شينجياڭ ات ونەرى سپورت قوعامى قۇرىلدى

  • كەلۋ قاينارى: شينجياڭ گازەتى تورابى
  • 02:26:57 29/12/2017

  

    ءتىلشىمىز تاڭ كاندۇڭ 17 - جەلتوقساندا ۇرىمجىدەن حابارلايدى. شينجياڭ ات ونەرى سپورت قوعامى 16 - جەلتوقساندا رەسمي قۇرىلدى، بۇل شينجياڭنىڭ ات ونەرى كاسىپ سالاسىنىڭ جاڭا داۋىرگە اياق باسقاندىعىن اڭعارتادى.

    تانىستىرۋعا قاراعاندا، شينجياڭ ات ونەرى سپورت قوعامى شينجياڭ دەنە تاربيە باس مەكەمەسىنە قاراستى جەكە تۇردەگى سپورت قوعامى بولىپ، ات ونەرى سپورتىمەن شۇعىلداناتىن، ات ونەرى سپورتىن قىزۋ سۇيەتىن، ات ونەرى سپورت ونىمدەرىمەن قامدايتىن، قىزمەت كورسەتەتىن، قولداۋ جاسايتىن توپتارمەن جەكەلەردەن ەرىكتى ۇيىمداسقان كاسىپتىك، پايدا تابۋدى كوزدەمەيتىن قوعامدىق ۇجىم.

    شينجياڭدا جىلقى بايلىعى مول، ۇزاق جىلداردان بەرى، باعىمداعى جىلقى سانى 890 مىڭ مولشەرىندە بولىپ كەلەدى. ۇزاق ۋاقىتتان بەرى، رايونىمىزدىڭ ات بايگەسى، قىزقۋار، كوكبار سىندى ۇلتتىق دەنە تاربيە تۇرلەرى ءار ۇلت بۇقاراسىنىڭ القاۋىنا بولەنىپ، تاڭداۋلى ناتيجەلەرگە قول جەتكىزدى، ۇشقىر ات بايگەسى مەن الامان بايگە جارىسى دابىرالى ءوتىپ كەلەدى. اۆتونوميالى رايوندىق دەنە تاربيە مەكەمەسىنىڭ باستاماشى بولۋىندا مەملەكەتتىك جانە اۆتونوميالى رايوندىق الۋان تۇردەگى ماڭىزدى جارىستاردى ۇستىنە الىپ وتكىزىپ، ءۇرتىس 10 جىل بويى مەملەكەتتىك ۇشقىر ات بايگەسى مەن الامان بايگە جارىسىنىڭ بولىمشە جارىستارىن ءساتتى وتكىزىپ، جاقسى باعاعا يە بولدى.

    تاياۋ جىلدان بەرى، ات ونەرى كلۋبى سىندى جاڭادان وركەندەگەن كاسىپ سالاسى رايونىمىزدا قارىشتاپ دامىپ، قوعامنىڭ ءار سالاسىنداعىلاردىڭ شينجياڭنىڭ جىلقى شارۋاشىلىعىنىڭ دامۋىنا ات سالىسۋ بەلسەندىلىگىن ارتتىردى، اسىرەسە، الۋان ءتۇرلى ات ونەرى كلۋبى مەن بايگە الاڭدارىنىڭ دامۋىنا تىڭ تەبىن قوستى. ات ونەرى جانە ات ونەرى كلۋبتارىنىڭ دامۋى وڭىرلىك ەكونوميكانىڭ دامۋىن جەبەۋ رولىن اتقاردى، مۇنان سىرت، شينجياڭنىڭ جىلقى بازارى دا ويداعىداي دامۋدا.

    شينجياڭنىڭ ات ونەرى سپورتى ءداستۇرلى ابزالدىلىققا يە دەنە تاربيە نىسانى بولۋمەن بىرگە، ءداستۇرلى حالىقتىق دەنە تاربيە تۇرىنە جاتادى. شينجياڭنىڭ ات ونەرى سپورت قوعامىنىڭ قۇرىلۋى دەنە تاربيەنى تۇعىر ەتىپ، جالپىلىق، بۇقارالىق سيپاتقا يە ات ونەرى سپورتىن كەڭ كولەمدە ورىستەتۋ ارقىلى شينجياڭنىڭ ات ونەرى سپورتىن كولەمدەنگەن، ارنايىلانعان، شوعىرلى دامۋ ۇلگىسىنە قاراي ويىسۋدا، ءسوزسىز، جۇرۋگە ءتيىستى جول .

    شينجياڭ ات ونەرى سپورت قوعامىنىڭ جاڭادان تاعايىندالعان باستىعى ما جۇڭ: شينجياڭنىڭ ات ونەرى سپورت قوعامىنىڭ قۇرىلۋى رايونىمىزدىڭ جىلقى شارۋاشىلىعىنىڭ ەكونوميكالىق قۇنىنىڭ ارتۋىن جەبەيدى، - دەدى.

جاۋاپتى رەداكتور: گۇلدەن ماقسات قىزى