ءشوپ شابۋ جانە ونى جيناۋ جونىندەگى تەحنيكالىق تالاپتار

  • كەلۋ قاينارى: ىلە گازەتى
  • 03:43:09 10/01/2018

 

    ءشوپ شابۋدىڭ ۇيلەسىمدى مەزگىلىن تاڭداۋ. تابيعي نەمەسە جاساندى شاپپالىقتارداعى ءشوپتى شاۋىپ جيناۋ قىسقى مال ازىعىن دايىنداۋداعى ماڭىزدى جۇمىس ەسەپتەلەدى. مۇندا سول جەردىڭ تابيعي شارت - جاعدايىنا، اۋا رايىنا، ءشوپتىڭ شىعىمدىلىعىنا قاراي وتىرىپ، ءشوپ شابۋدىڭ ەڭ ۇيلەسىمدى مەزگىلىن تاڭداۋ كەرەك. ءشوپتى ۇيلەسىمدى مەزگىلدە شابۋ − سول جىلى جيناپ الىناتىن مال ازىعىندىق شوپتەردىڭ ءتۇسىمى مەن ساپاسىنا قاتىستى بولىپ قويماي، جايىلىمنىڭ وندىرىستىك ورەسىن جوعارىلاتۋعا ىقپال جاسايدى. ءشوپتى بەلوك قۇرامى جوعارى، ءىرى تالشىعى از، ءتۇسىمدى، جۇعىمدى، قايتا جەتىلۋىنە ءتيىمدى كەزىندە، ياعني بۇزاۋ، گۇل اشۋ مەزگىلىندە شاپسا ەڭ ۇيلەسىمدى بولادى. مۇندا ءوندىرىس شارت - جاعدايىنا جانە شاپپالىقتاردىڭ جەر تۇزىلىسىنە قاراي ماشينامەن شابۋ جانە ادام كۇشىمەن شابۋ سياقتى ادىستەر قولدانىلادى.

    ءشوپ شابۋدىڭ ۇيلەسىمدى ءتارتىبىن بەلگىلەۋ. جىلىنا ءبىر رەت شابىلاتىن شاپپالىقتاردى ءبىرىنشى رەت ءشوپ باس جارعاننان تارتىپ گۇل اشۋدىڭ العاشقى مەزگىلىندە شاۋىپ، تۇراقتى شاپپالىقتاردى كەزەكپەن شابۋ قاجەت. مۇندا شاپپالىقتى بىرنەشە شاعىن وڭىرلەرگە ءبولىپ، بەلگىلى ءتارتىپ بويىنشا جىل سايىن ءارقايسى شاعىن وڭىرلەردەگى مال ازىعىندىق شوپتەردى شابۋ مەزگىلىن وزگەرتىپ، مال ازىعىندىق شوپتەر توبىنىڭ تىنىعىپ قايتا جەتىلۋىنە وراي جاراتۋ ارقىلى مال ازىعىندىق شوپتەردىڭ قورەكتىك توپتاۋىنا جانە تۇقىمدارىنىڭ كوبەيۋىنە ءتيىمدى شارت - جاعداي ازىرلەپ بەرۋ كەرەك. ۇزاق جىل پايدالاناتىن شاپپالىقتاردى سۋارۋ، توپىراعىن قوپسىتۋ، تىڭايتقىش بەرۋ سياقتى باپتاۋ شارالارىن مۇقيات ىستەپ، كەلەر جىلعى ءشوپ تۇسىمىنە نۇقسان جەتپەۋى ءۇشىن مەيلى ءبىر رەت شابىلعاننان كەيىن بولسىن، الدە ەكىنشى رەت شابىلسىن ەڭ ابزالى مال ازىعىندىق شوپتەردىڭ ءوسۋى توقتاۋعا ءبىر ايداي ۋاقىت قالعاندا اياقتاتۋ كەرەك.

    پىشەن جيناۋدىڭ ساپاسىنا كەپىلدىك ەتۋ. جينالعان پىشەننىڭ ساپاسىنا كەپىلدىك ەتۋ جانە ونىڭ قورەكتىك قۇرامىن تومەندەتپەۋ ءۇشىن مال ازىعىندىق شوپتەردى قىسقا ۋاقىت ىشىندە دەگدىتىپ، دەگدىتۋ بارىسىندا مۇمكىندىكتىڭ بارىنشا جاۋىن - شاشىنعا قالدىرماي، كۇن نۇرىنا قاقتاماي، سۋ قۇرامىن بىركەلكى ۇستاپ، شومەلە سالعاندا، مايالاعاندا گۇلىن تۇسىرمەۋ كەرەك. جەر - جەر ساپالى پىشەن دايىنداۋدا جوعارىداعى پرينسيپتەرگە ساي ءوز جەرلەرىنىڭ اۋا رايى جانە باسقا دا شارت - جاعدايىنا نەگىزدەلە وتىرىپ، جەرگە جايىپ دەگدىتسە دە، لاپاستىڭ استىنا دەگدىتسە دە بولادى.

    پىشەندى مايالاۋ جانە ساقتاۋ. پىشەننىڭ سۋ قۇرامىنىڭ قالىپتى بولۋى پىشەندى كوگەرىپ - شىرۋدەن ساقتاۋدىڭ كىلتى ەسەپتەلەدى. پىشەندى مايالاپ ساقتاۋدا سۋ قۇرامى %18 - 15 ارالىعىندا بولۋ تالاپ ەتىلەدى. ۇزاق ساقتالاتىن پىشەن بيىك ءارى قۇرعاق، سۋ ىعىستىرۋعا قولايلى جەرگە جينالۋى، تاسۋعا، مالعا سالۋعا قولايلى بولۋى، جەر بەتىنەن 40 - 50 سانتيمەتر بيىك بولۋى كەرەك.

 ماقالانى جازعان

 كادىرقان ءابىلقايىر ۇلى

جاۋاپتى رەداكتور: گۇلدەن ماقسات قىزى