كولكەتايدىڭ ءازىل-قاعىتپالارى

  • كەلۋ قاينارى: ىلە كەشى گازەتى
  • 12:21:59 07/06/2017

    كولكەتاي ورالقان ۇلى باركول اۋدانىندا تۋىلعان. جاستايىنان پوچتاشى بولىپ ەل ارالاپ گازەت-جۋرنال، حات-شەك تاراتىپ قىزمەت اتقارعان كىسى. ونىڭ تاپقىر دا شەشەن، ايتارىن اسەرلەپ قىزىقتى جەتكىزەتىن، جاقتىرماعانعا ءسوزىن سۇيەگىنەن وتكىزەتىن، ءبىر ءسوزى ءبىر اتتىق بولىپ، ءسوز ونەرىن بار ونەردىڭ الدى دەپ بىلەتىن، حالقىنا تالاي-تالاي كوركەم ءسوز سيلاعان، وتىرعان ۇلى-جيىن تويلاردا تامام ەلدى اۋزىنا قاراتقان، كوكەڭنىڭ اڭگىمەسىنە ۇيىعان تىڭدارمان مويىنى ءبىر جاعىنا قاتىپ اتتان اۋىپ تۇسكەنگە دەيىن قۇلاق قۇرىشى قانباعان ايتقىش، شەشەن كاريا. ول كىسىنىڭ سوزدەرى ولكە كولەمىنە تارالىپ، كەي سوزدەرى ماقال-ماتەل بولىپ تا، ءتامسىل بولىپ تا تارالىپ ءجۇر. كولكەتايدىڭ اكەسى ورالقان دا ەل ىشىندە ءتىلدى-جاقتى، نە ءبىر دانا سوزدەرىمەن، قىزىقتى قىلىعىمەن ەل ەسىندە اڭىزعا ايلانعان ادام. تومەندە كولكەتايدىڭ ەل اراسىنا تارالعان شەشەن شەرتپەلەرىنەن قولىمىزعا تۇسكەنىن جيناپ، ۇسىنىپ وتىرمىز.

    ******

    باركولدىڭ ويتاۋىنداعى جامانسۋ دەگەن جەر جازدا شىلىڭگىر ىستىق، اۋاسى قۇرعاق، قارا شىبىن قۇجىناپ تۇرادى. جامانسۋعا پوچتا جۇمىسىمەن بارىپ كەلگەن كوكەڭنەن ول جەردى تولىق بىلەتىن بىرەۋ:

    -جامانسۋ شىبىنداپ تۇر ما ەكەن؟-دەپ سۇراپتى.

    -اتپەن قۇلىنشارىدەن جامانسۋعا بارعانشا شولدەپ-شارشاپ كەتتىم. اۋىل شەتىندەگى ءبىر قوڭىرقاي ۇيگە تۇسە قالدىم، اقپەيىل كىسىلەر ەكەن. ءتور كورپە سالىپ، تورگە سۇيەنىش جاستىق جاستاپ جىگى-جاپار بولدى. پەيىلدەرىنە قاتتى رازى بولىپ وتىردىم، باۋىرساق پىسىرىپ شاي قۇيدى. شىنايىلعىنا، قازاقي مەيماندوستىعىنا رازى بولىپ، الدىما داستارقان كەلگەندە بىلگەن باتامدى ماقامداپ تۇرىپ قويا بەردىم. داستارقانداعى باۋىرساققا قولىمدى سوزسام، باۋىرساقتان ءبىر تال دا جوق، سويتسەم جامانسۋدىڭ شىبىندارى ءبىر-اق الىپ كەتىپتى،-دەپتى شىبىننىڭ كوپتىگىن بەينەلەپ.

    ******

    كولبويىنان باركولگە اقپاننىڭ ايازىندا اتپەن كەلگەن كوكەڭە پوچتانىڭ باستىعى:

    -كولبويىنىڭ ايازى قارىپ تۇر ما؟-دەپ سۇراپتى. سوندا كوكەڭ اسەرلەي سويلەيتىن ادەتىنە باسىپ:

    -كولجاعاسىنان اتقا مىنەردە ءبىر ىرجيىپ كۇلىپ ەدىم، سول ىرجيعان بەتى قاتىپ قالىپ، كەڭسەدەگى وتقا ءۇش ساعات جىلىنعاسىن بەتىم ءجىبىپ، ەزۋىمدى الگىندە ارەڭ جيىپ الدىم،-دەپتى.

    ******

    ءبىر كەزدەرى اۋىلدا جاستاردىڭ اراق ءىشىپ توبەلەسى كوبەيىپ تۇرعان كەزدە كوكەڭ:

    -وسى كۇنگى كەيبىر جاستار كورشى اۋداندا توبەلەس بولىپ جاتسا ۇيدە وتىرىپ ءتىسى شىقىرلاپ، جۇدىرىعى ءتۇيىلىپ، كوزى قىزارىپ، شىنىسىنداعى شايى شايقالاقتاپ، سەلكىلدەپ وتىرا الماي قالادى،-دەپتى.

 

جاۋاپتى رەداكتور: جازيرا بولاتباي قىزى