قۇلماق مايساسىن باپتاۋدىڭ تەحنيكالىق تۇيىندەرى

  • كەلۋ قاينارى: ىلە گازەتى
  • 02:59:14 26/07/2017

    قۇلماقتى العاشقى ءوسىپ–جەتىلۋ مەزگىلىندە از سۋمەن ءسىڭىرىپ سۋارىپ، توپىراقتىڭ دىمقىلدىعىن ساقتاپ، ءتۇيىن تاستاۋ، گۇل اشۋ كەزەڭدەرىندە بەرىلەتىن ۇستەمە تىڭايتقىشپەن بىرلەستىرە وتىرىپ قاندىرا سۋارۋ كەرەك. قۇلماق مايساسىن سۋارعاندا سول جەردىڭ توپىراق، اۋا رايى جانە مايسانىڭ ءوسۋ جاعدايىنا قاراي وتىرىپ، سۋارۋ ولشەمى مەن سۋارۋ رەت سانىن بەلگىلەپ، توپىراعى قۇمداۋىت، جەرى قاعىر، قۋاڭشىلىق بولىپ، اتىزداعى مايسانىڭ شولدەۋ ءجايتى كورىلسە، سۋارۋ ولشەمى مەن رەت سانىن ۇيلەسىمدى مولشەردە ارتتىرۋ كەرەك. ال مۇنىڭ كەرىسىنشە بولىپ، جەر ءتۇزىلىسى ويپاڭ، توپىراق قاباتى قالىڭ، ونىڭ ۇستىنە جاۋىن –شاشىن كوپ بولسا، سۋارۋ ولشەمى مەن رەت سانىن ۇيلەسىمدى مولشەردە تەجەۋگە كوڭىل ءبولۋ كەرەك.

    دەرت–دەربەزدەن ساقتاۋ. قۇلماقتىڭ ساباق–جاپىراعى قاۋلاپ ءوسىپ، اتىزدىڭ اۋا الماسۋى، كۇن نۇرىنىڭ ءتۇسۋى جاقسى بولماسا، ونىڭ ۇستىنە، جاڭبىر جاۋعاننان كەيىن اۋا تىمىرسىق بولىپ تۇرسا، قۇلماقتىڭ قىراۋ ءتارىزدى بازدانۋ دەرتى جانە قىزىل ورمەكشى سياقتى زياندى جاندىكتەردىڭ پايدا بولۋىنا ءتيىمدى وراي جاراتىلادى. سوندىقتان قۇلماق اتىزىنداعى ارام شوپتەردى ارىلتىپ جانە سۋارۋدى تەجەپ، اتىزدىڭ اۋا الماسۋ، كۇن نۇرى ءتۇسۋ شارت–جاعدايىن جاقسارتىپ، سونىمەن بىرگە مايسانى ۇنەمى قاداعالاپ تەكسەرىپ، دەرت–دەربەز، زياندى جاندىك پايدا بولسا دەركەزىندە ءدارى ءشاشىپ جويۋ شاراسىن قولدانۋ كەرەك.

    ءونىم جيناۋ. قۇلماقتىڭ ءونىمىن ۇيلەسىمدى ۋاقىتتا جيناپ الۋ − ونىڭ مۋ باسىندىق ءتۇسىمى مەن ءونىم ساپاسىنا كەپىلدىك ەتۋدەگى ماڭىزدى جۇمىس ەسەپتەلەدى. ادەتتەگى جىلدارى رايونىمىزدىڭ سولتۇستىگىندەگى وڭىرلەردە تامىز ايىنىڭ سوڭى مەن قىركۇيەك ايىنىڭ باس شەنىندە ءونىم جيناپ الىنادى. الايدا قۇلماقتىڭ سورتى، ەگىلۋ ۋاقىتى جانە سول جىلعى اۋا رايى جاعدايى سياقتى سەبەپتەردەن پىسىپ–جەتىلۋ ۋاقىتىندا بەلگىلى پارىقتار بولادى. مۇندا قۇلماق گۇلىنىڭ سىرتقى فورماسى، ءتۇسى، ءيىسى سياقتىلارعا قاراي وتىرىپ، ءونىم جيناۋ ۋاقىتىن بەلگىلەۋگە بولادى. مىسالى، قۇلماق گۇلىنىڭ سىرتى جۇمىرلانىپ (قاراعاي تۇقىمىنىڭ فورماسىنا ۇقساپ)، رەڭى سارعىلتىم تۇسكە وزگەرىپ، يىسكەگەندە قۇلماقتىڭ حوش ءيىسى اڭقىپ تۇرسا، سونداي–اق گۇلىن قولمەن ۇستاعاندا الاقانعا ءسال جابىسىپ ءارى سۋدىراپ تۇرسا، وندا قۇلماق گۇلىنىڭ تولىق پىسقاندىعىن بىلۋگە بولادى. قۇلماق ءونىمى تىم ەرتە جينالسا ءتۇسىمى مەن ساپاسى ولشەمگە جەتپەي قالادى. ال تىم جاي جينالسا گۇلى قۋراپ، ءتۇسىمى مەن ساپاسى تومەندەي بەرەدى.

جاۋاپتى رەداكتور: گۇلدەن ماقسات قىزى