جالعان اتاققا نەگە قۇمارمىز

  • كەلۋ قاينارى: شينجياڭ زاڭ جانە تۇرمىس گازەتى
  • 08:30:39 28/06/2017

    ارزىگۇل ابدەش قىزى

    

    اتا، ءسىز بىلەسىز بە؟ ءوزىڭىز ءالى تىم كىشكەنە دەپ قارايتىن «جامان»قىزىڭىز كەي تاڭدارىن ۇيقىسىز اتىراتىن بولىپ ءجۇر. قىزىمنىڭ ۇيقىسىن ۇرلاعان كىم دەرسىز، باياعى سول ءوز ورتامىزداعى كەيبىر ءبىلىمسىز جانداردىڭ جارامسىز قىلىقتارى عوي. التىنمەن اپتالىپ، كۇمىسپەن قاپتالعاندار قىزىڭىزدى قىزىقتىرمايتىن بولدى. ونان گورى قىزىڭىزدىڭ كوز الدىنا كۇمىس تاققان جەسىر انانىڭ قالايدان قالاي ەڭبەكشىل ازاماتتاردى جەتىلدىرگەنى كوپ ەلەستەيدى. قالالارداعى قىزىلدى - جاسىلعا قۇمارتىپ، قاشان قاراساڭ، كارتچكامەن جوعارى دارەجەلى تۇتىنۋدا جۇرەتىن، ءار الۋان كوڭىل اشۋ ورىندارىن جاعالاپ، «جۇرەگىن» ءار كىممەن بولىسەتىندەر، ءوزىن ءارقاشان كوڭىلدى، باي دا باقۋاتتى كورسەتكىسى كەلەتىندەر قىزىڭىزدى مۇلدە قىزىقتىرمايتىن. ويتكەنى ولاردىڭ قىلىقسىز قىلىقتارى مەن اكە - شەشەسىنىڭ قان -تەرىن سۇلىكتەي سورعانى ەسىنە تۇسكەندە، قىزىڭىزدىڭ كوز الدىنا تاعى تۇسىندە كورۋ ءبىر ارمان بولعان اكە ارۋاعىن قالاي قۋاندىرۋدى ويلايتىن جەتىم قىز ەلەستەيدى...

    اتا، قايسى كۇنگى اڭگىمەڭىز دە اقپاراتتاردا قىزۋ تالقى تۇيىنىنە اينالعان بەيجيڭ ۋنيۆەرسيتەتىندەگى ءبىر پروفەسسوردىڭ تاۋ اراسىندا ايەلىمەن بىرگە ىڭ -دىڭسىز 27 جىلدى وتكىزگەنىن ايتقان ەدىڭىز. العاشىندا بۇعان سەنەر- سەنبەسىمدى بىلمەي، تاڭ قالدىم. باسىمدى قاتىرعانى «ايەلى سونداي تۇرمىسقا قالاي كوندىكتى» دەيتىن سۇراق بولدى. ويتكەنى ايەلى دە بەيجيڭ ۋنيۆەرسيتەتىنىڭ بىلدەي اسپيرانتىنىڭ ءبىرى عوي، قالا تۇرمىسى مەن اتاعى جەر جارعان ۋنيۋەرسيتەتتەگى ىرعىن شاقتاردى قالاي قيدى ەكەن دەيمىن، مەيلى قالاي بولسا دا، ءاسىلى ولار اتاقتى ۋنيۆەرسيتەتتىڭ ىقپالدى كەيىپكەرلەرى ەمەس پە ەدى؟ نە ءۇشىن وسىنداي باتىل قادامعا باردى ەكەن...

    ولاردىڭ تاۋداعى تۇرمىسىنا ءۇڭىلىپ وتىرمىن، تاۋلى وڭىردەن تىڭ اشىپ، اعاش ەگىپ، كوكونىس ءوسىرىپتى. تابيعي ونىمدەر تۇتىنىپ، قاراپايىم تۇرمىس كەشىرىپتى. ءاسىلى بۇلاردىڭ بارلىعىنان ۋاز كەشىپ، ىزدەپ ءجۇرىپ تاپقان تىرشىلىگى ءبىزدىڭ قاراپايىم مالشىلارىمىزدىڭ كۇندەلىكتى ءومىرى ەمەس پە؟ سيىرىن ساۋىپ، ءسۇتىن ءوزى نەمەسە كورشىلەرىمەن بىرگە تۇتىناتىن، قۇرتى دا، مايى دا، ەتى دە وزىنەن. كەرەك دەسە تەرىدەن كيىم دە يلەپ الادى. ءوزى باققان قويىنىڭ ءجۇنى دە كەرەگىنە جاراپ تۇر. سىمەرلەرى بايپاقتان تارتىپ قولعاپقا دەيىن، پوپايكا مەن شەكپەنگە دەيىن توقىپ الادى. اتاق داڭىققا تالاسۋدان، جالعاندىقتان، ادىلەتسىزدىكتەن اۋلاق پەرىشتە تىرلىك ەمەس پە ەدى؟ ! انتەك قادىرىن بىلمەي تۇرعاندايمىز...

    اتا، ءبىز بۇگىنگىدەي مىناۋ جاھاندانۋ ۇردىسىندە ءوزىمىزدى تانىماي قالعانداي سەزىنەمىن. كەشە عانا اۋىلعا بارىپ كەلدىم، كورشىسى سالدىرعان ءۇيدىڭ ۇلگىسىندە ءۇي سالام دەپ تىرتىڭداعان اعايىم 180 كۆادراتتىق ءۇي سالدىرىپ جاتىپتى. «كورپەگە قاراي كوسىل، شاماعا قاراي شارىقتا» دەيتىن تاعىلىمدى تارس ۇمىتقان سىڭايلى. قالاداعى تەنتەگىنىڭ دە كۇيى اناۋ، كەشە عانا قىزمەتتىڭ قۇلاعىن ۇستاعان، قارعا ادىم جەردەگى مەكەمەسىنە نەسيەگە كولىك ءمىنىپ، شىتىرايادى. ءوزىن وقىتىپ، ءوڭى تۇسكەن شاپاندى ون جىل كيگەن اكەسىنە ءالى ءبىر ساۋعا سيلاماعانى ەسىنە كەلەر ەمەس. ەسەسىنە جىلتىراپ كيىنگەنىن، نەسيەگە كولىك مىنگەنىن بارىنە جەتكەنگە بالاعانداي!

جاۋاپتى رەداكتور: جازيرا بولاتباي قىزى