى ءبىر تىلدە، ءبىر ىزدە سويلەيدى. وسى تىلدە، وسى ىزدە اقىت ءۇلىمجى ۇلى دا بار. سونان دا اقىت:

    «ەلىڭە ەرەن ەڭبەك ەتەم دەسەڭ،

    اۋەلى ارتىق ونەر، عىلىم ۇيرەن...»

    «عىلىم ءبىلۋ كوپ ارتىق،

    وزگە بىلگەن ونەردەن...»

    «ءبىلىمسىز جاننان ءيت ارتىق،

    ءبىلىمدى، جاقسى ادام بول...» دەگەن ءوزىنىڭ ماقسات مازمۇنداماسىنىڭ جەتەگىندە ءوزىنىڭ بويىنا دارىعان بىلىمدەرىن ەلىنە، تۋعان حالقىنا دارىتۋعا، ولاردىڭ رۋحىنا سىڭىرۋگە قيمىل جاساي باستايدى. بۇل عۇلاما اقىننىڭ بولاشاققا دەگەن باتىل سەنىمى مەن ءوز ىسىنە دەگەن اسقان جاۋاپكەرشىلىگى ەدى...

جاۋاپتى رەداكتور: جازيرا بولاتباي قىزى