سايدىراحماننىڭ ساناتتى سوزدەرى

  • كەلۋ قاينارى: ىلە كەشى گازەتى
  • 07:57:10 04/07/2017

    بەلگىلى اقىن، مايتالمان رەداكتور سايدىراحمان ءابدىلازيز ۇلىنىڭ جوپەلدەمەدەگى تاپقىر سوزدەرى، اڭقاۋ ارەكەتتەرى مەن شىنايى قىزىقتارى ەل اراسىنا تارالىپ جۇرگەنى انىق. قۇلجانىڭ ەلىمىزدە «قالجىڭباستار مەكەنى» دەگەن اتى بار. ىلەدە بولعان از ۋاقىتتا سايدىراحمان اعانىڭ ەل اراسىنا تاراعان ساناتتى سوزدەرىن جيناپ «ىلە كەشى» گازەتى ارقىلى ۇسىنۋدى ءجون كوردىم.

    ******

    سايدىراحمان ابدىلازيزگە ءبىر توپ اقىنداردى باسقارا الماي ەسى شىققان ءبىر كادر كەلىپ:

    -ساكە، ءسىز بىلەسىز عوي، وسى اقىن دەگەن پەندەلەر قالاي ءوزى؟ سەن شىعىس دەسەڭ، ولار باتىس دەيدى، باسىم ابدەن قاتتى،-دەيدى. سوندا سايدىراحمان:

    -اقىن دەگەنىمىز قالىپتى ادامداردىڭ ءبىر پەنتىن بوساتىپ جىبەرسەڭ اقىن بولىپ شىعا كەلەتىن ەركىن ادام،-دەپ جاۋاپ بەرىپتى الگى قالجىڭ سەزىمى سۇيىق پەندەگە.

    ******

    بەلگىلى اقىن، ايگىلى جۋرناليست ساۋلەت توقتىبايەۆ ەكەۋىنىڭ بويى شامالى ەكەنىن تانيتىنداردىڭ ءبارى بىلەدى. توي-تومالاقتاردا ەكەۋى ءبىر ۇستەلگە جايعاسىپ، اڭگىمەنىڭ كورىگىن قىزدىرىپ، وتىرعانداردىڭ ايىزىن قاندىرىپ وتىرادى ەكەن. ءبىر قيىن جەرى ەكەۋى وتىرعان جەر «الاسالاۋ كەتىك» بولعاسىن ۇستەلگە اكەلگەن قۋىرماشتىڭ بارلىعى ەكەۋىنىڭ توبەسىنەن ءوتىپ ۇستەلگە قويىلادى ەكەن. كۇتۋشىلەر ارينە بويى بيىكتەر مەن مەلجەمدىلەردىڭ ماڭىنان تاماق تاسۋدىڭ اۋرەلەۋ ەكەنىن بىلەدى عوي. ءبىر كۇنى ساۋلەت اعا كەلمەي قالىپ ءبىر ۇستەلدە سايدىراحمان وتىرىپتى. كۇتۋشى بارلىق قۋىرماشتى ساكەڭنىڭ توبەسىنەن اسىرىپ ۇستەلگە قايتا-قايتا اكەلە بەرىپتى. سوندا سايدىراحمان اعا:

    -اتتەڭ، الگى ساۋلەت اعاڭنىڭ زارىنىڭ ءوتىپ تۇرعانى-اي،ءا؟!-دەپ قينالپتى.

    -ساۋلەت اعانىڭ كەلمەگەنى سىزگە نەگە قيىن ءتيىپ تۇر؟-دەپ سۇراپتى ماقسات نۇرعازين. سوندا سايدىراحمان:

    -ەگەر ساۋلەت وتىرعان بولسا، بولماعاندا قۋىرماشتاردىڭ جارتىسى سول كىسىنىڭ توبەسىنەن وتەر ەدى،-دەپ وتىرعانداردىڭ ىشەگىن قاتىرىپتى.

    ******

    «ىلە ايدىنىنداعى» قىزمەتكەرلەرگە ءۇي بولەتىن بولىپ، كەزەك سايدىراحمان اعاعا دا كەلىپتى. ءبىراق، سول جولى ءۇي تيمەي قالسا كەرەك. مەكەمە باستىعى ءجۇمادىل مامان اعا سايدىراحماندى ۇيىنە شاقىرىپ الىپ:

    -تاعى تالاي كەزەك بار، ءبىز كەزىندە ءبىر اۋىز قۋىقتاي ۇيگە دە وتىرعامىز، كەزىندە بەسىك قوياتىن بوستىقتى قويىپ، ىدىس-اياقتى قوياتىن دا جەر جوق بولاتىن،-دەپ كۇلمان اپاي ەكەۋى ەكى جاقتاپ «كوڭىل ايتىپتى». سوندا ءبىر قايناۋى ىشىندە وتىرعان، ءبىر قانشا رەتكى ءۇي بولىسىندە قۇر قالعان سايدىراحمان اعا:

    -ە، سول «ءبىر كەز» وتە قيىن كەز ەدى عوي، قازىر ءبارى جاقسى، سول «ءبىر كەزدە» اۋەلى اكەسىنىڭ اتىن دا اتاي المايتىن قيىن كەز ەمەس پە؟-دەپتى. مۇنىسى،ءجۇمادىل اعانىڭ اقالاقشى بولعان اكەسىنىڭ اتىن اتاي الماي، مامان دەپ اتاسىنىڭ اتىن قولدانىپ كەتكەنىن قيالاي ايتقانى. ءسوز نارقىن بىلەتىن ءابزال اعا جوعارى جاققا كوپ شاپقىلاپ ءجۇرىپ، ساكەڭە ءۇي ءال ەتىپ بەرىپتى.

جاۋاپتى رەداكتور: جازيرا بولاتباي قىزى