سولتۇستىك شينجياڭ «التىن اتىراۋ» ساياحات ارناۋلى پويەزى ماۋسىمنىڭ 15 – كۇنى جولعا شىعادى

  • كەلۋ قاينارى: ىلە گازەتى
  • 03:41:56 10/06/2017

    ساياحات كورىنىس رايوندارى تۇتاستىرىلادى، ساياحاتشىلار ءىرى الەۋمەتتىك اۆتوكولىكپەن ساياحات تۇيىندەرىنە جەتكىزىلەدى، ساياحات پويەزى بايتاق ءوڭىردى شارلايدى

 

    ءتىلشىمىز لي جيانپيڭ حابارلايدى. ىلە مەن التايدى «الەۋمەتتىك اۆتو كولىك سەپتەۋ» ۇلگىسىمەن ساياحاتتاۋ جۋىقتا جۇزەگە اسىرىلادى. ءتىلشىنىڭ ماۋسىمنىڭ 8 – كۇنى «پويەزگە وتىرىپ شينجياڭدى ساياحاتتاۋ، ياعني سولتۇستىك شينجياڭدى ارالاۋ ‹التىن اتىراۋ› ساياحات ارناۋلى پويەزىنىڭ جولعا شىعۋى جونىندەگى تىلشىلەردى قابىلداۋ ماجىلىسىنەن» ۇعىسۋىنا قاراعاندا، شينجياڭنىڭ تەمىر جول تاراۋلارى ماۋسىمنىڭ 15 – كۇنىنەن قازاننىڭ 7 – كۇنىنە دەيىن سولتۇستىك شينجياڭدى ارالايتىن «التىن اتىراۋ» ساياحات ارناۋلى پويەزىنەن كۇنىنە ەكى پويەزدى اتتاندىرماق، جالپى 230 پويەز قاتىناماق.

    ماۋسىمنىڭ 15 – كۇنى رەسمي جولعا شىعاتىن سولتۇستىك شينجياڭ «التىن اتىراۋ» ارناۋلى ساياحات پويەزىنە جەلىسى، ورىنى، ۋاقىتى بەلگىلەنگەن «الەۋمەتتىك اۆتوكولىك سەپتەۋ» ۇلگىسى قولدانىلعان، ءار كۇنى قۇلجا مەن التايعا قوس باعىتتا پويەز قاتىنايدى، پويەز ءۇرىمجى، قۇلجا، التاي سىندى 3 جەردى باسىپ وتەدى. جول بويى قاناس، نارات ساحاراسى، سايرام كولى، بايىنبۇلاق سياقتى كوپتەگەن تاڭداۋلى ساياحات كورىنىس رايوندارىنىڭ كورىنىس تۇيىندەرىنە ساياحاتشىلاردى الەۋمەتتىك اۆتوكولىكتەرمەن جەتكىزەدى. ساياحاتشىلار ۇزاق، ورتا، قىسقا ارالىقتى ساياحاتتى يكەمدى دە ءونىمدى ورنالاستىرا الادى، ساپار ۋاقىتى دا ۇنەمدەلەدى.

    سولتۇستىك شينجياڭ «التىن اتىراۋ» ساياحات پويەزى ءۇرىمجى بەكەتىن العاشقى، سوڭعى بەكەت ەتىپ، ساعات سترەلكاسى باعىتىندا قۇلجاعا، ساعات سترەلكاسىنا قارسى باعىتتا التايعا قاراي جولعا شىعىپ، قوس باعىتتا اينالمالى قاتىنايدى، جالپى قاتىناۋ ارالىعى 2 مىڭ 264 كيلومەترگە، قاتىناۋ ۋاقىتى 32 ساعاتقا جەتەدى.

    ءۇرىمجى – قۇلجا – التاي – ءۇرىمجى «ساعات سترەلكاسى» باعىتىندا Y951، Y956/7، Y954 كەزەكتى پويەزىنىڭ قاتىناۋ لەنياسى: ءۇرىمجى – قۇلجا – التاي – ءۇرىمجى. ءۇرىمجى – قۇلجا بولەگىندەگى پويەزگە وتىرۋ – بويەزدەن ءتۇسۋ بەكەتتەرى: ءۇرىمجى، شىحىزى، كۇيتۇن، قۇلجا؛ قۇلجا – التاي بولەگىندەگى بويەزگە وتىرۋ – پويەزدەن ءتۇسۋ بەكەتتەرى: قۇلجا، كۇيتۇن، قارامايلى، بۋرىلتوعاي، بەيتۇن، التاي؛ التاي - ءۇرىمجى بولەگىندەگى پويەزگە وتىرۋ – پويەزدەن ءتۇسۋ بەكەتتەرى: التاي، بەيتۇن، بۋرىلتوعاي، قارامايلى، كۇيتۇن، شىحىزى، ءۇرىمجى. Y951، Y956/7، Y954 كەزەكتى پويەزدەرى ءۇرىمجى بەكەتىنەن ءار كۇنى ساعات 20:35 تە جولعا شىعىپ، ەرتەسى ساعات 6:30 دا قۇلجاعا جەتەدى، ساعات 18:58 دە بەيتۇنگە، ساعات 20:24 تە التايعا جەتەدى، ساعات 22:20 دا التايدان بەيتۇنگە ورالادى، ءۇشىنشى كۇنى ساعات 7:03 تە ۇرىمجىگە جەتەدى.

جاۋاپتى رەداكتور: بەرىك وقاباي ۇلى