تالاپتى ازاماتتىڭ تالپىنىسى

  • كەلۋ قاينارى: ىلە كەشى گازەتى
  • 03:48:18 15/12/2017

  

    سەرىك سابىر ۇلى (ءتىلشىمىز)

 

    كوزدەگەن ماقسات پەن نىساناعا جەتۋ ءۇشىن ءبىرى تاباندىلىقتان، ەندى ءبىرى سەنىمنەن جازباۋ كەرەك دەگەندەي، ءوزى قىزىققان ىسكە بەل شەشىپ كىرىسۋ تىلگە جەڭىل بولعانىمەن، جۇمىسقا كوشكەندە قيىن سەزىلەتىنى داۋسىز. ەندى عانا 23 جاسقا ىلىنگەن قاراپايىم اۋىل بالاسى ايدىن قاھارمان ۇلىنىڭ كوزدەگەن نىساناسىن ىسكە اسىرۋ ءۇشىن تىڭ ساپارعا اتتانۋى كوپشىلىكتى ءتانتى ەتتى.

    ايدىن قاھارمان ۇلى 1994 – جىلى جەلتوقساننىڭ 16 – كۇنى تەكەس اۋدانىنىڭ قۇشتاي دەگەن جەرىندە مالشى وتباسىندا دۇنيەگە كەلگەن، ىلە وبلىستىق تاجىريبە ورتا مەكتەبىندە وقىعان، 2015 – جىلى ورتا مەكتەپ بىتىرگەن سوڭ ۇرىمجىگە كەلىپ، شينجياڭ ءامينا جوعارى عىلىم – تەحنيكا اشۋ شەكتى سەرىكتىگىندە العاش تازالىق جۇمىسشىسى، جۇك كوتەرۋشى بولىپ ىستەيدى، ارادا جارىم جىل بەرىلە قۇلشىنىپ ۇيرەنۋدىڭ ارقاسىندا وسى سەرىكتىكتىڭ قامباسى باسقارۋشىسى بولادى. ءبىر جاعىنان ىستەپ، ەندى ءبىر جاعىنان ىزدەنىپ، قوعامدىق اشىق قابىلداۋ ەمتيحانىنا دايىندالىپ، سوڭىندا ءۇرىمجى قالاسى شۇيموگۋ رايونى نانحۋ داڭعىلىنداعى حالىققا قولايلى قىزمەت وتەۋ ورنىندا ءبىر جىل حالىق ساقشىسى بولىپ ىستەيدى. سول كەزدە جاھانگەز نۇراش قۋانىشباي ۇلىنىڭ وتاننىڭ بايتاق دالاسىن تەمىر اتپەن اينالىپ شىعۋ ساپارى جونىندەگى حابارلاندىرۋدى كورىپ، وسى رەتكى يگى ساپارعا بىرگە شىعۋ جونىندە وي بولىسەدى. نۇراش شىن پەيىل تانىتىپ وتىرعان جالىندى جاستى جولسەرىگى ەتىپ تاڭدايدى.

    جاھانگەزدەن ساپاردا قينالدىڭ با، قانداي قيىنشىلىقتار بولدى؟- دەگەنىمدە، ول بىلاي دەدى: باسىندا تەمىرات ءمىنىپ ساپارعا شىعۋدى كۇردەلى ويلاماي، جاي شارۋا عوي دەپ قاراعام. جولعا شىققاندا بارىپ تالاي قيىنىشىلىق كورىپ، قينالاتىنمىزدى ويلامادىم. ساپارعا شىققان العاشقى كۇنى قاتتى قالجىرادىم، ەكى بالتىرىم قاتتى اۋىردى. دەسە دە، جول بويى نۇراش اعا شابىت بەرىپ، جىگەرىمدى شىڭداۋدان جازبادى. تۋعان اۋىلدان اتتانىپ، يگى ساپارعا شىققانىمىزعا 3 اي بولدى. قازىر يۇننان ولكەسىنىڭ كۇنميڭ قالاسىنان اتتانىپ، گۇيجوۋ ولكەسىنە جول الدىق. وتە – موتە تاۋلى رايونداردان وتكەندە جاۋىن – شاشىندا قالىپ وتىردىق. يۇننان ولكەسىنە جول العان ساپارىمىزدا جول بويى زور كومەك كورسەتكەن ۇلاربەك ءۇيتان ۇلى، ءداستۇر اشىماقۇن ۇلى، قاستەر باقىتباي ۇلى قاتارلى ستۋدەنتتەردىڭ قولداۋى مەن جەبەۋى شابىتىمىزدى ءتىپتى دە سومدادى.

    « ەڭبەگىڭ قاتتى بولسا، تاتقانىڭ ءتاتتى بولادى» دەمەكشى، جالىندى جاھانگەز ايدىن قاھارمان ۇلىنىڭ قادامى اشىق، ساپارى وڭ بولسىن دەگەن تىلەك ايتامىز.

   

جاۋاپتى رەداكتور: گۇلدەن ماقسات قىزى