حالىق كۇيىنىڭ قۇدىرەتى

  • كەلۋ قاينارى: ىلە گازەتى
  • 09:32:51 27/05/2017

       ديداربەك زاكىرجان ۇلى

 

    ۇمىتىلماس كۇن

 

    بالا كەزىم. كەشكە تاياۋ اكەم ۇيگە ارىق قارا كىسىنى ەرتىپ كەلدى. قوناق كەلگەن سوڭ شەشەم تورگە ينە –جىپتەن جاڭا شىققان سىرماعىن توسەپ، ءتور كورپەسىن جايىپ بايەك بولدى. تورە تاباق سىباعاسىن جەپ بولعاننان كەيىن، توردە ءىلۋلى تۇرعان شاناعىنا كىر بايلانعان قارا دومبىرانى اكەم الگى بەيتانىس كىسىنىڭ قولىنا ۇستاتتى. ەندى ول كىسىنىڭ ساۋساعى دومبىرانىڭ شاناعىندا ويناپ، ءسابي كوڭىلىمدى وزىنە ىڭكار ەتىپ، بار نازارىمدى وزىنە ماگنيتتەي تارتقانى ءالى ەسىمدە. سول كۇنگى كەلگەن قوناق تارتقان كۇيدىڭ سارىنى كەي كەيدە قۇلاعىمنىڭ تۇبىنەن ەستىلىپ تۇرعانداي بولادى.

    مىنە، سودان بەرى دە وتىز جىل وتە شىعىپتى. وتىز جىل ونەر–ءبىلىم ۇيرەنەمىن دەگەن ۇرپاققا قانات بىتىرەتىنى شىن ەكەن. تەك ۋاقىتتان ۇتتىرىپ، كوكپارشى ورايدىڭ قانجىعاسىنا بايلانىپ كەتپەسەڭ بولعانى.

    وتكەندە سول قارت كۇيشى قىزىرقان نۇعىمان ۇلىمەن جولىعىپ اڭگىمە دۇكەن قۇردىم. ول كىسى 200 گە تارتا حالىق كۇيىن شەرتەتىنىن ايتتى. ءبىراق قازىرگە دەيىن ول كىسىنىڭ كۇيىن شەرتكىزىپ، تاسپاعا تۇسىرگەن ادام جوق ەكەنىن ايتا كەلىپ:

    _ مەنىڭ ەڭ ۇلكەن ساحىنام سەنىڭ اكەڭنىڭ تورىندە وتىرىپ، اعارىپ تاڭ اتقانشا شەرتكەن كۇيىم،–دەدى. ەندى مىنە، جاس ۇلعايعان سوڭ ساۋساقتارىم شار تارتىپ، كوبىنىڭ شەرتىلۋىن ۇمىتتىم.

    ول كىسى اڭگىمەسىن:

    _ مەن 1940–جىلى اقپاندا، اراسان اۋدانى مەلشىكتى (سارى اعاش) دەگەن جەردە دۇنيەگە كەلىپپىن. بالالىق شاعىمدا كوڭىلدەگىدەي وقي المادىم. 1952–جىلى قۇرىلىس اترەتىنىڭ قورالى قويىن باقتىق. سول كەزدە قۇرىلىس اترەتىنىڭ جاۋاپتىسى ساعاتبەك دەگەن باسشى بولدى. مىنە، سول كىسى قىسى–جازى كەلىپ–كەتىپ ءجۇرىپ، ساباق ءوتىپ تۇڭعىش ۇستازدىق ەتىپ ساۋاتىمدى اشتى،–دەپ باستادى دا، − مەن ومىرىمدە كىتاپ وقۋ مەن دومبىرا شەرتۋگە ەرەكشە قىزىقتىم. ءبىراق مەنىڭ جاستىق شاعىم تۇرمىستىڭ جوقشىلىعىمەن ءوتتى، بوز بوراندا ويلاعان ارماندارعا جەتە الماي جول ورتادا قايراڭداپ قالدىم دا ويلاعان ويلارىمنىڭ ءبىرىنىڭ باسىن، ءبىرىنىڭ اياعىن ۇستاپ شالاعاي دالباسامەن مىنە، 76 جىلدىڭ كەزەڭىنەن اسىپ وتىرمىن.

    مەن ەس ءبىلىپ قولىما دومبىرا العاننان كەيىن اۋىلىمىزداعى قارت كۇيشى عالىم دەگەن كىسىنىڭ ۇيىنە بارىپ، ول كىسىدەن «اڭشىنىڭ زارى»، «اقساق ايۋ»، «بۇلعىن–سۋسار» دەگەن حالىق كۇيلەرىن ۇيرەنگەن ەدىم. ودان كەيىن ماعان كوڭىل قويىپ ۇيرەتەتىن، جەتەلەيتىن ۇستاز بولمادى، ءوزىم تىنباي قۇلشىنۋ ارقىلى 200 گە تارتا حالىق كۇيىن كوكىرەگىمە ساقتاپ العان ەدىم.

 

جاۋاپتى رەداكتور: جازيرا بولاتباي قىزى