رەداكتور ساپاسىنىڭ باسىلىم ساپاسىنداعى رولى

  • كەلۋ قاينارى: ىلە گازەتى
  • 03:52:36 19/07/2017

      ساجيدا قالي قىزى

 

    رەداكتور ساپاسى _ باسىلىم ساپاسىن بەلگىلەيتىن ماڭىزدى ولشەم. باسىلىم ساپاسى ونداعى بەرىلگەن شىعارمانىڭ وقىرماندى قالاي باۋراي الۋىندا. ال باسىلىمنىڭ وزىنە ءتان مازمۇندىق سيپاتىنان الىپ قاراعاندا وعان بەرىلەتىن ءاربىر شىعارمانىڭ مازمۇنىنداعى عىلميلىق، يلانىمدىلىق، نازاريالىق قۋات ءبىر باسىلىم ساپاسىنىڭ قانشالىق ەكەنىن بەينەلەيدى. اۆتور مەن رەداكتوردىڭ جاۋاپكەرلىگى سايىپ كەلگەندە اۆتور مەن رەداكتوردىڭ وقىرمان الدىنداعى جاۋاپكەرلىگى بولىپ تابىلادى. شىعارمانىڭ بارلىققا كەلۋى اۆتوردىڭ ەڭبەگى بولسا، ال شىعارمانى باسپا بەتىنە شىعارۋ رەداكتوردىڭ رەداكتورلىق ەڭبەگى ارقىلى ورىندالادى. قاجەتتى ساپالى شىعارمالاردى سارالاۋ مەن جاريالاۋ رەداكتوردىڭ ەنشىسىندەگى جۇمىس دەي تۇرعانمەن، رەداكتوردىڭ سارالاۋىنا تولىمدى شىعارما جازۋ اۆتوردىڭ ەنشىسىندە. اقپارات زەرتتەۋشىسى لي جۇن: «رەداكتور ءبىر شىعارمانىڭ ءون بويىنداعى جەتپەي جاتقان جەرىن يكەمدى دە يلانىمدى وڭدەۋگە دە، وقىرمانعا جاعىمسىز اسەر بەرەتىن ءسوز - سويلەمدەردى قىرقىپ تاستاۋعا دا ۇقىقتى» دەگەندى ورتاعا قويادى. رەداكتوردىڭ شىعارما رەداكسيالاۋداعى ىنتاسى مەن قابىلەتى رەداكتوردىڭ ىشكى ءبىلىمى مەن ىزدەنىسىنە دە سايادى. ىزدەنبەيتىن، ىشكى ءبىلىمى تاياز كەيبىر رەداكتور اۆتوردىڭ ەڭبەگىن مالدانىپ، سونىڭ جەتەگىمەن كەتەدى. شىعارمانى وڭدەپ، شىعارماعا زەر سالا زەرتتەۋ جۇرگىزىپ، اۆتورعا شىعارماسى ارقىلى تاربيە بەرۋدى ەسكەرمەيدى. ۇنەمى جازىپ جۇرەتىندەردىكىن ءجون سانايدى. سوندىقتان دا ەكىنىڭ بىرىندە ەمىلەلىك نەمەسە لوگيكالىق قاتەلىكتەر كەتىپ جاتادى. مۇنىڭ سەبەبى نە، مەنىڭشە رەداكتوردىڭ ناقتى ساپاسىنا قاجەتتى ەكى ءتىل دۇرىس جەتىلمەگەندىكتەن. شىعارما ءتىل ارقىلى جازىلىپ، ءتىل ارقىلى جەتكىزىلەدى دەسەك، وسى جازىلۋ مەن جەتكىزىلۋدىڭ اراسىن جالعاپ تۇرعان ءبىر ءتىل رەداكتوردىڭ ىشكى ءتىلى دە؛ ەندى ءبىر ءتىل رەداكتوردىڭ جازبا ءتىلى. مۇنداعى ىشكى ءتىل دەپ وتىرعانىمىز رەداكتوردىڭ سەزىنۋى، ويلامى بولادى دا ول رەداكتوردىڭ شىعارما تاڭداۋىنا، شىعارما سارالاۋىنا ەرەكشە اسەر ەتەتىن ءتىل سانالادى. ال سارالاعان شىعارمانى اۆتوردىڭ ايتار ويىنا قۇرمەت ەتۋ شارتى استىندا وڭدەپ باسپا بەتىنە كوتەرۋ رەداكتوردىڭ جازبا ءتىل دەڭگەيىنىڭ قانشالىق ەكەندىگىن ولشەيتىن ولشەم. ولاي بولسا رەداكتوردىڭ ساپاسىن بەينەلەيتىن شىعارما ساپاسى قالاي بولۋى كەرەك. ول ءۇشىن مىناداي بىرنەشە تۇيىنگە توقتالىپ كورەلىك:

    بىرىنشىدەن، رەداكتوردا دۇرىس ساياسي يدەيالىق تانىم مەن قاتاڭ كاسىپتىك ءمورال بولۋ كەرەك. رەداكتور، ءسوزسىز، قازىرگى كەزدەگى ساياساسي اۋقىمنان تولىق حاباردار بولۋى، پارتيا مەن ۇكىمەتتىڭ اقپارات - باسپا ءسوز جونىندەگى باعىت - ساياساتىنا، ەرەجە – تۇزىمدەرىنە قانىق بولۋى كەرەك. رەداكتورداعى ساياسي - يدەيالىق ساپا ونىڭ ماركستىك ديالەكتيكالىق ماتەرياليزم،تاريحي ماتەرياليزم تۇرعىسىمەن ، كوزقاراسىمەن جانە پارتيانىڭ ءار كەزەڭدەگى ءتۇرلى باعىت – ساياساتتارىن جەتىك يگەرۋىمەن ولشەنەدى. ادامداردى دۇنيەنىڭ، قوعامدىق ورتانىڭ دامۋ زاڭدىلىعىن بەينەلەيتىن وزىق كوزقاراستى يگەرۋگە جەتەكشىلىك ەتەتىن، سوعان قۋزايتىن ءبىلىم مەن سانالىلىق بولمايىنشا رەداكتورلىق ساپانى جوعارى كوتەرۋ مۇمكىن ەمەس. سوندىقتان رەداكتور ەڭ الدىمەن كۇندەلىكتى ساياسي ۇيرەنۋ مەن قىزمەت امالياتىن ۇشتاستىرا وتىرىپ يدەيالىق جاقتان شىنىعۋدى شىنايى كۇشەيتۋى، وزىندەگى ساپالىق دەڭگەيدى جوعارى كوتەرۋگە كۇش سالۋى ءتيىس.

    ەكىنشىدەن، رەداكتوردا باي تىلدىك قور مەن ونى كادەگە جاراتا الاتىن رۋح بولۋى كەرەك. ۇزدىك رەداكتور ءبىر شىعارمانى ءبىر وقىپ اق اۆتوردىڭ نە ايتپاقشى ەكەنىن، قانداي باعىتقا بەيىمى كۇشتى ەكەنىن بىردەن سەزەدى.

جاۋاپتى رەداكتور: گۇلدەن ماقسات قىزى