بەسىكتەن تۋعان بەلەڭ وي

  • كەلۋ قاينارى: ىلە كەشى گازەتى
  • 09:00:22 16/05/2017

    ىنتىماق بەكقادىر قىزى

 

    جەلتوقساننىڭ ءبىرىنشى جاڭاسى. ءبىر كۇنگى قاربالاس تىرشىلىكتەن قول ءۇزىپ، كىسى اتاۋلى تىنىش ۇيقىعا كەتكەن قىستىڭ ۇزاق تۇندەرىنىڭ ءبىرى ەدى. ءتورت ايعا جاڭا تولعان كىشكەنە بوبەگىمنىڭ قىڭقىلىنان سەلت ەتىپ وياندىم. وڭ قولىمدى بەسىككە سۇيەپ ءبىراز تەربەتىپ ەدىم، قايتا ۇيىقتاپ قالدى. ۇيقىلى كوزدەرىمدى ۋقالاي ساعاتقا قاراسام ءۇرىمجى ۋاقىتى ەكى جارىم ەكەن. بالبىراپ ۇيىقتاپ جاتقان قىزىما ريزالىقپەن قارادىم دا، قايتا قيسايدىم. جاڭا عانا ءتاتتى ۇيقى مەڭدەتىپ بارا جاتقان مەنىڭ ەندى كىرپىگىم ايقاسار ەمەس. «قيال ءتۇبى شىڭىراۋ، باتاسىڭ دا كەتەسىڭ» دەگەن راس –اۋ، ۇزاق ويلارعا بەرىلدىم. ءدال وسىنداي ساعاتتاردا مەزەتتىك تىنىشتىق بولا قالسا جاتا كەتۋ دەگەن جاتتاندى نارسە بولا تۇرسا دا قيالدارىم مەنى ۇيىقتاپ كەتۋگە قايىرىلتپادى.

    «اكە-شەشەنىڭ قادىرىن بالالى بولعاندا بىلەرسىڭ» دەگەن دۇرىس ايتىلعان ءسوز ەكەن عوي، بالالىقپەن، شالالىقپەن الدە ءبىر ارماندارىم مەن ماقساتتارىم ورىندالماي قالعان كەزدە شەشەمە ورىنسىز وكپەلەپ، اۋىر ءسوز ايتا سالاتىن كەزدەرىمدى ويلاسام ءوزىمدى جەك كورگەنىم سونشا، ەسىمە شەشەم سونداي مەيىرىمدى دە جاپاكەش قالپىندا ورالاتىن. ءبىراق مەن قانشا ويلاسام دا، شەشەم بۇل كۇندەرى سامايىنا اق كىرىپ، اۋىرلاسقان اياعىن ازەر باساتىن، تىرلىكتىڭ شارۋاسىن قوس قولىنا سۇيەنىپ اتقاراتىن، كۇنى بۇگىن دە مەن ءوز الدىما سەميالى بولىپ كەتسەم دە قىزىم كەلە جاتىر ەكەن دەگەن حاباردى ەستىسە بولدى، جانە ءبىر جاعىنان تاماعىن جاساپ، مەنى قۇشاق جايا قارسى الاتىن دا، سوسىن قولىمداعى بالاعا جۇگىرىپ، «ۇيىقتاپ الشى، تاماقتانشى» دەۋدەن ءبىر جالىققان ەمەس.

    مۇحاممەت پايعامباردان ءبىر ادام «انامدى ارقالاپ ءجۇرىپ قاجىلىق جاساتتىم، قاسيەتتى كاعبانى جەتى رەت اينالدىرىپ، ءتاۋ ەتتىردىم، انا اقىسىن وتەي الدىم با؟» دەپ سۇراعان ەكەن. سوندا پايعامبار «جوق، بۇل قىزمەتىڭ اناڭنىڭ ساعان جۇكتىلىك ۋاقىتىندا قينالعان ءبىر ساتىنە دە تەڭ ەمەس» دەپ جاۋاپ بەرىپتى. انانىڭ قۇدىرەتىن مۇنان ارتىق ايتىپ جەتكىزۋ مۇمكىن ەمەس شىعار – اۋ. ءيا، ءتانىڭ اۋىرىپ، جانىڭ جاپا شەكسە جۇباتاتىن ايەل زاتى عوي، قازىر ەگەر مەنەن بىرەۋ «ەڭ الدىمەن جاقسىلىقتى كىمگە ىستەيسىڭ؟» دەپ سۇراسا، ىركىلمەستەن «اناما» دەپ جاۋاپ بەرەر ەدىم. قازاقستان پرەزيدەنتى نۇرسۇلتان نازاربايەۆ «شىعىس حالىقتارىنىڭ اراسىندا، جالپى مۇسىلمان الەمىندە ايەل زاتىن بولەكشە باعالايتىن، قارىنداستى قاتتى قادىرلەيتىن حالىقتىڭ ءبىرى دە، بىرەگەيى دە ءبىزدىڭ قازاق» دەگەن ەدى. مىنەكي، انا نە ءۇشىن ماڭگىلىك تاقىرىپ بولادى؟

    ەرلەر ءسۇيىپ جەيتىن نارسەسىنە جولىققاندا قۇمارلانا جەيدى، قاتتى تويعاندا قارنى سىزداسا، سىرتقا شىعىپ توق باسىپ بوي جازعاندى ۇناتادى. ويلانشى، ايەلىڭ بالاڭدى ون اي كوتەردى. ەگەر انالىق ماحابباتى قايسار رۋحىنا تىرەك بولماعاندا، كىم سونشالىق ۇلكەن قۇرساققا شىداس بەرە الار؟ سەن تويعان تاماعىڭا دا شىداي المايسىڭ. ال، ايەل ون اي ءبىر كىشكەنە تاعدىر ءۇشىن ۇلكەن تاعدىردى قۇربان ەتۋگە دايىن. ومىرگە كەلگەن بالاعا سۋىق بەسىك تايانىپ كىرپىك قاقپاي قارايدى. كۇندىز ءبىر كوزى جۇمىستا بولسا، ءبىر كوزى بالاسىن تاسا قىلمايدى. ال، ول تاعى سەنىڭ اۋلەتىڭنىڭ تۇقىمى. ەگەر سەن وعان وڭ كوزىڭمەن قاراماساڭ، ايەلىڭنىڭ سەن ءۇشىن بەرگەن بوداۋىنىڭ الدىندا باس كوتەرىپ تۇرا الاسىڭ با؟ مۇمكىن ەمەس قوي، ادام دەگەن ەت جۇرەكتى پەندە عوي.

جاۋاپتى رەداكتور: جازيرا بولاتباي قىزى