شينجياڭ ورتانى لاستايتىن كاسىپورىنداردى «قالادان ونەركاسىپ باقشا رايونىنا كوشىرۋ» قادامىن جەدەلدەتتى

  • كەلۋ قاينارى: شينجياڭ گازەتى تورابى
  • 08:51:49 26/12/2017

     شينحۋا اگەنتتىگىنىڭ ءتىلشىسى سۇن شاۋشيۇڭ ۇرىمجىدەن حابارلايدى. ءتىلشىنىڭ شينجياڭ ەكونوميكا جانە ينفورماتسيالاندىرۋ كوميتەتىنەن ۇعىسۋىنا قاراعاندا، شينجياڭ ورتانى لاستايتىن كاسىپورىنداردى «قالادان ونەركاسىپ باقشا رايونىنا كوشىرۋ» قادامىن تەزدەتىپ، جەرگىلىكتى ورىنداردىڭ قورشاعان ورتانى قورعاۋ ورەسىن جوعارىلاتىپ، قالانىڭ «زات الماستىرۋىن» جەبەيدى ەكەن.

    «قالادان ونەركاسىپ باقشا رايونىنا كوشىرۋ» − قورشاعان ورتانى لاستايتىن كاسىپورىنداردى قالادان كوشىرىپ، ونەركاسىپ باقشا رايونىنا ىرگە تەپتىرۋ، سونىمەن قاتار، كوشىرۋ ورايىنان پايدالانىپ، تەحنيكاسى ارتتا قالعان جابدىقتاردى قاتاردان قالدىرىپ، ورتانى قورعاۋ قۇرىلعىلارىنىڭ ساپاسىن جوعارىلاتىپ، لاس زاتتاردىڭ ىعىستىرىلۋ مولشەرىن ازايتۋ.

    جۋىقتا شينجياڭ ەكونوميكا جانە ينفورماتسيالاندىرۋ كوميتەتى، شينجياڭ قورشاعان ورتانى قورعاۋ مەڭگەرمەسى بىرلىكتە «باقشا رايونىنىڭ ورتانى قورعاۋ قىزمەتىن كۇشەيتۋدى اتقارۋ جونىندەگى پىكىرىن» جاريالادى. «پىكىردە» مىنالار باسا دارىپتەلدى: لاستانۋ قاينارىن تىزگىندەۋدى كۇشەيتىپ، قالا رايونى ىشىندەگى قورشاعان ورتانى لاستايتىن كاسىپورىنداردى جالپى بەتتىك كوشىرۋ، قايتا قۇرۋ كەرەك. تەكسەرۋ تەبىنىن ارتتىرىپ، كاسىپورىنداردى كوشىرۋ، قايتا قۇرۋ بارىسىندا حاۋىپسىزدىك، قورشاعان ورتانى قورعاۋ تالابىنا ۇيلەسۋىن كەپىلدەندىرۋ قاجەت. كوشكەن كاسىپورىنداردى تەڭ قادامدا تەحنيكالىق وزگەرىس ەنگىزۋگە جانە مەحانيزمىنە رەفورما جاساپ قايتا قۇرۋعا شابىتتاندىرىپ، ءوندىرىس تەحنيكاسىنىڭ دەڭگەيىن جوعارىلاتۋدى جەبەۋ كەرەك. تەحنيكاسى ارتتا قالعان ءوندىرىس قۋاتى مەن ارتتا قالعان تەحنيكالىق جابدىقتاردى قاتاردان قالدىرۋدى جەدەلدەتىپ، مەشەۋ ءوندىرىس قۋاتىنىڭ ورنىن تەڭ مولشەردە نەمەسە مولشەرىن ازايتىپ باستىرۋ، مەشەۋ ءوندىرىس قۋاتىن باسقا جەرگە بارىپ قايتادان قۇرۋدان جانە باسقا جەرگە كوشىرۋدەن ساقتانۋ كەرەك. كاسىپورىنداردىڭ ءوندىرىستى ينفورماتسيالاندىرۋ ءتاسىلى ارقىلى باسقارۋ قۋاتى مەن حاۋىپسىزدىكتى ساقتاۋ، قورشاعان ورتانى قورعاۋ ورەسىن جوعارىلاتۋ قاجەت.

    مۇنان سىرت، «پىكىردە» باقشا رايونىن قۇرۋدا ەكولوگيالىق قىزىل سىزىقتى جانە قورشاعان ورتا يقۋاتتىق رايونىن بەلگىلەۋ تالابى بويىنشا ۇيلەسىمدى ورنالاستىرۋ، قورشاعان ورتاسى كىلتەڭ رايونداردا قورشاعان ورتانى قورعاۋ شارتىن تومەندەتۋدى باقشا رايونىنا قارجى تارتۋدىڭ ءتيىمدى شاراسى ەتۋگە بولمايدى، ەنەرگيانى كوپ سارىپ ەتەتىن، لاستاۋ مولشەرى جوعارى، جاراقسىز زاتتاردى كوپ ىعىستىراتىن كاسىپورىنداردى ەنگىزۋگە بولمايدى دەپ بەلگىلەنگەن.

    «12 - بەسجىلدىق» جوسپاردىڭ سوڭىندا شينجياڭدا ونەركاسىپ باقشا رايوندارىنىڭ سانى 93كە جەتكەن، مۇنىڭ ىشىندە مەملەكەت دارەجەلى ونەركاسىپ باقشا رايونى 22، اۆتونوميالى رايون دارەجەلى ونەركاسىپ باقشا رايونى 71، شينجياڭ بويىنشا ونەركاسىپ باقشا رايوندارىنا ىرگە تەپكەن كاسىپورىنداردىڭ جيىنتىعى 28 مىڭ 479. ءتۇرلى ونەركاسىپ باقشا رايوندارى مول مۇناي، تابيعي گاز، ەگىن، مال شارۋاشىلىق ونىمدەرى بايلىعىن تىرەك ەتىپ، ابزال بايلىق قاينارىن ەكونوميكالىق بايلىققا اينالدىرۋ ستراتەگياسىن اتقارىپ، مۇناي، مۇناي - حيميا، كومىر - ەلەكتر، كومىر - حيميا ونەركاسىبى، ءتۇستى مەتال، جابدىق جاساۋ، اۋىل شارۋاشىلىق قوسىمشا ونىمدەرىن جىنتىكتەي مانەرلەۋ، توقىماشىلىق، كيىم - كەشەك، قۇرىلىس ماتەريالدارى، ساۋدا زات اينالىمى قاتارلى وندىرىستەردى نەگىز ەتكەن ءوندىرىس جۇيەسىن العاشقى قادامدا قالىپتاستىردى.

    اۋدارعان: دينار جۇماي قىزى (پراكتيكانت)

جاۋاپتى رەداكتور: گۇلدەن ماقسات قىزى