قۇمىل قاۋىنىن دەرت–دەربەزدەن ساقتاۋ ءادىسى

  • كەلۋ قاينارى: ىلە گازەتى
  • 02:38:51 30/06/2017

كادىرقان ءابىلقايىر ۇلى

 

    قۇمىل قاۋىنى ءوسىپ–جەتىلۋ بارىسىندا دەرت–دەربەزدەرگە شالدىقسا بىرلىك ءونىمى مەن ساپاسى تومەندەپ كەتەدى. سوندىقتان اڭىز اۋىستىرىپ ەگۋ، جەل ءتيىپ تۇراتىن كوتەرىڭكى جەرگە ەگۋ، اۋلا تىڭايتقىشىن نەگىز ەتىپ، حيميالىق تىڭايتقىشتى ۇيلەسىمدى ىستەتىپ، دەرت–دەربەزگە ءتوزىمدى سورتتاردى تاڭداپ ەگۋ جانە تۇقىمعا ءدارى ارالاستىرىپ ەگۋ سياقتى شارالاردى قولدانىپ، باپتاپ–باسقارۋ جۇمىسىن مۇقيات ىستەۋ تالاپ ەتىلەدى.

    توپىراعىن قوپسىتىپ، ارام ءشوبىن وتاۋ. قۇمىل قاۋىنىنىڭ مايساسى جەر بەتىنە كوكتەپ شىققاننان كەيىن مايسا تۇراقتاندىرۋمەن بىرگە، توپىراعىن قوپسىتىپ، ارام ءشوبىن وتاۋ جۇمىسىن ءبىرقانشا رەت جۇرگىزۋ كەرەك. وسىلاي ىستەۋ ارقىلى توپىراقتىڭ دىمقىلدىعىن ساقتاپ، توپىراقتىڭ اۋا، جىلۋ وتكىزۋىن جاقسارتىپ، دەرت–دەربەز ميكروبىنىڭ پايدا بولۋ مولشەرىن ازايتۋعا بولادى.

    سۋارۋ. قۇمىل قاۋىنىنىڭ العاشقى ءوسىپ–جەتىلۋ مەزگىلىندە سۋعا بولعان تالابى ونشا جوعارى بولمايدى دا، مايساسى جەلى تارتىپ وسۋدەن ءتۇيىن تاستاپ، ءتۇيىنى ۇلكەيە باستاعان مەزگىلدە سۋعا بولعان قاجەتى ارتا تۇسەدى. وسى مەزگىلدە اۋا رايى جاعدايىنا، توپىراق دىمقىلدىعى مەن مايسانىڭ ءوسۋ جاعدايىنا قاراي وتىرىپ قالىپتى سۋارۋعا بارىنشا كوڭىل ءبولىپ، قاپتاتىپ سۋارىپ، سۋدىڭ ىركىلىپ قالۋىنان ساقتانۋ كەرەك. ەگەر اتىز توپىراعىنىڭ دىمقىلدىعى قالىپتان اسىپ كەتسە، ونىڭ ۇستىنە، اۋا تىمىرسىق بولىپ جەل شىقپاسا، دەرتتى ميكروبتىڭ جاندانۋىنا جانە زيان سالۋىنا ءتيىمدى وراي جاراتىلادى.

    تىڭايتقىشتى ۇيلەسىمدى بەرۋ. قۇمىل قاۋىنى ەگىلەتىن اتىزعا اۋلا تىڭايتقىشىن نەگىز ەتىپ بەرىپ، تۇقىم سىڭىرۋمەن بىرلەستىرىپ ازوت، فوسفور قوسىلىستى تىڭايتقىشتان ۇيلەسىمدى مولشەردە بەرىپ، مايسا جەلى تارتىپ، ءتۇيىن تاستاعان مەزگىلدە توپىراقتىڭ قۇنارلىلىعى مەن مايسانىڭ ءوسۋ جاعدايىنا قاراي وتىرىپ، ازوت، فوسفور، كاليلى تىڭايتقىشتان ۇيلەسىمدى مولشەردە سايكەستىرىپ بەرىپ، ورتاڭعى مەزگىلدە، ياعني قاۋىن ۇلكەيۋ مەزگىلىندە ازوتتى تىڭايتقىشتى بەرۋدى تەجەپ، تەز ءونىم بەرەتىن جاپىراق تىڭايتقىشىن بەرۋ كەرەك.

    بۇتاۋ. قاۋىن جەلى تارتىپ ءوسىپ بۇتاقتاعان مەزگىلدە باسى ارتىق بۇتاقتاردى دەركەزىندە بۇتاپ وتىرسا قورەكتىك زاتتار مەن سۋدىڭ ىسىراپ بولۋىن تەجەۋمەن بىرگە، اتىزدىڭ اۋا الماسۋىن جاقسارتۋعا بولادى. قاۋىن ۇلكەيىپ تولىسۋ مەزگىلىندە، اسىرەسە، اتىزدى سۋارعاننان نەمەسە جاڭبىر جاۋعاننان كەيىن قاۋىندى ءار ۋاقىت اۋدارىستىرىپ تۇرۋ ارقىلى استى–ءۇستىنىڭ بىركەلكى پىسۋىنا كەپىلدىك ەتۋگە جانە دەرتكە شالدىعۋ حاۋپىن جەڭىلدەتۋگە بولادى. قاۋىن مايساسى شىققاننان باستاپ اتىزدى ۇنەمى قاداعالاپ تەكسەرىپ، ساباق–جاپىراعى، ءتۇيىنى دەرتتەنگەن بولسا، ۋاقىتتى وتكىزبەي دەركەزىندە جويۋ ادىستەرىن قولدانىپ، جەرگىلىكتى ورىنداعى اگرو تەحنيكتەردىڭ جەتەكشىلىگىندە دەرتتىڭ ءتۇرىن تۇراقتاندىرىپ، ميكروب ولتىرەتىن دارىلەردى دەركەزىندە شاشىپ، دەرت–دەربەزدەردىڭ جالعاستى ۇلعايۋىنان ساقتانۋ كەرەك.

    قورىتىپ ايتقاندا، قۇمىل قاۋىنىن باپتاۋ بارىسىندا دەرت–دەربەزدەردەن ساقتانۋدىڭ، جويۋدىڭ كوپ جاقتى ادىستەرىن جەرگىلىكتى جاعدايعا قاراي وتىرىپ قولدانا بىلگەندە دەرت–دەربەزدىڭ پايدا بولۋ مولشەرىن كورنەكتى تەجەپ، بىرلىك ءونىمى مەن ساپاسىن جوعارىلاتىپ، ەكونوميكالىق ونىمدىلىگىن ارتتىرۋ ماقساتىنا جەتۋگە بولادى.

جاۋاپتى رەداكتور: گۇلدەن ماقسات قىزى