اسىپ قالعان ەگىس ءدارىسىن ساقتاۋ ءادىسى

  • كەلۋ قاينارى: ىلە گازەتى
  • 03:44:56 10/01/2018

   

    اسىپ قالعان ەگىس ءدارىسىن ساقتاۋدا الدىمەن تۇسىندىرمەسىن ەگجەي-تەگجەيلى وقىپ، كۇشىن جويعان ەگىس دارىلەرىن يەن دالاعا اپارىپ كومىپ تاستاۋ، الباتى جەرگە تاستاي سالماۋ ءتيىس. ويتپەگەندە ادام مەن مالدى ۋلاپ، ورتانى لاستايدى.

    پەشەتتەپ ساقتاۋعا كوڭىل ءبولۋ. قۇمىراداعى سۇيىق ەگىس ءدارىسىنىڭ ىشكى قاقپاعى بولۋى ءارى ونى مىقتاپ جابۋ ارقىلى ەگىس ءدارىسىنىڭ بۋلانىپ، كۇشىن جويىپ، ورتانى لاستاۋىنان ساقتانۋ كەرەك. قالتاعا سالىنعان ۇنتاق ەگىس ءدارىسىن قوس قاباتتى سۋلياۋ قالتاعا سالىپ، جىلۋ ءسىمىرۋ قاسيەتىنىڭ وزگەرۋىنەن ساقتانۋ ءتيىس.

    ۇيلەسىمدى تەمپەراتۋرانى ساقتاۋعا كوڭىل ءبولۋ. كوپ ساندى ۇنتاق ەگىس ءدارىسىنىڭ جوعارى تەمپەراتۋرادا ساپاسى وڭاي وزگەرەدى دە تەمپەراتۋرا جوعارىلاعان سايىن ەگىس دارىلەرى وڭاي ەرىپ، ىدىراپ، ۇشىپ كەتەدى. كەيبىر قويمالجىڭ ەگىس دارىلەرى جوعارى تەمپەراتۋرادا قويمالجىڭدانۋ قۋاتىن جويىپ، ءدارىنىڭ كۇشى تومەندەيدى. ال، كەيبىر قۇمىراداعى سۇيىق ەگىس دارىلەرى تومەن تەمپەراتۋراعا جولىققاندا قاتىپ قالادى نەمەسە قۇمىرا سۋىقتان جارىلادى. وسىنداي ەگىس دارىلەرىن ساقتاۋدا بولمە ءىشى تەمپەراتۋراسى ءبىر سەلتسي گرادۋستان جوعارى بولۋى كەرەك.

    قۇرعاق ورىنعا ساقتاۋ. ۇنتاق ەگىس دارىلەرى مەن وسىمدىكتىڭ ءوسۋىن تەڭشەگىش دارىلەر وڭاي ىلعالدانىپ تۇيىرشىككە اينالادى، سوندىقتان مۇنى ساقتايتىن ورىن قۇرعاق بولۋى، جاڭبىر نەمەسە قار سۋى وتۋدەن ساقتانۋ كەرەك. ۇنەمى اۋا الماستىرىپ، بولمە ءىشىنىڭ دىمقىلدىعىن %75 تەن تومەن دەڭگەيدە ساقتاۋ كەرەك.

    شىرعالاڭ تۋىلۋدان ساقتانۋ. ەگىس دارىلەرىنىڭ بارلىعىندا ۇقساماعان دارەجەدە ۋىت بولادى. ەگىس دارىلەرىن ارناۋلى ىدىسقا سالىپ، اۋىزىن مىقتاپ بەكىتىپ، ايىرىم ورىنعا قويۋ كەرەك. استىق، ماي، تۇقىم، جەم، كوكونىستەرمەن بىرگە ساقتاۋعا بولمايدى.

    ۇنەمى تەكسەرىپ تۇرۋ. ساقتالعان ەگىس دارىلەرىن مەزگىل سايىن تەكسەرىپ تۇرۋ، دىم تارتۋدان، ءۇي توبەسىنەن سۋ وتۋدەن، قورابىنىڭ بۇلىنىپ، كۇشىن جويۋىنان ساقتانۋ كەرەك.

       ماقالانى جازعان

      كادىرقان ءابىلقايىر ۇلى

جاۋاپتى رەداكتور: گۇلدەن ماقسات قىزى