ينفورماتسيا تەحنيكاسىنان پايدالانىپ وقۋشىلاردىڭ ۇيرەنۋ اۋىرتپالىعىن جەڭىلدەتەيىك

  • كەلۋ قاينارى: ىلە گازەتى
  • 03:48:09 14/12/2017

    جايناگۇل نۇرعىن قىزى

    

    وقىتۋشى ينفورماتسيا تەحنيكاسىنا شەبەر بولسا، تاپسىرمانىڭ فورماسىن وزگەرتسە ورتا - باستاۋىش مەكتەپ وقۋشىلارىنىڭ ۇيرەنۋ قىزعىندىلىعىنا بەلگىلى دارەجەدە اسەر ەتىپ، ۇيرەنۋ ناتيجەسى جوعارىلاپ، ۇيرەنۋ جاعىنداعى اۋىرتپالىعى دا جەڭىلدەيدى. تومەندە قازىرگى كەزدە كەڭىنەن جالپىلاسىپ جاتقان بىرنەشە ءتۇرلى وسى زامانعى ۇيرەنۋ قۇرالدارىن تانىستىرا كەتەيىن.

    اينالىمداعى ساباقحانا: كىحان ۋنيۆەرسيتەتىنىڭ باستاماسى، كىحان ۋنيۆەرسيتەتى ا ق ش - نداعى پايدا تابۋدى كوزدەمەيتىن، ەڭ ىقپالدى تاربيەلەۋ قۇرىلىمدارىنىڭ ءبىرى. كىحان مۇعالىمنىڭ عالامتورداعى كىتاپحاناسىندا 3500 دەن استام وقىتۋ - تاربيەلەۋ كەسكىنى ساقتالعان.

    بيلل گەتس: ‹‹كىحاننىڭ تابىسقا جەتۋى ادامدى قايران قالدىرادى، ول ءبىر رەتكى توڭكەرىستى باستادى›› دەگەن. ءبىز دە وسىدان شابىت الىپ، وقىتۋ بارىسىنداعى تاماشا ادىستەرىمىزدى، قيىن ماسەلەلەردى شەشۋ جولدارىمىزدى، ۇزدىك تاجىريبەلەرىمىزدى، ۇزدىك وقىتۋ بايلىقتارىن ميكرو ساباق فورماسىندا قىسقا دا نۇسقا، تۇسىنىكتى، تالاپقا ساي جاساپ شىعىپ، عالامتورداعى زاڭدى ورىندارعا قويساق، وسى بايلىقتان پايدالانۋدىڭ ونىمدىلىگى جوعارىلاپ، قۇنى ارتادى. وقۋشىلاردىڭ قالاعان ۋاقىتتا ءبىز وتكەن ساباقتى قايتالاي تىڭداپ، تۇسىنبەگەن ورىندارىن تولىقتاپ الۋىنا بولادى. وسى ارقىلى ۇيرەنۋ ناتيجەسى جوعارىلاپ، اۋىرتپالىعى جەڭىلدەيتىن بولادى.

    توراپتا ىستەلەتىن تاپسىرما وقۋشىلاردىڭ اۋىرتپالىعىن جەڭىلدەتەدى، ءداستۇرلى تاپسىرمالار وقۋشىلاردىڭ ۇيرەنۋ بەلسەندىلىگىن قوزعاي المايدى. دامىعان ولكە، قالالارداعى جانە رايونىمىزدىڭ ءىشىنارا جەرلەرىندەگى مەكتەپتەر بۇل وقىتۋ فورماسىن سىناق باسقىشىنان جالپى بەتتىك قولدانۋ باسقىشىنا بەت الدىرۋدا، كوپتەگەن تاجىريبە سىناقتارىنا نەگىزدەلگەندە، توراپتاعى تاپسىرما وقۋشىلاردىڭ ۇيرەنۋ بەلسەندىلىگىن جوعارىلاتىپ، ۇيرەنۋ ناتيجەسىنىڭ جوعارىلاۋىنا سەپتىگىن تيگىزگەن. بۇل وقۋشىلاردىڭ كوڭىل كۇي اۋىرتپالىعىن جەڭىلدەتۋگە پايدالى بولىپ قالماستان، وقۋشىلارعا ۇيرەنگەن بىلىمدەرىن قولدانۋ، ماسەلەلەردى شەشۋ ءۇشىن تاعى دا كوپتەگەن امالياتتىق بىلىمگە يە بولۋ كەرەك ەكەنىن ۇعىندىرادى.

    وقىتۋشى - وقۋشىلاردىڭ عالامتوردا بىرلىكتە ۇيرەنۋى وقۋشىلاردىڭ ۇيرەنۋ اۋەسىن قوزعايدى، ينفورماتسيا تەحنيكاسىنىڭ دامۋىنا ىلەسە وقىتۋشى مەن وقىتۋ ماتەريالى وقۋشىلاردىڭ بىردەن - ءبىر ءبىلىم قاينارى بولۋدان قالدى، وقۋشىلار ينفورماتسيا تەحنيكاسى ارقىلى كوپتەگەن بىلىمدەرگە يە بولىپ، ءبىلىم ارناسىن، كوز اياسىن كەڭەيتۋىنە تاماشا جاعداي ازىرلەۋدە. كەيبىر كۇردەلى نازاريالىق بىلىمدەردى ءتۇسىنۋ قيىن بولعان جاعدايدا، وقىتۋشىنىڭ وقۋشىلارمەن بىرلىكتە ۇيرەنۋىنە، ورتاق ىزدەنىپ، تەڭ العا باسۋىنا بولادى. مۇنداي ۇيرەنۋ وقۋشىلاردىڭ عالامتوردان پايدالانىپ ماتەريال ىزدەۋ، قولدانۋ، ءبىر جاقتى ەتۋ، تالداۋ جاساۋ قابىلەتىن ارتتىرىپ، وقۋشىلاردى سەلبەسىپ ۇيرەنۋگە، ءوزارا پىكىر الماستىرۋعا جەتەلەپ، ولارعا سەنىم جانە تابىسكەرلىك سەزىم باعىشتايدى.

جاۋاپتى رەداكتور: جازيرا بولاتباي قىزى