تەڭبىل دوپ توڭىرەگىندەگى بەرەكە

  • كەلۋ قاينارى: شينجياڭ گازەتى
  • 10:54:29 03/10/2017

    قاجىبەك ايدارقان ۇلى

 

    − اتىم باۋ يىڭ، ۇلتىم داعۇر، تارباعاتايداعى كوپ ۇلتتان ىنتىماقتاسقان كاسىپتەن سىرتقى بىرلەسكەن فۋتبول قۇراماسىنىڭ باستىعىمىن. كوماندامىز 2013 - جىلى شىلدە ايىندا ءار سالاداعى كاسىپتەن سىرتقى حانزۋ، ۇيعۇر، قازاق، حۇيزۋ، سىبە، داعۇر قاتارلى ۇلتتاردى قامتىعان 15 دوپ قۇمار جاستىڭ مۇشە بولۋىمەن قۇرىلعان. كوپشىلىك ورتاق ماقسات ءۇشىن قۇلشىنادى، دوپقا كىشكەنە كۇنىمنەن قىزىعامىن، سول قىزىعۋشىلىقتىڭ جەتەگىمەن دوپتىڭ سوڭىنا ءتۇسىپ، كوپتەگەن جارىستارعا قاتىناستىم، - دەيدى باۋ يىڭ.

    1995 - جىلدان باستاپ شاۋەشەكتە جىل سايىن وتكىزىلىپ كەلگەن «سانباۋ لوڭقاسىنا» تالاسۋ فۋتبول جارىسى 2004 - جىلدان كەيىن توقتاپ قالدى دا، سودان بەرگى 10 جىلدا مۇنداي كولەمدى، دابىرالى جارىس وتپەدى. سونىمەن فۋتبول قۇمار باۋ يىڭ مازاسىز كۇيگە ءتۇستى، ۇمىتسىزدەندى. 2013 - جىلى 10 نەشە دوپ قۇمار ازامات باس قوسىپ، اقىل قورىتىپ، باۋ يىڭنىڭ كوماندا قۇرۋىن ءوتىندى. باۋ يىڭ وي ەلەگىنەن وتكىزە كەلە بۇل ۇسىنىستى قابىل الدى. سونىمەن الۋان كاسىپتىڭ باسىندا جۇرگەن ءار ۇلت ازاماتتارى تەڭبىل دوپتىڭ توڭىرەگىنە جينالىپ، جاڭا كوماندانىڭ ۋىعىن شانشىپ، شاڭىراعىن كوتەردى. بۇعان قۋانا قول سوعىپ، قىزىعا قاراعان دوپ قۇمارلار بۇل كومانداعا مۇشە بولىپ، مۇشە سانى 60 ادامنان استى. ولارمەن ۇنەمى حابارلاسىپ، دەم بەرەتىن دوپ قۇمار جاستار 230 ادامعا جەتتى.

    باۋ يىڭ: كومانداداعىلار ۇلتتىق عۇرىپ - ادەتكە ءوزارا قۇرمەت ەتۋدى قاتاڭ تۇزىمگە اينالدىرعان. بەرەكەسى بەكەم، كوڭىلدەرى توعىسىپ جاتادى. ءار ۇلت حالقىنىڭ ءداستۇرلى مەرەكەسى قارساڭىندا جىگىتتەر ۇيلەرىنەن اكەلگەن ءدامدى - قۇجىرلارىن ورتاعا سالىپ، مەرەكەنى تويلايدى. كوماندا مۇشەلەرىنىڭ ءمالىم بىرەۋى قيىنشىلىققا جولىقسا، كوپشىلىك اقىل قوسىپ، كومەك كورسەتىپ، مەيىر باعىشتايدى، - دەيدى. ۋ چياڭ 2015 - جىلدىڭ سوڭىندا دوپ تەۋىپ ءجۇرىپ بىلەگىن جارالاپ العاندا، ساپتاستارى ونى دەرەۋ شيپاحاناعا جەتكىزەدى، ەمدەلىپ جاتقاندا ۇنەمى حال - جاعدايىن ۇعىسادى، كوڭىلىن اۋلايدى. كوماندا مۇشەسى جين شينحۇي ەكونوميكالىق جاقتان قينالعاندا، اقشا قۇراپ، كوماندا كيىمىن ساتىپ الىپ بەرەدى.

    2015 - جىلى شىلدە ايىندا تارباعاتاي فۋتبول قۇراماسى قوبىقسارى موڭعۇل اۆتونوميالى اۋدانىنداعى ساۋىر فۋتبولشىلارى قوعامىمەن 2 رەت دوستىق جارىس وتكىزەدى. سول بارىستا ولار ساۋىر فۋتبولشىلار قوعامىنىڭ اق قان اۋرۋىنا شالدىققان ءبىر مۇشەسىنە جىلۋ جيناپ جاتقانىنان حاباردار بولادى دا، بارلىعى جىلۋ اتايدى. وسىدان باستاپ تارباعاتاي فۋتبول قۇراماسى قيىنشىلىققا جولىققاندارعا جىلۋ باعىشتاۋ مەن مەيىر باعىشتاۋدى قولعا الادى. 2015 - جىلى قىركۇيەكتە تارباعاتاي فۋتبول قۇراماسى مەن تارباعاتاي ايماقتىق كوممۋنيستىك جاستار وداعى كوميتەتى بىرلەسىپ، «مەيىر باعىشتاپ، وقۋعا كومەكتەسۋ فۋتبول جارىسىن» ورىستەتىپ، تۇرمىسىندا قيىنشىلىعى بار 8 بالاعا جيىنى 4000 يۋان كومەك بەرەدى. سول جىلى قاراشا ايىندا بۇراتالا موڭعۇل اۆتونوميالى وبلىسىنىڭ فۋتبول قوعامى ۇيىمداستىرعان مەيىر باعىشتاۋ فۋتبول جارىسىنا بەلسەنە قاتىناسادى، 2016 - جىلى «1 - ماۋسىم حالىقارالىق بالالار مەرەكەسى» قارساڭىندا، تارباعاتاي ايماقتىق ەرەكشە تاربيەلەۋ مەكتەبىنە بارىپ، كەم اقىلدى 40نەشە بالامەن سايكەسىپ، كوگالدا دوپ تەۋىپ، ولاردىڭ فۋتبولعا بولعان اۋەسىن وياتىپ، سەنىمدەرىن شىڭداپ، قۋانىشقا بولەيدى. كوماندا مۇشەلەرى اراسىندا دا ءوزارا كومەك كورسەتۋ ءۇزىلىپ كورگەن ەمەس.

جاۋاپتى رەداكتور: گۇلدەن ماقسات قىزى