دوستىق گۇلىن جايناتقان لي گۇيرۇڭ

  • كەلۋ قاينارى: ىلە گازەتى
  • 03:03:05 28/10/2017

      «ۇلتتار ىنتىماعىنىڭ بەرەكەلى شاڭىراعى» قيمىلى ورىستەتىلگەننەن بەرى، ءار ۇلت حالقى ءبىر - بىرىمەن تۋىستىق قاتىناس ورناتىپ، ءبىر ءۇيلى جانداي تاتۋ - ءتاتتى ءوتىپ كەلەدى. وسىعان وراي مەنىڭ تۋىسىم كۇنەس اۋدانى كەڭسۋ قالاشىعى كوكتوبە قىستاعىندا تۇراتىن سوناۋ 1976- جىلى ىشكى ولكەدەن وسى اراعا قونىس اۋدارىپ، ءومىربويى ەگىمشىلىك كاسىبىمەن شۇعىلدانىپ، باسقالارعا ۇلگى بولعان قايىرىمدى قارتتارىمىزدىڭ ءبىرى لي گۇيرۇڭ ەدى.

    تامىزدىڭ ءبىر كۇنى مەن اۋلاما ۇلاپ ەككەن پاميدور قالامشامنىڭ ءوسۋىنىڭ باياۋ بولۋى جونىندە ودان تەحنيكالىق كومەك سۇرايىن دەپ، ونىڭ قىستاق ورتالىعىنان اشقان ساۋدا دۇكەنىنە كىردىم. شارۋاسى قانشا قاربالاس بولسا دا ول دۇكەنىن ۇلىنا تابىستاپ، مەنىمەن بىرگە ەككەن كوكونىستەرىمدى كورۋگە كەلدى. كەلە سالىپ جاسىنىڭ ۇلعايعانىنا قاراماستان، ماعان ءاربىر پاميدور قالامشاسىن قازىق قاعىپ بايلاپ، ارتىق بۇتاقتارىن بۇتاپ، باپتاۋ تەحنيكاسىن ۇيرەتتى. مەن ونىمەن كوكونىس باسىندا بىرگە سۋرەتكە ءتۇستىم. وسىدان سوڭ ول اسقا دا قاراماي دۇكەنىنە تارتتى. ارادا بىرنەشە كۇن ءوتىپ، ول ءبىر تۇسكى دەمالىس كەزىندە مەنىڭ ۇيىمە باس سۇقتى. جولشىباي ءوتىپ بارا جاتىپ بۇرىلعان ەكەن، باسقاعا كوڭىل بۇرماي، مەنىڭ كوكونىستەرىمدى كوردى. اسىرەسە، قيار مەن چەزىنىڭ ءوسۋ احۋالىن كورىپ باسىن يزەپ، ريزاشىلىق ءبىلدىرىپ: «جارايدى، دەگەنمەن كوكونىس باپتاۋدى ۇيرەنىپ قالىپسىڭ، ەڭ جاقسىسى كۇن ىستىقتا كوكونىس سۋارماعان ءجون، ونى ءتۇس اۋىپ سالقىن تۇسكەننەن كەيىن كەشكە سۋارۋ كەرەك،- دەپ بىلگەن تەحنيكاسىن ۇيرەتۋمەن بولدى...

    لي گۇيرۇڭ مەنىڭ باپتاعان كوكونىستەرىمنىڭ جاقسى شىققانىنا بالاشا قۋانىپ: تازا، ءنارلى كوكونىستى ءوزىڭ ءوسىرىپ جەگەنگە نە جەتسىن، - دەدى.

    مەن وعان ءوزىم وسىرگەن كوكونىستەردەن ءدام تاتقىزدىم. وسىدان سوڭ مەنى ءوزىنىڭ باپتاعان كوكونىسىن كورۋگە ەرتىپ باردى. 66 جاسقا كەلگەن اقساقالدىڭ باپتاعان كوكونىسىندە ءبىر ءمىن جوق. ءتۇر - تۇرىمەن جايناپ تۇر. مۇنى كورىپ ءوزىمنىڭ ول كىسىدەن ۇيرەنەتىندەرىمنىڭ كوپ ەكەنىن سەزىندىم.

    - وقاسى جوق، «كوش جۇرە تۇزەلەدى» - دەيدى حالىق. بىرتىندەپ ۇيرەنىپ الاسىڭ، - دەپ كۇلگەن ول مەنىڭ ۇناماعانىما قويماي سومكەمدى كوكونىسكە تولتىردى. ونىڭ ءۇيىنىڭ اينالاسىندا كوزدىڭ جاۋىن الاتىن نەشە ءتۇرلى كورىنىس گۇلدەرى قۇلپىرا اشىلىپتى. ول مەنىڭ قىزىعىپ قاراپ قالعانىمدى كورىپ:

    - بۇل گۇلدەردەن ۇرىق الىپ، كەلەسى جىلى اۋلاڭنىڭ اينالاسىنداعى بوس جەرگە ەگىپ تاستا. ءار كۇنى قۇلپىرا اشىلعان گۇلدى كورسەڭ كوڭىلىڭ وسەدى، - دەدى. مەن قۋانىشپەن باس يزەپ:

    - كەلەسى جىلى قالايدا ەگەمىن، - دەپ ۋادە بەردىم.

    مەنىڭ اۋلاما ەكپەك بولعانىم جاي گۇل ەمەس، ۇلتتار دوستىعىنىڭ گۇلى سياقتى سەزىلدى ماعان. اينالامىزدا سونشاما كوپ ادامدار ۇلتتاردىڭ ۇلى دوستىعىنا دانەكەر بولىپ، تىڭنان دوستىق جىرىن جازۋدا. ولار باردا دوستىق گۇلى ماڭگى جايقالا بەرمەك.

    نۇرسەرىك بيقاسىم ۇلى

جاۋاپتى رەداكتور: گۇلدەن ماقسات قىزى