انا مەيىرى

  • كەلۋ قاينارى: شينجياڭ زاڭ جانە تۇرمىس گازەتى
  • 04:44:28 15/08/2017

    

    سول جىلى اجەيدىڭ الپىستى القىمداعان شاعى ەدى. شاشى اپپاق قۋداي بولىپ قۋارىپ، ءجۇزىن اجىم تورلاپ، بۇرىننان تىك كوتەرە الماي جۇرگەن بەلى، ءتىپتى دە ءيىلىپ كەتكەن ەدى.

    ول وسى ءبىر كونە كوشەنىڭ ءدال ورتاسىنداعى شاعىن ۇيدە ءوزى جالعىز تۇراتىن. بۇل ءۇي تالاي جىلدىڭ الدىندا سالىنعاندىقتان، كونەرىپ كەتكەن، ۇيدە كونەتوز ءبىر توسەك پەن كونە ۇلگىدەگى جەلدەتكىشتەن باسقا كەرەككە جارار ماندىمدى ەشتەڭە جوق بولاتىن.

    بالا - شاعاسى، تۋىس - تۋعاندارىنىڭ اجەيدىڭ ەسىگىن اشپاعانىنا نەشە جىلدىڭ ءجۇزى بولعان. ول كىسى تەك ۇكىمەت جاعىنان بەرىلەتىن ازىن - اۋلاق تۇرمىستىق قاراجاتقا سۇيەنىپ كۇنەلتىپ كەلە جاتقان بولاتىن. اجەي ءار كۇنى تاڭەرتەڭ ەرتە تۇرىپ، كوكونىس بازارىنان ارزان كوكونىس اكەلىپ، بۋ نان نەمەسە جايما كەسپە جاساپ جەيتىن. ءبىرتالاي ۋاقىت ەت جەمەگەندىكىتەن بە، جۇپىنى تۇرمىس ونى، ءتىپتى دە قارتايتىپ جىبەرگەندەي كورىنەتىن. كەۋدەدە جان بولعان سوڭ ءتىرى جانعا تىرشىلىك كورمەي امال نە، وعان ەندى وسىلاي ءۇن-تۇنسىز ءومىرىنىڭ سوڭىن توسقاننان باسقا نە شارا؟!

    سول جىلى جىگىت 34 جاستا ەدى. ول قالاداعى وسى كونە كوشەدە قاراپايىم لاشىق جاساپ، ۆلەسيپەد ريمونىتتاۋ، كىلت جاساۋ سياقتى ۇساق-تۇيەك ساۋدامەن شۇعىلداناتىن. بۇل ونىڭ قولىنان كەلەتىن بىردەن - ءبىر ونەرى ءارى جان باعىس جولى ەدى. ول دا ءوزى جالعىز تۇراتىن، كىشكەنتايىنان جەتىمحانادا ەرجەتكەن ول بىرنەشە جىل عانا وقىپ، ون نەشە جاسىندا كوشە كەزىپ، تەنتىرەپ كەتكەن. اقىرى بيىل كوكتەمدە وسى شاعىن قالانى مەكەندەپ قالعان ەدى.

    شاعىن لاشىق ونىڭ كۇندىز ۇساق– تۇيەك ساۋدامەن شۇعىلداناتىن قىزمەت ورنى بولسا، ال تۇندە دەمالاتىن تۇرار جايى ەدى. تەك وسىنداي كونە كوشەلەردىڭ عانا بازار باسقارۋى ءبىراز بوس بولعاندىقتان، ول وسى ارادا تۇراقتاپ تۇرىپ قالعان ەدى.

    جىگىت تە ءار كۇنى تاڭەرتەڭ ەرتە تۇرىپ، ساۋداسىمەن اينالىساتىن، بۇنداي ساۋدا بار قاجىر - قايراتىڭ مەن قۇلشىنا ىستەۋىڭدى قاجەت ەتەدى. ول ءار كۇنى تاڭ سارىدە كوكونىس ساتىپ الۋعا شىعاتىن الگى اجەيدى ۇنەمى بايقاپ قالاتىن. كەيدە ول كىسىگە امانداسىپ: «اجەي، جولدان ابايلاڭىز» دەيتىن.

    اجەي كوپ سويلەمەيتىن، جىگىتتىڭ سالەمىنە كەيدە جاۋاپ قايىرسا، كەيدە ۇندەمەي كەتە بەرەتىن. بۇل كوشەدەگىلەردىڭ بارلىعى بۇل كىسنىڭ مىنەزىن بىلەتىن ەدى. مۇندايدا جىگىت كۇلىمسىرەگەن بويى ءوز جۇمىسىن ىستەي بەرەتىن. ءبىراق كەيدە اجەيدىڭ ۇزاپ باراجاتقان سۇلباسىنا ءساپ سالا ۇزاق قاراپ قوياتىن.

    ۋاقىت وتە كەلە جىگىت اجەيگە ءار كۇنى ابايلاپ ءجۇرۋدى ەسكەرتىپ تۇراتىن بولدى. ءتىپتى، جاۋىن جاۋعان كۇندەرى ءوزى اجەيدى قولىنان جەتەلەپ، كوكونىس بازارىنا اپارىپ سالاتىن.

جاۋاپتى رەداكتور: گۇلدەن ماقسات قىزى