اۋە تولقىنىنا ايتار ەكى اۋىز ءسوز

  • كەلۋ قاينارى: ىلە كەشى گازەتى
  • 08:24:24 08/06/2017

    ياسىن جۇپبايەۆ

 

    ايتسام با ەكەن؟ ايتپاسام با ەكەن؟ ايتسام، سونشاما جاپالى، قاربالاس، ءونىمدى جۇمىس ىستەپ جۇرگەن ءىنى، قارىنداستارىم رەنجىپ قالادى-اۋ! ايتپاسام، مىسقالداپ جينالىپ جاتقان وسى ءبىر بولماشى كەمشىلىكتەر جينالا كەلە باتپانداپ، ەمى تابىلماي، ەسىمىزدى شىعارادى-اۋ، ءبىر كۇندەرى! ءوستىپ ەكى ويلى جۇرگەنىمە دە تالاي بولدى. اقىرى ءتىلتاقتادا ساۋساقتارىم قوزعالا باستادى. ايتسام، جامان نيەتپەن ايتقالى وتىرعامىن جوق قوي، اۋەلى، ۇلكەن جاقتان مەنىڭ دە يلەپ جۇرگەن تەرىمنىڭ ءبىر پۇشپاعى. جاقسى نيەتىمدى اۋە تولقىنىندا جۇرگەن قىز، جىگىتتەر تۇسىنەر. راس، شينجياڭ حالىق راديو ستانسياسى قازاق تىلىندەگى راديوسىنىڭ كۇنىنە 19 ساعات (عالامتور ارقىلى 24 ساعات!) باعدارلاما تاراتۋى جۇڭگونىڭ قازاق راديو تاريحىندا عانا ەمەس، بۇكىل قازاق راديو تاريحىنداعى ەڭ ۇلكەن تابىس! بۇل تابىستى بۇكىل حالىق باعالاپ وتىر. جانە ءبىر ايتا كەتەرىم، اۋە تولقىنى ارقىلى تارالىپ جاتقان بارلىق باعدارلامالار ەمەس، تەك ءان-كۇيگە بايلانىستى ەكى اۋىز ءسوز بۇل. قاجەتتى كەزىندە قالعان باعدارلامالار جايلى ايىرىم ايتارمىز.

    ۇيىمدە ەكى شاعىن راديو قابىلداعىش بار. ءبىرى، شينجياڭ حالىق راديوسىنىڭ قازاق تىلىندەگى باعدارلاماسىنا، ەكىنشىسى، ىلە حالىق راديوسىنىڭ قازاق تىلىندەگى باعدارلاماسىنا تەڭشەۋلى. ءار كۇنى ءۇرىمجى ۋاقىتى ساعات بەستە تۇرىپ، شينجياڭ حالىق راديوسىنىڭ باعدارلامالارىن تىڭدايمىن، شامالى ۋاقىتتان سوڭ، ىلە حالىق راديوسى باعدارلاما تاراتادى. ۋاقىتىم بولسا عانا بولدى، ەكى راديو قابىلداعىشتى كەزەك-كەزەك اشىپ، جاۋىپ تىڭداي بەرەمىن. سونان تۇپ-تۋرا ءۇرىمجى ۋاقىتى بويىنشا ءنول ساعاتتا راديو قابىلداعىشتى ەرىكسىز جابامىن دا ۇيقىعا باس قويامىن. ارينە، راديو باعدارلامالارىن تىڭداۋدىڭ جولى بۇل كۇندەرى مۇنان دا كوپ، ونىڭ ءبارىن تىزە بەرۋىمنىڭ قاجەتى شامالى. تەك، راديو باعدارلامالارىنىڭ ىقىلاستى تىڭداۋشىسى ەكەنىمدى ايتۋ. اڭگىمەنىڭ ءبارى وسى ىقىلاستى تىڭداۋشى بولعانىمنان شىعىپ وتىر. ەڭ اۋەلى تىڭدايتىنىم ءان-كۇيلەر. نە ءبىر تاماشا ءان-كۇيلەر بەرىلەدى. ول كەزدە ىستەپ جاتقان جۇمىسىمدى دوعارا تۇرىپ تىڭدايمىن. ال، كەي كەزدە قايداعى ءبىر داڭ-دۇڭ «اندەر» بەرىلەدى دە، كوتەرىڭكى كوڭىل-كۇيگە بىردەن سۋىق سۋ سەبەدى. كەي انشىلەردىڭ ورىنداعان ءان ماتىندەرى مۇلدە قاتە ايتىلادى. بۇل جايلى ءوزىم دە ارنايى ماقالا جازىپ جاريالادىم، تالاي ازاماتتاردىڭ دا بۇل جايلى جازعان ماقالالارىن وقىدىم. ءبارىبىر بۇل ماقالالاردى وقىپ جاتقان ءانشى جوق، تىڭدارمانىمىزدىڭ اڭىسى عوي دەپ ەسكەرىپ جاتقان «راديو» جوق.

    راديو جاستاردى تاربيەلەۋگە كوڭىل بولسە بولادى، ءبىراق، ءان ءماتىنى دۇرىس بولىپ جاتىر ما، ءان اۋەنى جۇرت تالعامىنان شىعا ما دەگەندەردى دە ەسكەرىپ، حالىقتىڭ رۋحاني قاجەتىن قاناعاتتاندىراتىن تاماشا اندەردى كوبىرەك بەرۋگە ءمان بەرۋ كەرەك. ءبىز كوپ كەزدە جاستاردى كىنالاپ جاتامىز: جاستار كونە اندەردى، حالىقتىق اۋەندەردى، قوڭىر اندەردى ۇناتپايدى، قايداعى ءبىر «جاڭا اندەردى» جاقسى كورەدى دەيمىز. بىرىنشىدەن، جاستاردىڭ بارىنە بۇلاي كىنا تاعۋعا بولمايدى. ولاردىڭ دا ءداستۇرلى اندەردى، قوڭىر اۋەندەردى ۇناتىپ تىڭدايتىندارىنا، جاقسى كورىپ ايتاتىندارىنا ءجيى كۋا بولىپ ءجۇرمىز. ەكىنشىدەن، «جاڭا اندەردى» ۇناتاتىن جاستاردىڭ دا تالعامىنا قۇرمەت ەتۋىمىز كەرەك. ءبىراق، ءان ءماتىنىن بۇزباي ايتۋ، ءاننىڭ بۇرىنعى اۋەنىن قالاۋىنشا وزگەرتىپ ايتپاي، بۇرىنعى ۇلگىسىن ساقتاپ ايتۋ بارلىق انشىگە قويىلار ورتاق تالاپ بولۋى كەرەك.

جاۋاپتى رەداكتور: جازيرا بولاتباي قىزى