دالالىق جارىستىڭ دارابوزى

  • كەلۋ قاينارى: ىلە كەشى گازەتى
  • 12:26:05 23/06/2017

       سەرىك سابىر ۇلى (ءوز ءتىلىشىمىز)

 

    ءتىلشى ەسكەرتپەسى: ۇلى تابيعات پەن ادام جانىنىڭ جاراسىمدىلىعىن دارىپتەگەن، جۇگىرۋ، ۆەلەسيپەد ءمىنۋ، قايىق ەسۋ سياقتى ءتۇرلى جارىس ءتۇرىن قامتىعان دالالىق جارىس 20 – عاسىردىڭ باسىندا جارىققا شىقتى. 1989 – جىلى جاڭا زەللانديادا تۇڭعىش رەت دالالىق جارىس سايىسىنىڭ تۇساۋى كەسىلگەننەن بەرى ءتۇرلى فورماداعى دالالىق جارىس تورتكىل دۇنيەدە كەڭىنەن جالپلاسا باستادى.

    جۋىقتاعى جىلداردان بەرى ەلىمىزدە ءتۇرلى فورماداعى دالالىق جارىس ىلگەرى – كەيىندى وتكىزىلدى، مۇندا ەكى مايدان جارىس اۆتونوميالى رايونىمىزدا وتكىزىلدى. وتە – موتە، سايرام كولى جاعاسىندا وتكىزىلگەن ۆەلەسيپەد جارىسى مەن قاناس كولى جاعاسىندا وتكىزىلگەن دالالىق جارىس سايىسى كورەرمەنىن ءتانتت ەتىپ وتىر. وسىنداي دالالىق جارىس تۇرىندە ەلىمىز دالا جۇگىرىسىنىڭ مايتالمانى، دالالىق جۇگىرىستە مەملەكەتتىك ەڭ ۇزدىك سپورتشى اتانعان، مەملەكەتتىك 1 – دارەجەلى سپورتشى ەرسىن شوقىن ۇلى باستاعان ءتورت ادامنان قۇرام تاپقان ەلىمىز كومانداسى « 2016 – جىلعى دۇنيە جۇزىلىك التاي حالىقارالىق دالا جارىسىندا» ازيا بويىنشا باس جۇلدەنى العان بولاتىن. وسىعان وراي ەرسىننىڭ سپورت جولىن وقىرمانعا تانىستىرۋدى ءجون كوردىم.

    جۇزدەن جۇيرىك، مىڭنان تۇلپار بولىپ شاشاسىنا شاڭ جۇقتىرماي قارا وزىپ شاپقان تالانتتى سپورتشى ەرسىن شوقىن ۇلى 2017 – جىلى قاڭتاردىڭ 8 – كۇنى جاڭا زەللانديا، تايۋان، شياڭگاڭ سياقتى ەلدەر مەن رايوننان كەلگەن 200 گە جۋىق كاسىپتىك سپورتشى قاتىناسقان، ەلىمىزدىڭ جىجياڭ ولكەسىنىڭ ديڭحاي ساياحات رايونىندا وتكىزىلگەن 2 – رەتكى دالالىق جۇگىرۋ تۇرىندە 5 ساعات 5 مينۋتتىق ناتيجەمەن 50 كيلومەتردە اعا جۇلدەگەر بولدى.

    تاۋىق جىلى ماۋسىمنىڭ باس شەنى، ەرسىن شوقىن ۇلىنىڭ ءۇنحات دوستىق شەڭبەرىنە شىعارعان 2 – رەتكى دۇڭحاي شاتقالى دالالىق جارىسى مەن بەيجيڭ 100 كيلومەترلىك جارىسىندا قول جەتكىزگەن مەدالى مەن لوڭقا سۋرەتىن كورىپ، قۇتتى بولسىن ايتىپ، الدا قاتىناساتىن 168 كيلومەترلىك حالىقارالىق دالالىق جارىسىنا اق جول تىلەپ تاقىم قىسقان ەدىك.

    ۇعىسۋعا قاراعاندا، 2017 – جىلى ماۋسىمنىڭ 17 – كۇنى التاي ايماعىنىڭ قاناس كولى بويىندا وتكىزىلگەن 168 كيلومەترلىك حالىقارالىق دالالىق جارىس رايونىمىزدا وتكىزىلەتىن بىردەن – ءبىر كولەمدى دالالىق جارىس ءارى ۇپاي جينايتىن جارىس بولعاندىقتان، جەلاياقتار جارىستا جاقسى ناتيجە جاراتسا، حالىقارالىق كولەمدى جارىسقا قاتىناسۋ ۇقىعىنا قول جەتكىزە الادى ەكەن. وسى تۇردەگى 168 كيلومەترلىك دالالىق جارىس سايىسىنا ەرسىن شوقىن ۇلى تۇڭعىش رەت قاتىناسىپ وتىر، مۇنىڭ الدىندا 100 كيلومەترلىك دالالىق جارىسقا قاتىناسىپ كىشى جۇلدەگەر بولعان ەدى، ءۇنحات ارقىلى ودان جارىس جونىندەگى دايىندىعىن سۇراعانىمدا ول بىلاي دەدى: بۇل رەتكى جارىستىڭ جارىس جولى كۇردەلى، ارالىعى ۇزاق، دەسە دە دايىندىعىم مىعىم، ناتيجە جاراتۋعا قۇلشىنامىن. ءبىر جاعىنان جوعارداعى جارىسقا قاتىناسۋعا دايىندىق كورسەم ، ەندى ءبىر جاعىنان 2022 – جىلعى قىسقى وليپمپيادا جارىسىنىڭ سارالاۋىنا ( دالالىق جارىسىنىڭ قاردا سىرعانۋ تۇرىندەگى ىرىكتەۋگە) قاتىناستىم، قازىرگە دەيىن ءۇش رەتكى سارالاۋدا سۇرىنبەي ءوتتىم. سوڭعى ناتيجەسىن توسۋدامىن. جولىم بولىپ، 2022 – جىلعى قىسقى وليمپيادا دوداسىندا ەلىمىزدىڭ داڭقىن اۋەلەتسەم يگى ەدى.

جاۋاپتى رەداكتور: جازيرا بولاتباي قىزى