جۇگەرىنىڭ سوڭعى مەزگىلىندەگى بابى

  • كەلۋ قاينارى: ىلە گازەتى
  • 04:18:03 16/08/2017

    كادىرقان ءابىلقايىر ۇلى

    

    جۇگەرى ءوسىپ–جەتىلۋ مەرزىمى ۇزاق، قورەكتىك زاتتار مەن سۋعا جانە باپتاپ–باسقارۋعا بولعان تالابى جوعارى مول ءونىمدى داقىل ەسەپتەلەدى. جۇگەرىدەن مول ءونىم الۋ ءۇشىن، ءارقايسى ءوسىپ–جەتىلۋ كەزەڭىندە تىڭايتقىش پەن سۋعا بولعان قاجەتىن قامتاماسىزداندىرىپ وتىرۋ تالاپ ەتىلەدى. الايدا ءوندىرىس بارىسىندا ونىڭ ءوسىپ–جەتىلۋ كەزەڭىندەگى تىڭايتقىش بەرۋدى، سۋارۋدى جانە دەرت–دەربەزدەن ساقتانۋدى ءتۇيىن ەتكەن باپتاپ–باسقارۋ شارالارى ويداعىداي جۇرگىزىلمەسە جەبەسىندەگى ءدانى تولىمسىز بولىپ، مۋ باسىندىق ءتۇسىمى ارتپايتىن ءجايت كورىلەدى. سوندىقتان جۇگەرى مايساسىنىڭ العاشقى جانە ورتاڭعى ءوسىپ–جەتىلۋ مەزگىلىندەگى باپتاپ–باسقارۋدى كۇشەيتۋگە كوڭىل ءبولۋ كەرەك.

    ۇستەمە تىڭايتقىشتى تولىقتاپ بەرۋ. جۇگەرىنىڭ سوڭعى ءوسىپ–جەتىلۋ مەزگىلىندە تامىر جۇيەلەرى ءالسىز بولىپ، توپىراق قاباتىنداعى قورەكتىك زاتتار مەن سۋدى ءسىمىرىپ پايدالانۋ قۋاتى تومەندەي بەرەدى. ونىڭ ۇستىنە، العاشقى جانە ورتاڭعى ءوسىپ–جەتىلۋ مەزگىلىندە ۇستەمە تىڭايتقىش جەتكىلىكتى بەرىلمەگەندە جەبە باسىنىڭ ۇلكەيۋى مەن ءدان الۋى قالىپسىز بولعان جاعدايدا دەركەزىندە ۇستەمە تىڭايتقىش (ءدان تىڭايتقىشى دەپ تە اتالادى) تولىقتاپ بەرگەندە ءدان الۋى مەن ءدان سالماعىن ارتتىرۋعا تيىمدىلىك جاسالادى. ۇستەمە تىڭايتقىش ءۇشىن ۋرەادان (尿素) مۋ باسىنا 1.5–2 كيلوگرامعا دەيىن ۇستەمەلەپ بەرۋگە بولادى.

    سۋارۋ. گۇل اشىپ، توزاڭدانعان كەز جۇگەرى جەبەسىنە ءدان قالىپتاسۋ مەزگىلى بولىپ، بۇل كەزدە مايسانىڭ ساباق–جاپىراعىنداعى زاپاس قورەكتىك زاتتار تەك سۋدىڭ كومەگىندە عانا جەبەدەگى دانگە تاسىمالدانادى. اتىزدى وسى كەزدە ۇيلەسىمدى مولشەردە سۋارعاندا جۇگەرى مايساسىنىڭ ءوسىپ–جەتىلۋ ورگاندارىنداعى زات الماسۋدى تەزدەتىپ، جەبەنىڭ ءدان سالماعىن ارتتىرۋعا بولادى. ادەتتەگى جاعدايدا بالاۋىزدانىپ پىسۋ كەزەڭىنە دەيىن جۇگەرى اتىزىن 1 دە 2 رەت سۋارۋعا، ءار رەتكى سۋارۋ مولشەرىن مۋ باسىنا 50–60 تەكشە مەترگە دەيىن تەڭشەۋگە بولادى.

    توپىراعىن قوپسىتىپ، ارام ءشوبىن وتاۋ. جۇگەرى ءدان تولتىرۋ مەزگىلىندە اتىزدىڭ ءبىر رەت توپىراعىن قوپسىتىپ، ارام ءشوبىن وتاۋ جۇمىسىن جۇرگىزگەندە ارام شوپتەردىڭ سوڭعى زيانىن تەجەۋمەن بىرگە، توپىراق تەمپەراتۋراسىنىڭ جوعارىلاۋىنا ءتيىمدى بولىپ، جۇگەرىنىڭ پىسۋ ۋاقىتى تەزدەيدى ءارى ونىڭ ءدان تولتىرۋىنا دا پايدالى بولادى. كوڭىل بولەتىن ءبىر ءجايت، توپىراعىن قوپسىتىپ، ارام ءشوبىن وتاعاندا قوپسىتۋ تەرەڭدىگىن ۇيلەسىمدى ولشەمنەن اسىرماي، جۇگەرىنىڭ تامىر جۇيەلەرىنىڭ زاقىمدالۋىنان ساقتانۋ كەرەك.

جاۋاپتى رەداكتور: جازيرا بولاتباي قىزى