سايدىراحماننىڭ ساناتتى سوزدەرى

  • كەلۋ قاينارى: ىلە كەشى گازەتى
  • 07:57:10 04/07/2017

    ******

    الدە ءبىر جۇمىستى بىتىرە الماي كەلگەن سايدىراحمانعا اكەسى: «سەندە اقىل جوق، مىناۋىڭ نە؟» دەپ ۇرسىپتى. سوندا ساكەڭ:

    -مەندە قايدان اقىل بولسىن؟ ءوزىڭىز ابدەن اقىلىڭىز ازايعاندا، قايراتىڭىز قايتقاندا دۇنيەگە كەلتىرگەن بالادان نە سۇرايسىز؟!-دەپ ۇلكەن كىسنى جەڭىپ تاستاپتى.

    ******

    ادەتتە شەشەسىنە جاقسى قارامايتىن بىرەۋ قۇرانحاتىم تۇسىرتپەكشى بولىپ ءبىر شالا موللاسۇرەيدى ەرتىپ كەلىپتى. اناۋ ونى قومسىنىپ:

    -مىنا وقىعانىڭ بولا ما؟-دەسە كەرەك. سوندا سايدىراحمان:

    -قۇتىلا الماي ارەڭ قۇتىلعان شەشەڭىزگە بولا بەرەدى!-دەپ، ونى مىسقىلدىڭ وعىمەن ءبىر تارتىپ كەتىپتى.

    ******

    رەداكسياعا ءبىر اقىن شالىس ولەڭ الىپ كەلىپتى. سايدىراحمان الىپ كورسە، ءۇتىر، توشكىدەن جۇرداي ەكەن.

    -مىناۋىڭىز نە، قايتىپ وقيمىز، قالىڭ ءسوزدىڭ اراسىنان باسىمىز قىلتيىپ تىنىستاي وتىرعاندا، مىنا ولەڭسىماعىڭىزدى وقيمىز دەپ تۇنشىعىپ ولەتىن بولدىق قوي؟-دەيدى ساكەڭ. اناۋ:

    -تىنىس بەلگىسىن سەندەر قويا سالمايسىڭدار ما؟ رەداكتوردىڭ قىزمەتى سول تىنىس بەلگىسىن قويۋ ەمەس پە؟-دەيدى ولەڭىنىڭ تۇرىنە قاراماي كۇشەيە سويلەپ. سوندا ساكەڭ:

    -ءسىز ەندىگى جولى سول قالىپ قالعان تىنىس بەلگىلەرىن جولداپ بەرىڭىز، ءسوزىن ءوزىمىز جازىپ الامىز،-دەپتى ونەردى ەرمەك دەپ تۇسىنەتىن ساۋاتى سۋ ادامدى ءسوز مىلتىقپەن اتىپ.

    ******

    رەداكسياعا ءبىر اقىن ءبىر دوربا ولەڭ اكەلىپ تاستايدى. مازمۇنى تاپتاندى، ءنارى شالاڭ، ءسوزى قۋاڭ تارتقان دۇنيەلەر ەكەن. ونىسىنا قاراماي رەداكسياعا قايتا-قايتا تەلەفون بەرىپ ونىسىن قۋزاپ بولماي قويىپتى. بىردە قول باسىنداي لاۋازىمىن بۇلداپ رەداكتورعا كۇشتى ءتيىسىپ: «مەنىڭ ول ولەڭدەرىم قىزۋ قاندى ولەڭدەر ەدى، ەندى نەگە باسپايسىڭدار؟!» دەپتى.

    سوندا ساكەڭ:

    -ءسىزدىڭ ول ولەڭدەرىڭىز، قىزۋ قاندى بولعان سوڭ شىلىڭگىر شىلدەدە ورتەنىپ كەتە مە دەپ باسۋعا باتىلىمىز بارماي سۋىتىپ وتىرمىز، قىس تۇسكەندە كورەيىك دەپ،-دەگەن ەكەن اناۋ ۇندەي الماي قالىپتى.

    ******

    ءبىر جاماعايىنى كەلىن ءتۇسىرىپتى. ول ءبىر تەمەكىشى بولىپ شىعىپتى. اتاسى مەن ەنەسىن تۇتىنگە كومىپ بۇرقىراتا بەرەدى ەكەن. مۇنى كورگەن سايدىراحمان ۇلكەن كىسىگە:

    -مەن سىزدەر كەلىن ءتۇسىرىپ، وڭ جاعىن قىزارتىپ، قولى ۇزارىپ جىرعاپ قالدى عوي دەسەم، سىزدەردىڭ ۇيگە ءبىر قانشا بۋداق ءتۇتىن كەلگەن ەكەن عوي،-دەپتى. مۇنى ەستىگەن ەستى كەلىن ەكىنشىلەي اتاسى مەن ەنەسىنىڭ كوزىنشە تەمەكى تارتپايتىن بولىپتى.

جاۋاپتى رەداكتور: جازيرا بولاتباي قىزى