كوكونىستى ەكى ءتۇرلى زياندى جاندىكتەن ساقتاۋ جونىندە

  • كەلۋ قاينارى: ىلە گازەتى
  • 02:36:21 30/06/2017

      مۇقتار كادىرقان ۇلى

 

    كوكونىس كوبەلەگى جانە جاپىراق شىركەيى سياقتى زياندى جاندىكتەر كوكتەم، جاز ايلارىندا كوبىرەك پايدا بولىپ، كوكونىس مايساسىنىڭ ساباق–جاپىراعىنىڭ ءنىلىن سورىپ، ءوسىپ–جەتىلۋىن شەكتەمەگە ۇشىراتادى ءارى كوكونىس دەرت–دەربەزىنىڭ پايدا بولۋىنا جانامالاي سەبەپشى بولادى. سوندىقتان كوكونىس ەگىلگەن جەرلەردە جوعارىداعى زياندى جاندىكتەردىڭ پايدا بولۋ زاڭدىلىعى مەن ءوسىپ–ءوربۋ ەرەكشەلىگىنە نەگىزدەلە وتىرىپ ساقتانۋدىڭ شارالارىن، ياعني ەگىستىك شارالارىن نەگىز ەتىپ، حيميالىق ءدارى ارقىلى ساقتانۋ ءتاسىلىن قولدانۋ كەرەك.

    پايدا بولۋ بەينەسى جانە ءوسىپ–ءوربۋ ەرەكشەلىگى. كوكونىس كوبەلەگى كوكونىس كىشكەنە كوبەلەگى دەپ تە اتالادى. ول باستىسى، جازدىق بايساي، كۇزدىك بايساي، كاپۋستا سياقتى كرەست گۇلدى كوكونىس تۇقىمداسىنا جاتاتىن كوكونىستەردى زياندايدى.

    بۇل كوبەلەكتىڭ ومىرشەڭدىك قۋاتى كۇشتى بولىپ، كوكتەمنەن كۇزگە دەيىن ءوسىپ–ءوربىپ زيان سالادى. جەتىلگەن كوبەلەكتەرى اۋا تەمپەراتۋراسى جوعارىلاعاندا كۇندىز جاسىرىنىپ، تۇندە ارەكەتتەنىپ، كوكونىس مايساسىنا زيان سالادى. ونىڭ ۇستىنە، جوعارى تەمپەراتۋرا نەمەسە قۇرعاق ورتادا تەز ءوسىپ ـ ءوربيدى. ونىڭ وسىنداي ەرەكشەلىگىنە نەگىزدەلە وتىرىپ، ەرتەرەك بايقاپ، ەرتەرەك ساقتانۋعا كۇش سالۋ كەرەك. مۇندا، تومەندەگى شارالاردى قولدانۋعا بولادى.

    ەگىستىك شارالارىن قولدانىپ ساقتانۋ. كرەست گۇلدەر تۇقىمداسىنا جاتاتىن كوكونىستەردى ۇنەمى ءبىر جەرگە ەگۋدى وزگەرتىپ، باسقا تۇردەگى كوكونىستەرمەن اڭىز الماستىرىپ ەگۋ كەرەك. مۇندا، كوكونىستى جيىپ العاننان كەيىن قالعان ساباق–جاپىراقتارى مەن شوپتەردى دەركەزىندە جيىپ كومىپ تاستاۋ نەمەسە ايرىم جەرگە اپارىپ ورتەۋ كەرەك. اڭىزدى تەرەڭىرەك جىرتىپ، كوكونىس كوبەلەگىنىڭ تىرشىلىك ورتاسىن بۇزىپ، كوكونىس كوبەلەگىنىڭ تابيعي جاۋلارىن، ياعني كوكونىس كوبەلەگىن جوياتىن ارا تەكتەس پايدالى جاندىكتەردى قورعاۋعا ءمان بەرۋ كەرەك.

    ءدارى ارقىلى جويۋ. %90 تىك ديپتەرەكستىڭ (敌百虫) ەسە سۇيىلتىلعان ەرىتىندىسىن نەمەسە %80 تىك DVD ەمۋلتسياسىنىڭ 1000 ەسە سۇيىلتىلعان ەرىتىندىسىن توزاڭداتىپ بۇركىپ بەرۋ كەرەك. جاسىل قۇرتتى جوعالتۋ باكتەرياسى (绿僵菌) مەن ديپتەرەكس نەمەسە DVD دى ارالاستىرىپ ىستەتسە ءدارىنىڭ ءونىمىن ارتتىرۋعا جانە باسقا زياندى جاندىكتەردەن ساقتانۋعا بولادى. زياندى جاندىكتەردى جوعالتۋ ءونىمىن جوعارىلاتۋ ءۇشىن تەمپەراتۋرا جوعارى بولعان مەزگىلدە ءدارىنى تاڭەرتەڭ جانە كەشتە بۇركىپ، جاپىراقتاردىڭ الدى–ارتىنا تەگىس بۇركۋ كەرەك.

    جاپىراق شىركەيىنىڭ باستى زيانى. جاپىراق شىركەيى كرەست گۇلدەر تۇقىمداسىنا جاتاتىن كوكونىستەردى زيانداۋدان سىرت، القا، اسقاباق، بۇرشاق تەكتەستەرگە جانە كارتوپ، شپينات سياقتى الۋان ءتۇرلى كوكونىستەرگە زيان جەتكىزەدى. جاپىراق شىركەيى، ادەتتە، كوكونىس جاپىراعىنىڭ ارتىنا جابىسىپ الىپ، كوكونىستىڭ شىرىنىن سورىپ زياندايدى. وسى سەبەپتى كاپۋستا، كۇزدىك بايساي سياقتى كوكونىستەردىڭ ءوسۋى شەكتەمەگە ۇشىراپ، مۋ باسىندىق ءتۇسىمى مەن ساپاسى تۇرلىشە دارەجەدە تومەندەيدى. بۇدان تىس، جاپىراق شىركەيى كوكونىستەرگە ۆيرۋس ميكروبىن تاراتاتىن فاكتوردىڭ ءبىرى بولىپ، جاپىراق شىركەيى پايدا بولعان جەردە كوكونىس ۆيرۋس دەرتى دە وڭاي پايدا بولادى. سوندىقتان جاپىراق شىركەيىنەن ساقتانۋ ۆيرۋس دەرتىنەن ساقتانۋداعى شارالاردىڭ ءبىرى ەسەپتەلەدى.

 

جاۋاپتى رەداكتور: گۇلدەن ماقسات قىزى