مول ءونىمدى كوك سۇرلەم جۇگەرىسىن باپتاۋ تۇيىندەرى

  • كەلۋ قاينارى: ىلە گازەتى
  • 02:41:20 30/06/2017

    كادىرقان ءابىلقايىر ۇلى

 

   كوك سۇرلەم جۇگەرىسىنىڭ ءونىم ارتتىرۋداعى كومەسكى كۇشى زور، ەكونوميكالىق ونىمدىلىگى جوعارى. رايونىمىزدىڭ كوپ ساندى ەگىن، مال شارۋاشىلىق وڭىرلەرىنىڭ اۋا كليماتى، سۋى، توپىراعى كوك سۇرلەم باسۋعا ىستەتىلەتىن جۇگەرى سورتتارىن ەگىپ–وسىرۋگە قولايلى بولىپ، تەحنيكالىق تالاپ بويىنشا ەككەندە مۋ باسىندىق ءونىمىن كورنەكتى ارتتىرىپ، ەكونوميكالىق ونىمدىلىگىن جوعارىلاتۋعا بولادى.

    جۋىق جىلداردان بەرى التاي ايماعى كولەمىندەگى ەگىنشىلىك وڭىرلەردە ساۋىن سيىر باعاتىن ورىنداردا جانە ءبىر ءبولىم وتىرىقتانعان مالشىلىق قىستاقتاردا كوك سۇرلەم جۇگەرىسىن جىل سايىن كەڭەيتىپ ەگۋ ءجايتى جارىققا شىعىپ، ساپالى جەم–شوپتىك داقىلداردى مولىنان ءوندىرۋ تەبىنى ارتا ءتۇستى. الايدا ءىشىنارا وڭىرلەردە كوك سۇرلەم جۇگەرىسىن مول ءونىم الۋ تالابى بويىنشا باپتاپ–باسقارۋعا ونشا كوڭىل بولمەيتىن، جۇيەدەن، ورتاڭعى جانە سوڭعى ءوسىپ–جەتىلۋ مەزگىلىندەگى باپتاپ–باسقارۋ شارالارىن بوساڭسىتىپ قوياتىن نەمەسە كوك سۇرلەم جۇگەرىسىن دەركەزىندە ورىپ الۋ جۇمىسىن مىقتى يگەرمەۋ قۇبىلىسى ساقتالىپ وتىر. سوندىقتان مول ءونىمدى كوك سۇرلەم جۇگەرىسىنىڭ مايساسىن باپتاپ–باسقارۋدا تومەندەگىدەي تۇيىندەرگە كوڭىل ءبولۋ كەرەك.

    ۇستەمە تىڭايتقىشتى جەتكىلىكتى بەرۋ. جۇگەرىنىڭ تۇتاس ءوسىپ–جەتىلۋ بارىسىندا اۋلا تىڭايتقىشىن نەگىز ەتىپ، ازوت، فوسفور، كالي سياقتى تەز ءونىمدى حيميالىق تىڭايتقىشتاردى قوسىمشا ەتىپ بەرۋ كەرەك. مۇنىڭ ىشىندە ازوتتى تىڭايتقىش ۋرەانىڭ %60–%50 ىن، فوسفور، كالي قۇرامدى تىڭايتقىشتاردىڭ %30 ىن جۇگەرىنىڭ مايسا مەزگىلىندە ۇستەمە تىڭايتقىش رەتىندە بەرۋ كەرەك. مۇندا، ۋرەانىڭ ءار مۋ جەرگە ىستەتىلۋ مولشەرى 20 كيلوگرامنان، فوسفور، كالي قۇرامدى تىڭايتقىش 15 كيلوگرامنان كەم بولماۋى كەرەك. ۇستەمە تىڭايتقىش كوبىنەسە ەكىنشى رەتكى اتىز توپىراعىن قوپسىتۋ جانە سۋارۋمەن ۇشتاستىرىلىپ بەرىلەدى. ەگەر جۇگەرىنىڭ ساباعى بوي تارتىپ ءوسىپ، ورتاڭعى ءوسىپ–جەتىلۋ مەزگىلىنە جەتكەندە جاپىراعىندا سارعايۋ نەمەسە استىڭعى جاپىراقتارى ءتۇسۋ ءجايتى كورىلسە ۋرەادان 5–10 كيلوگرامدى جالعاستى ۇستەمەلەپ بەرۋ كەرەك.

    سۋارۋ. كوك سۇرلەم جۇگەرىسى تۇتاس ءوسىپ–جەتىلۋ بارىسىندا اۋا رايى، اتىز توپىراعىنىڭ دىمقىلدىعى جانە مايسانىڭ ءوسۋ جاعدايىنا قاراي ادەتتە 4–6 رەتكە دەيىن سۋارىلادى. ءبىرىنشى رەتكىسى ۇستەمە تىڭايتقىش بەرىلگەننەن كەيىن بەرىلەدى، مۇندا، نەعۇرلىم ءسىڭىرىپ سۋارۋ، ورتاڭعى جانە سوڭعى ءوسىپ–جەتىلۋ مەزگىلىندە قالىپتى سۋارىپ، اتىز توپىراعىنىڭ دىمقىلدىعىنا كەپىلدىك ەتىپ، مول سۋمەن سۋارۋدان بولاتىن جۇگەرى مايساسىنىڭ جاپىرىلۋىنان ساقتانۋ كەرەك.

    زياندى جاندىكتەردى جويۋ. كوك سۇرلەم جۇگەرىسىنىڭ العاشقى مايسا مەزگىلىندە جەر جولبارىسىنىڭ بالاپان قۇرتى ساباق–جاپىراعىن كەمىرىپ زيان سالۋ ءجايىتى بايقالسا، قۇرت ولتىرۋگە ىستەتىلەتىن %25 تىك ديشاسىنىڭ مايلى سۇتشەسىن ءبىر مىڭ 500 ەسە سۇيىلتىپ مايساعا بۇركىپ بەرۋ نەمەسە جەم شاشىپ شىرعالاپ جويۋ ءادىسىن قولدانۋ كەرەك. مۇندا، بالاۋسا جوڭىشقانى ۇساقتاپ تۋراپ، كەبەك نەمەسە كۇنجاراعا ارالاستىرىپ، وعان 200 ەسە سۇيىلتىلعان %50 تىك پوكسيمدى قوسىپ ابدەن ارالاستىرىپ، كۇن باتاردان بۇرىن جۇگەرى مايساسىنىڭ قاتار ارالىعىنا شاشىپ قويۋ كەرەك.

جاۋاپتى رەداكتور: گۇلدەن ماقسات قىزى