باۋ - باقشانى باپتاۋ جانە دەرت - دەربەزدەن ساقتاۋ جونىندە

  • كەلۋ قاينارى: ىلە گازەتى
  • 03:41:29 10/01/2018

    

    باۋ - باقشالىق جەرلەرگە ەگىلگەن ءتۇرلى جەمىس اعاشتارى ۇزاق جىل ءونىم بەرەتىندىكتەن ءونىمى جيناپ الىنعاننان كوكتەم، جاز مەزگىلىندە قايتا كوكتەپ، جەمىس بەرۋ كەزەڭىنە دەيىن باۋ – باقشانىڭ توپىراعىن ۇقىپتىلىقپەن باپتاپ قۇنارلاندىرۋ تالاپ ەتىلەدى. ويتكەنى جەمىس اعاشتارى ءوسىپ - جەتىلۋ، جەمىس بەرۋ مەزگىلىندە توپىراقتاعى ورگانيكالىق زاتتار مەن مينەرال قورەكتىكتەردى سىمىرەتىندىكتەن توپىراقتىڭ قۇنارلىعى ۇقساماعان دارەجەدە تومەندەيدى. بۇدان تىس، جەمىس اعاشىنىڭ ءوسىپ - جەتىلۋ، جەمىس بەرۋ مەزگىلىندە ءتۇرلى دەرت - دەربەز، زياندى جاندىك، ارام شوپتەر پايدا بولىپ، جەمىس اعاشىنا زيان جەتكىزەدى. ال ءونىمى جيناپ الىنعاننان كەيىن جوعارىداعى ايتىلعان دەرت - دەربەز ميكروبى، زياندى جاندىك قالدىعى جانە ارام ءشوپ تۇقىمىنىڭ كوپ ءبولىمى باۋ - باقشا توپىراعىنىڭ قىرتىسىندا، اعاش جاپىراعىندا، ءشوپ - شالاڭ، كوڭ - قوقىر اراسىندا قالىپ، قىستان وتەدى دە، كەلەسى جىلعى كوكتەمدە قايتا جاندانىپ، جالعاستى زيان سالادى. سوندىقتان جەمىس اعاشىنىڭ ءونىمى جيناپ الىنعاننان كەيىن جەمىس باقشاسىنىڭ جەرىن تەرەڭىرەك جىرتىپ تاستاسا، كۇن نۇرىنىڭ، جاۋىن - شاشىننىڭ ىقپالىنان توپىراق كەسەكتەرى ۇگىتىلىپ، توپىراقتىڭ ءتۇزىلىسى مەن ساپاسىندا وزگەرىس بولادى ءارى سۋ، قورەكتىك، اۋا، جىلۋ ءوتۋ شارت - جاعدايى جاقسارا تۇسەدى. باۋ - باقشالىق جەردىڭ توپىراعىن اۋدارۋمەن بىرگە، تولىق شىرىتىلگەن اۋلا تىڭايتقىشىنان ءار مۋ جەرگە 2 - 3 توننا، ازوت، فوسفور، قوسىلىستى حيميالىق تىڭايتقىشتان ءار مۋ جەرگە 25 - 30 كيلوگرامعا دەيىن نەگىزگى تىڭايتقىش رەتىندە بەرسە ءشىرىندى ورگانيكالىق زاتتار مەن مينەرال قورەكتىكتەردىڭ تولىقتانۋىنا پايدالى بولادى.

    ءار جىلدىڭ سوڭعى مەزگىلىندە باۋ- باقشالىق جەرلەردى تەرەڭىرەك جىرتۋ ارقىلى دەرت - دەربەز ميكروبى مەن زياندى جاندىك قالدىقتارىن توپىراق قاباتىنا قالدىرىپ، كەلەسى جىلى كوكتەمدە قايتالاي ءوسىپ - ءوربۋىن تەجەۋ كەرەك. بۇدان تىس، باۋ – باقشالى جەردىڭ توپىراعىن تەرەڭىرەك اۋدارعاندا دەرت - دەربەز، زياندى جاندىك قالدىقتارىنىڭ قىستان ءوتۋ ورتاسى بۇزىلادى. توپىراق بەتىنە شىققان زياندى جاندىك قالدىقتارى سۋىقتا ءۇسىپ ولەدى نەمەسە قۇستارعا جەم بولادى.

    باۋ - باقشا ىشىندەگى ءتۇرلى ارام شوپتەر مەن قۋراپ تۇسكەن اعاش جاپىراقتارى دەرت - دەربەز جانە زياندى جاندىك قالدىقتارىنىڭ قىستان وتەتىن جايلى ورنى بولاتىندىقتان كۇز سوڭىندا ارام ءشوپ قالدىقتارى مەن اعاش جاپىراقتارىن تۇگەلدەي جيناپ الىپ ءشىرىتۋ نەمەسە ورتەپ جىبەرۋ كەرەك.

جاۋاپتى رەداكتور: گۇلدەن ماقسات قىزى