قۇلماق مايساسىن باپتاۋدىڭ تەحنيكالىق تۇيىندەرى

  • كەلۋ قاينارى: ىلە گازەتى
  • 02:59:14 26/07/2017

  

    مۇقتار كادىرقان ۇلى

 

    قۇلماق (سىرا گۇلى) كوپ جىلدىق سۇلاما ساباقتى وسىمدىك بولىپ، ونىڭ جابايى تۇرلەرى رايونىمىزدىڭ سولتۇستىگىندەگى جازىق جەرلەردەن تارتىپ وزەن بويىنداعى ورمان اعاشتارى مەن بۇتا–بۇرگەندەرگە ورالىپ وسەدى. سىرا ءوندىرۋدىڭ ساپالى شيكىزاتى ءارى جۇڭگوشا ءدارى ماتەريالى ەسەپتەلەدى. تومەندە قۇلماق مايساسىن باپتاپ–باسقارۋدىڭ تەحنيكالىق تۇيىندەرىنە توقتالامىز.

    مايسا مەزگىلىندەگى بابى. قۇلماق كوشەتىنىڭ العاشقى ءوسىپ– جەتىلۋ كەزەڭىندە اتىز توپىراعىن قوپسىتۋمەن بىرگە، ءشوپ وتاۋ جۇمىسىن جۇرگىزىپ، توپىراقتىڭ قالىپتى دىمقىلدىعىن ساقتاۋ جانە ارام شوپتەردىڭ شىعۋىن تەجەۋگە كوڭىل ءبولىپ، قۇلماق مايساسىنىڭ ساباعى ءوسىپ 1.5 مەتر اينالاسىندا بولعان كەزدە مايسا تۇراقتاندىرۋ، سيرەتۋ جۇمىسىن جۇرگىزىپ، مۇندا ءاربىر ۇياشىققا 5–6 ءتۇپ مايسا قالدىرىپ، تىم قويۋ شىققان جەردەگى مايسانى سيرەتىپ، سونىمەن بىرگە، قۇلماقتىڭ ساباق–جاپىراعىنىڭ قاۋلاپ ءوسۋ كەزەڭىندە قورەكتىك پەن سۋدىڭ ورىنسىز ىسىراپ بولۋىن تەجەپ، كۇن نۇرىنىڭ ءتۇسۋى مەن اۋا الماسۋ شارت – جاعدايىن جاقسارتۋ ءۇشىن نەگىزگى ساباعىنىڭ 8–12 بۋىننان تومەنگى جەرىندەگى جاپىراق قولتىعىنداعى بۇتاعىن الىپ تاستاپ، ساباق–جاپىراعى ءوسىپ–جەتىلىپ، سورەنى بۇركەگەننەن كەيىن تومەنگى جاعىنداعى قويۋ وسكەن كونە جاپىراقتارىن الىپ تاستاۋ كەرەك.

    قۇلماق كوپ جىلدىق سۇلاما ساباقتى وسىمدىك بولعاندىقتان ونىڭ كوشەتىن وتىرعىزۋمەن بىرگە، اتىزعا اعاش نەمەسە سەمەنتتەن سورە ورناتىپ، سىم تەمىر ياكي ءجىپ تارتىپ، ساباعى بوي تارتىپ وسە باستاعاندا ءاربىر تۇپتەگى ساباقتى ءوز باعىتى بويىنشا سورەگە بىركەلكى اسىپ، جالعاستى ورالىپ وسۋىنە تيىمدىلىك جاراتۋ كەرەك.

    ۇستەمە تىڭايتقىش بەرۋ جانە سۋارۋ. قۇلماق مايساسىنىڭ ويداعىداي ءوسىپ–جەتىلۋى جانە مول ءونىم بەرۋىنە كەپىلدىك ەتۋ ءۇشىن، ۇستەمە تىڭايتقىشتى جەتكىلىكتى بەرۋ مەن سۋارۋ جۇمىسىن مىقتى ۇستاۋ كەرەك. قۇلماق مايساسىنىڭ بوي تارتىپ ءوسۋ، بۇتاقتاۋ، ءتۇيىن تاستاۋ جانە گۇل اشۋ مەزگىلدەرىندە قورەكتىك زاتتارعا بولعان تالابى ارتا تۇسەتىندىكتەن، ازوت، فوسفور، كاليدى نەگىز ەتكەن حيميالىق تىڭايتقىش پەن كۇنجارا تەكتەس تەز ءونىمدى ورگانيكالىق تىڭايتقىشتى دەركەزىندە ۇستەمەلەپ بەرۋ كەرەك. مۇندا قۇلماق مايساسى بوي تارتىپ ءوسىپ، بۇتاقتاۋ، ءتۇيىن تاستاۋ مەزگىلىندە ءار مۋ جەرگە ۋرەادان 10 كيلوگرام، فوسفور قىشقىل اممونيدان 5 كيلوگرام، كۇنجارادان 30 كيلوگرام ۇستەمەلەپ بەرىپ، گۇل اشۋ جانە گۇلىنىڭ تولىسۋ كەزەڭىندە مايسانىڭ جانە توپىراقتىڭ جاعدايىنا قاراي وتىرىپ ازوت، فوسفور، كاليدى نەگىز ەتكەن بىرىكپە تىڭايتقىشتان ءار مۋ جەرگە 10–15 كيلوگرامنان ۇستەمەلەپ بەرىپ، سونىمەن بىرگە، قۇلماق گۇلىنىڭ جالعاستى ۇلكەيۋىنە پايدالى بولۋى ءۇشىن قوس قىشقىل فوسفور قىشقىل كالي سياقتى تەز ءونىمدى تىڭايتقىشتان 250–300 گرامدى ۇيلەسىمدى سۋدا سۇيىلتىپ، مايسانىڭ ساباق–جاپىراعىنا 7–10 كۇندە ءبىر رەت، جيىنى 2 رەت بۇركىپ بەرۋ كەرەك.

جاۋاپتى رەداكتور: گۇلدەن ماقسات قىزى