ىلە اڭعارىنداعى ۇلكەن شيپاحانالار ۇتىمدى شارا قولدانىپ، ماۋسىمدىق اۋرۋدىڭ قاۋىرت كەزەڭىنە باتىل توتەپ بەردى

  • كەلۋ قاينارى: ىلە كەشى گازەتى
  • 03:41:30 11/01/2018

 

    ءوز حابارىمىز. قىس كىرىپ، اۋا تەمپەراتۋراسىنىڭ تومەندەۋىمەن تۇرعىندار، اسىرەسە قارتتار، ورەندەر اراسىندا تىنىس جولى قابىنۋ، وكپە قابىنۋ، دەمىكپە سياقتى تىنىس جولى اۋرۋلارى كوبەيىپ، ىلەدەگى ۇلكەن شيپاحانالاردىڭ شۇعىل قۇتقارۋ بولىمىندەگى ناۋقاس، اسىرەسە تىنىس جولى قابىنۋ ناۋقاسىنا شالدىققان ورەندەر قاۋىرت كوبەيگەن. وسى جاعدايعا قاراتا ىلەدەگى ۇلكەن شيپاحانالار ناۋقاس قاۋىرت كوبەيۋگە باتىل توتەپ بەرۋ جوباسىن جاساپ، بالالار بولىمىندەگى شيپاگەر، سەستىرالاردى ويداعىداي ورنالاستىرىپ، باسقا بولىمدەر مەن شۇعىل قۇتقارۋ ءبولىمى اراسىنداعى سەلبەسۋدى كۇشەيتىپ، جاۋاپكەرلىكتى ايقىنداپ، 2-دارەجەلىدەن جوعارى شيپاحانالاردىڭ ىشكى اۋرۋلار بولىمىندەگى تاجىريبەلى شيپاگەرلەردى بالالار اۋرۋىن ەمدەۋ بويىنشا ارناۋلى تاربيەلەۋ كۋرسىنا قاتىناستىرىپ، بالالار اۋرۋى بولىمىندەگى شيپاگەر سانىن تولىقتادى ءارى تىنىس جولى، جۇرەك ىشكى ءبولىمى، نەرۆ ءبولىمى، سالماقتى ناۋقاستار ءبولىمى، جۇعىمدالۋ ءبولىمى سياقتىلارمەن سەلبەسىپ، كاسىپتىك جاقتان قولداۋدى كۇشەيتتى. سونداي –اق كەزەكشىلىكپەن ناۋقاس كورۋدى جالعاستىرىپ، شيپاگەرلەردىڭ قىزمەتكە بۇرىن شىعىپ، تۇستە كەزەكپەن ناۋقاس كورۋىن، كەشتە شيپاگەر سانىن كوبەيتۋدى جۇزەگە اسىرىپ، ناۋقاستارعا قولايلىلىق جاراتتى. ناۋقاس تەكسەرۋ، ناۋقاسقا دياگنوز قويۋ، ەمدەپ ساۋىقتىرۋعا قاجەتتى ءدارى-دارمەك، زاتتىق جاراقتى تولىقتاپ، تەكسەرۋ ناتيجەسىن شىعارۋ، جولداۋ ۋاقىتىن بارىنشا قىسقارتتى. حاۋىپسىزدىكتى ساقتاۋدى بارىنشا كۇشەيتىپ، شيپاحانا ءتارتىبىن ساقتاپ، ناۋقاستار ءۇشىن ورىندىق، قايناعان سۋ دايىنداپ، قىزمەت وتەۋ ساپاسىن بارىنشا جوعارىلاتتى.

    قازىر ىلە وبلىستىق دوستىق شيپاحاناسى، شينحۋا شيپاحاناسى، 4-ديۆيزيا شيپاحاناسى سياقتى ورىندار جالپى ناۋقاستار، اسىرەسە بالالار ءۇشىن ساپالى، ويداعىداي ەمدەلۋ ورتاسىن جاراتىپ بەردى. سونىمەن بىرگە، شيپاگەرلەر قالىڭ قالا تۇرعىندارىنا دەنساۋلىقتى قورعاۋ بىلىمدەرىن قۇلشىنا ۇيرەنىپ، جەكە تازالىققا ءمان بەرۋمەن بىرگە، ادام شوعىرلانعان الەۋمەتتىك ورىندارعا از بارۋدى، وسى ارقىلى جۇعىمدالۋدى ازايتىپ، اۋرۋ تارالۋىنان ساقتانۋدى ەسكەرتەدى. (A1)

جاۋاپتى رەداكتور: گۇلدەن ماقسات قىزى